Taaloga Faitupe—O se Tosinaga i le Lalolagi Aoao

SA SOIFUA aʻe Ioane i Sikotilani, ma sa moomoo ina ia manumalo i se loto (lotto). Ua ia faapea mai: “Ou te faatauina se pepa loto i vaiaso uma. E laʻitiiti lava si ona tau, ae e aumaia e lenā pepa iā te aʻu se faamoemoe e mauaina ai so o se mea ou te manaʻo i ai.”

Sa fiafia tele Kazushige i Iapani, i tuuga solofanua. Ua ia faapea mai: “O se fiafiaga tele le faia o petipetiga i tuuga solofanua i malae tutuu, ma i nisi taimi ou te malo ai i ni tupe se tele.”

Ua taʻua e Lina i Ausetalia, o le “bingo o laʻu taaloga lea e sili ona ou fiafia i ai. O lenei masaniga, ou te faaaluina ai pe tusa o le $30 i le vaiaso, ae ou te fiafia tele i lagona e oo mai ona o le manumalo.”

E vaai Ioane, Kazushige ma Lina i taaloga faitupe o se ituaiga o fiafiaga e lē afāina ai. E faitau selau miliona tagata i le lalolagi aoao o loo iai lenā lava manatu. Na faaalia e se faamaumauga o manatu faaalia i le 1999 faapea, o le luavaetolu o tagata Amerika e taliaina taaloga faitupe. I le 1998, na faaalu ai e tagata e auai i taaloga faitupe i Amerika le tusa ma le $50 piliona i fale ua faataga faaletulafono mo ia taaloga, ua sili atu i tupe na latou faaaluina i pepa o tifaga, puʻeina o musika, taaloga tetele, paka e iai uma mea faafiafia, ma taaloga vitiō o loo iai.

E tusa ai o se suʻesuʻega na faia talu ai nei, i le tausaga e tasi, e sili atu i le 80 pasene o le faitau aofaʻi o tagata i Ausetalia na auai i taaloga faitupe a itiiti mai e faatasi, ae o le 40 pasene e auai i taaloga faitupe i vaiaso uma. I se fuafaatatau, e faaaluina e tagata o lenā atunuu le silia i le $400 Amerika i tausaga taʻitasi i taaloga faitupe, tusa e faaluaina le aofaʻiga o tupe o loo latou faaalu i lo o tagata Europa, po o tagata Amerika, lea ua avea ai tagata Ausetalia ma tagata e sili atu ona tuʻinanau i taaloga faitupe i le lalolagi.

E toʻatele tagata Iapani ua pulea e le taaloga o le pachinko, o se taaloga e faaaogā ai ni tamaʻi polo uʻamea, ma e faaaluina ai  le faitau piliona i le tausaga i petipetiga i lenā taaloga. I Pasili, a itiiti mai e $4 piliona Amerika e faaaluina i tausaga taʻitasi i taaloga faitupe, o le tele lava o tupe e faaaluina i pepa loto. Peitaʻi e lē na o tagata Pasili e fiafia i le loto. O se fuafaatatau talu ai nei a le mekasini Public Gaming International e faapea e “306 ituaiga loto eseese o loo iai i atunuu e 102.” O taaloga faitupe o se faatosinaga moni lava i le lalolagi aoao, o se faatosinaga o loo faapea mai nisi, e tele faamanuiaga e maua mai ai.

Ua faapea mai Sharon Sharp, o se sui o le Public Gaming Research Institute, i le Iunaite Setete mai le 1964 seʻia oo i le 1999, o tupe maua i loto “e tusa ma le $125 piliona Amerika o tupe faaagaga a le malo o loo maua mai ai ma o se vaega tele o lenei tupe na mauaina talu mai le 1993.” O le tele o lenei tupe sa faaleoleo mo polokalame tau aʻoaʻoga, mataaga a le malo, ma le atinaʻe o nofoaga e faia ai taaloga. O taaloga faitupe o se pisinisi lea ua faafaigaluegaina ai le toʻatele o tagata, ma i Ausetalia lava ia, ua faafaigaluegaina ai le silia i le 100,000 tagata i pisinisi e silia ma le 7,000.

Ua finau mai tagata faufautua o taaloga faitupe faapea, o ia taaloga e lē gata ina sauniaina mea e faafiafiaina ai, ae o taaloga faitupe ua lesitalaina faaletulafono ua mauaina ai galuega, mauaina ai tupe o lafoga, ma faaleleia ai tulaga leaga tau tamaoaiga o loo iai.

O lea, ua toʻatele ai tagata ua fesili, ‘O le ā le leaga o taaloga faitupe?’ O le tali i lenei fesili, o le a talanoaina i mataupu o loo sosoo mai, lea e ono suia ai lau vaaiga e faatatau i taaloga faitupe.

[Ata i le itulau 3]

Ioane

[Ata i le itulau 3]

Kazushige

[Ata i le itulau 3]

Lina