Dagiti Agdudungsa a Tin-edyer​—Pakaseknan?

BABAEN TI MANNURAT ITI AGRIINGKAYO! IDIAY CANADA

KUMAPUY ti isip ken memoria no kurang ti turog, ket dagiti agtutubo nga estudiante ti kangrunaan a madangran, kuna ti diario ti Canada a Globe and Mail. “Kadagiti ubbing ken agtutubo, nainaig iti kurang a turog dagiti pagkunsumisionan a kababalin, kinaalipunget ken kinaalikuteg.” Inadal dagiti sientista ti pannaturog ti agarup 2,200 nga estudiante iti haiskul ket natakuatanda nga agarup 47 a porsiento ti saan a matmaturog iti nairekomendar a walo nga oras a pannaturog iti kada rabii.

Nupay masansan a dida magun-odan ti kasapulan a turog gapu iti estilo ti panagbiagda, “mabalin a dadduma kadakuada ti agsagsagaba met iti di pay nadayagnos a sakit,” kuna ti Globe. “Addaan ti sleep apnea ti agarup 4 a porsiento kadagiti ubbing nga agtawen iti 4 agingga iti 18.” Bayat iti pannaturog, mabalin a medio wenno naan-anay a maserraan ti aangsan iti likudan ti karabukob, isu a bassit laeng ti oksihena a makastrek. Gapuna, di makainana a naimbag ti utek, isu a mariing dagiti ubbing a nabannog ken naalipunget.

Ti panagurok wenno agsultip a panaganges no matmaturog, masansan a panagsakit ti ulo iti agsapa, ken marigatan nga agimemoria ken agipamaysa, agraman ti kanayon ken nakaro a panagtuglep iti aldaw, dagiti posible a pagilasinan a mabalin nga adda sleep apnea ti ubing. Maparegta dagiti nagannak a masansan a denggenda ti annakda no narnekanen ti turogda. Kuna ni Dr. Robert Brouillette, maysa nga eksperto maipapan iti pannaturog dagiti ubbing iti Montreal Children’s Hospital a ti ubing nga addaan sakit ket mabalin a sumardeng nga aganges bayat ti pannaturogna, uray pay no tumal-o-tal-o ti barukongna. “Agangesto no agriing wenno agkir-in [sa] aganges sagpaminsan sakbay a maturog manen.” Mabalin a maminggasut a mapasamak dayta iti kada rabii isu a kasla nabannog ti maysa nga ubing no makariing.

Irekomendar ti American Sleep Disorders Association ti kuarto a nalamiis, nasipnget ken awanan kadagiti makasinga a telebision wenno computer. Makatulong met kadagiti ubbing ken tin-edyer ti regular nga oras ti pannaturog ken panagriingda tapno sumayaat ti turogda iti rabii. Dadduma nga addaan iti sleep apnea ti agus-usar iti makina a kanayon a mangipug-aw iti angin iti abut ti agong ken ngiwatda tapno kanayon a silulukat ti karabukob bayat ti pannaturog. Kinuna ti maysa a doktora dagiti ubbing: “Napatpateg ti pannaturog ngem ti taraon a kanentayo. Napatpateg pay dayta ngem iti panagehersisio. Ti pannaturog ti mangtarawidwid kadagiti hormone, emosion, ken ti sistema ti imiunidadtayo.”