Hóbennan Sa Puntra . . .

Kiko Mi Por Hasi pa Ta Mas Atraktivo?

“No tabata fásil ni kómodo pa kombersá ku mucha muhé. Mi no tabatin ningun idea di kiko nan ta pensa, kon nan ta sinti, ni ki punto di bista nan tin di sierto kosnan.”​—⁠Tyler.

KI KUALIDAT mucha muhé ta gusta mas di mucha hòmber? “Konfiansa,” un tiner ku yama Emily ta bisa. Robyn, un otro tiner, ta pensa ku un di e kualidatnan mas importante ta, ku e mester ta prèt. Anto ki kualidat mucha hòmber ta buska mas den mucha muhé? Nada straño ku un enkuesta a mustra ku beyesa a skor mas haltu riba nan lista. Anto number seis riba nan lista ta ku e mucha muhé mester tin e mesun interesnan i normanan ku nan.

Frekuentemente bo ta haña artíkulonan i enkuestanan ku ta trata e relashon entre mucha muhé ku mucha hòmber den revistanan ku ta dirigí na hóbennan. Klaramente, un kantidat di hóben ta pensa hopi, òf asta ta preokupá, tokante kiko e sekso opuesto ta pensa di nan. Kisas abo mes tin bes sa wòri tokante esei. Maske bo no ta kla pa kasa pa aworakí, tur hende kier ta atraktivo! Tyler ta remarká: “Ora bo ta tiner, bo kier ta atraktivo pa tur hende. Bo kier pa otro mucha hòmber òf mucha muhé di bo edat gusta bo.” Ademas, por ta bo ta sinti ku algun dia lo bo kier haña un bon hende pa kasa kuné. Ora e tempu ei yega, ta normal ku lo bo kier atraé e persona ei.

Pero komo un hóben kristian, kisas bo no tabatin masha eksperensia den trata ku e sekso opuesto. Banda di esei, por ta bo ta sinti ku bo kompañeronan ta pone preshon riba bo pa bo ta físikamente atraktivo. Debí na e echo ku bo ta mira un kantidat di supermodelo i aktornan yen di múskulo na televishon i den revistanan, no ta nada straño ku bo ta sinti bo insigur i ku bo falta algu! Pues kiko anto ta nesesario pa otro hende por gusta bo⁠—⁠inkluso esnan di sekso opuesto⁠—⁠den un manera saludabel, balansá i positivo?

E Bobedat di Anhelá un Kurpa “Perfekto”

William S. Pollack, sikólogo klíniko, ta remarká ku bou di influensia di e industria di entretenimentu, hopi hóben “ta usa masha hopi tempu pa tene diet, hisa barbèl i hasi aerobics, tur esei pa nan logra transformá e sais i forma di nan kurpa.” Algun asta ta bai te na e ekstremo di keda sin kome, pa por logra haña e kurpa “perfekto” ei. Sin embargo, e Sentro di Investigashon di Asuntunan Sosial ta bisa: “E norma di beyesa ku medionan di komunikashon ta presentá aktualmente ta algu ku solamente 5% di hende muhé por logra, i esei ta papiando di peso i tamaño so. Si bo kier e figura òf kara ideal, etcetera, probablemente 1% por logr’é.”

P’esei e konseho ku Beibel ta duna na Romanonan 12:2 ta práktiko: “No laga e manera di pensa di e mundu aki forma boso.” (Beibel na papiamentu koriente) Pero esei no kier men ku bo no mester wòri ku bo aparensia. Ta rasonabel pa kuida bo kurpa dor di hasi ehersisio i tene diet na un manera balansá. (Romanonan 12:⁠1; 1 Timoteo 4:⁠8) Loke  tambe por yuda bo mustra bon i sinti bo bon ta si bo sosegá i drumi sufisiente. Ademas, pone atenshon na limpiesa di bo kurpa i bo stail di bisti i bo stail di kabei. Un hóben britániko ku yama David a remarká: “Tin un mucha muhé ku ta masha bunita, pero e no ta hole bon. Esei ta pone ku otronan ta evit’é.” Pues, baña regularmente. Loke tambe ta drecha bo aparensia ta si bo tene bo man, kabei i uña limpi.

Beibel ta desanimá hende pa pone demasiado énfasis na loke nan ta bisti, pero e ta konsehá kristiannan pa “dòrna nan mes ku bistí apropiá, desente i moderá.” (1 Timoteo 2:⁠9) Bisti paña ku ta para bo bon pero ku no ta ekstrabagante ni indesente. * Si bo presta atenshon di un manera rasonabel na bo aparensia, bo por haña mas konfiansa den bo mes. Un hóben ku yama Paul ta ekspresá e idea aki di e siguiente manera: “Kisas bo no ta esun di mas bunita òf nèchi, pero bo por drecha loke bo tin.”

Kualidatnan di Paden

Aunke un bunita kara i un nèchi kurpa ta hala atenshon, “beyesa ta pa un tempu.” (Proverbionan 31:⁠30, BPK ) Beyesa ta pasahero, i sigur-sigur e no por remplasá kualidatnan personal atraktivo. (Proverbionan 11:22) Kòrda tambe, ku “hende ta wak aparensia di pafó, ma SEÑOR ta wak kurason.” (1 Samuel 16:⁠7) Pues en bes di pone tur bo atenshon na bo sintura òf bo múskulonan, mehorá bo kualidatnan dor di traha riba “e persona skondí di e kurason, ku e kualidat inkoruptibel di un spiritu suave i ketu, lokual ta presioso den bista di Dios.” (1 Pedro 3:​3, 4; Efesionan 4:24) Ta bèrdat ku hopi hóben den e mundu moderno aki no ta wòri masha ku karakterístikanan atmirabel di personalidat, i muchu ménos ku kualidatnan spiritual. * Pero esnan ku tin e normanan divino sí ta apresiá nan i ta haña nan atraktivo!

Kier men, e mihó manera pa bo ta atraktivo den bista di kristiannan spiritual ta dor di ta spiritual. Kultivá bo spiritualidat dor di hasi orashon, studio personal di Beibel i bai reunionnan kristian. (Salmo 1:​1-3) No opstante, tin otro kualidat i abilidat útil ku bo por desaroyá. Bo no tin mester di sali regularmente ku un hende òf tin un relashon romántiko pa bo kultivá e kualidatnan aki. Al kontrario, bo por praktiká nan miéntras ku bo ta trata ku otro hende den bo bida diario.

Por ehèmpel, bo ta sinti bo inkómodo i tímido ora bo ta den presensia di e sekso opuesto? Un hóben ku yama Paul ta atmití: “Tin bes mi ta sinti mi inkómodo, pasobra nan ta mucha muhé, i ami no ta komprondé mucha muhé mes bon ku mucha hòmber. I mi no kier pasa bèrgwensa.” Kon bo por desaroyá e konfiansa i ekilibrio ku lo pone otronan sinti nan kómodo? Un manera ta dor di probechá asosiá ku tur e diferente rumannan ku tin den kongregashon. Ora bo ta na reunion, mustra interes den otro hende, no den esnan di e sekso opuesto di bo edat so sino tambe den muchanan, adultonan i esnan di edat. (Filipensenan 2:⁠4) Si bo siña trata di un manera bon ku hende di tur edat, esei lo yuda bo desaroyá konfiansa den bo mes.

Pero tene kuidou. Hesus a bisa: “Stima bo próhimo manera bo mes.” (Mateo 19:19) Si bo tin konfiansa den bo mes, lo tin ménos chèns ku lo bo hasi ko’i kèns i sinti bo inkómodo ora bo ta den kompania di otro hende. * Sin embargo, maske ta nesesario pa bo tin un sierto grado di rèspèt propio, no bai den ekstremo. Apòstel Pablo a bisa: “Mi ta bisa kada un di boso pa no pensa mas haltu di su mes ku e mester pensa.”​—⁠Romanonan 12:⁠3.

Analisá tambe kon bo sa anda ku otro hende. Un mucha muhé britániko ku yama Lydia a komentá: “Tin un mucha hòmber na mi skol ku ta basta popular entre e mucha muhénan. Pero ora nan siña konos’é, nan no ta gust’é mas pasobra e ta brutu i sin manera.” Hende ta sinti nan atraé na otro personanan ku ta papia di un manera bondadoso, ku bon manera i ku ta mustra konsiderashon na otro hende. (Efesionan 4:​29, 32; 5:​3, 4) Dr. T. Berry Brazelton a remarká ku “si un persona ta agradabel, esei ta manera un pasport ku ta  yud’é yega fásilmente serka otro hende.” Bon manera “ta hopi importante pa otro hende aseptá bo.”

Kustumber i regla di étika ta varia rònt mundu. P’esei ta bon pa bo opservá kon kristiannan maduro ta trata otro. Por ehèmpel, ta kustumber den bo pais pa un hende hòmber tene porta habrí pa hende muhé pasa? Si esei ta e kaso, anto bo siña demostrá e kortesia aki lo bo haña e reputashon di ta un hende ku tin bon manera i ku ta ekilibrá.

Por último, por ta bo ta haña ku ta bon pa bo por tin un sentido di humor balansá. Beibel ta bisa ku tin “un tempu pa hari,” i un persona ku tin un bon sentido di humor hopi bes ta haña amigu masha fásil.​—⁠Eklesiástes 3:​1, 4.

Ser Amigabel Versus Flirtmentu

Un revista ku ta pretendé di siña hóbennan kon pa traha sita a konsehá ku e sekreto pa atraé hende di e sekso opuesto ta dor di flirt. A konsehá lesadónan pa smail i pa wak e persona den su kara i pa perfekshoná e promé frasenan ku bo ta bisa. E konseho aki ta kontrali ku e spiritu di e konseho ku Pablo a duna na Timoteo pa trata esnan di sekso opuesto “den tur puresa.”​—⁠1 Timoteo 5:⁠2.

Maske flirtmentu ta pone bo haña konfiansa den bo mes, e ta algu insinsero i deshonesto. Bo no tin nodi flirt òf koketeá pa bo hiba un kombersashon interesante. Ni bo no tin ku hasi preguntanan inapropiá òf ku ta kousa bèrgwensa, pa haña sa kon hende di e sekso opuesto ta sinti i ta pensa. Persistí den papia tokante kosnan ku ta ‘hustu, puru, i bunita [“amabel,” NW],’ i lo bo mustra sigur-sigur ku bo ta riba kaminda pa bira un hende hòmber òf muhé madurá i spiritual. (Filipensenan 4:⁠8) Si bo obedesé prinsipionan di Dios lo bo ta atraktivo no solamente pa hende di e sekso opuesto pero tambe pa Dios mes. *​—⁠Proverbionan 1:​7-9.

[Nota]

[Plachinan na página 20]

En bes di konsentrá riba bo aparensia, purba desaroyá kualidatnan spiritual

[Plachi na página 20]

Siña kon pa sinti bo kómodo ku un variedat amplio di hende