Adda Bulong iti Balay ti Lawwalawwa!

BABAEN TI MANNURAT TI AGRIINGKAYO! IDIAY AUSTRALIA

MAKITAM aya ti nagango ken nairut ti pannakalukotna a bulong? Miraem ta naibitin dayta iti balay ti lawwalawwa. Iti damo a panangsukimat, kasla intayab ti angin dayta. Ngem adda naisangsangayan maipapan iti dayta a bulong.

Ti makitkitam ket maysa a naisangsangayan a pagtaengan ti maysa a kita ti lawwalawwa a maawagan a leaf-curling spider. Talaga a nakaskasdaaw dayta a parsua. Dayta laeng ti lawwalawwa nga aglukot iti bulong tapno aramidenna a pagtaenganna sana ap-apan iti seda, a pagaramidna met laeng iti balayna. Ngem agusar laeng aya ti lawwalawwa iti uray ania a kita ti bulong a naiparna a naitayab iti balayna? Mabalin a kasta ti pagarupmo. Ngem no matmatan a naimbag, nabatad nga adda disenio dayta. Ti lawwalawwa ket siaannad a mangpili iti bulong, a nalabit manipud kadagiti naregreg iti daga. Apaman a linukotnan ti bulong, serraan dayta ti lawwalawwa iti linabag ti seda tapno din agukrad.

Ngem, saan laeng a bulong ti usaren dagitoy a lawwalawwa a pagaramid iti pagtaenganda. Kadagiti likud ti paraangan iti ruar ti siudad, masansan nga agusarda kadagiti pirgis ti diario, naingpis a karton, wenno naibellengen a tiket. Ket nakaskasdaaw ta mabalin a pilienda pay ti awang a balay ti biruruko. Naminsan payen a ti balay ti biruruko ket mamin-innem a daras a nadagdagsen ngem iti lawwalawwa a nangibagkat iti dayta iti balayna sa nagnaed iti dayta!

Iladawam iti panunotmo a kayattay nga ammuen no adda ita ti lawwalawwa iti balayna. Sagidentayo a siaalumamay ti bulong. Adda! Makitam kadi? Maysa a bassit, napintas ti kolorna a lawwalawwa ti rummuar iti bulong ket umulog iti saput a pagtalaytayanna a mapan iti daga. Dika agdanag! Dinatay an-anuen. Daytoy a kita ti lawwalawwa ket di makapapatay, nupay kagatennaka bassit no di umiso ti panangiggemmo.

No aldaw, gagangay nga aginana ti leaf-curling spider iti uneg ti bulong a pagnanaedanna. Ngem no rabii, nga ad-adu ti aggagaraw nga insekto, makitam dayta a nakarukob iti wangawangan ti bulong a taengna. Manipud iti dayta a pagbantayanna, siaannad a siputanna ti balayna babaen ti panangipatayna iti maysa a sakana iti ‘linia ti telegrama’​—maysa a naisangsangayan a saput a nayunnat manipud iti bulong nga agturong iti tengnga ti balayna. No adda insekto a mangsagid iti balayna, dardarasen ti lawwalawwa ti mapan iti ayan ti insekto, saputanna dayta, sana kanen.

Daytoy bassit a nalaing nga agibangon ket maysa laeng kadagiti nakaskasdaaw a parsua iti let-ang ti Australia.