Go Ithuta go Bakriste ba Lekgolong la Pele la Nywaga

“Le phafoxê xore xo se bê le a kaxo Le thopa ka mabohlale, ka xo Le fora ka mafêla, ka xo ya ka melawana ya batho, le ka dithutô tša mathômô a lexohle, è se xo ya le Kriste.”—Ba-Kolose 2:8.

YEO ke tsela ye moapostola Paulo a ilego a lemoša Bakriste ba lekgolong la pele la nywaga ka gona mabapi le dikotsi tša go latela difilosofi tša batho ka ntle le temogo. Ba be ba ka kgomarela tlhahlo yeo e ka botwago yeo e neilwego ke Jesu le baapostola ba gagwe, e lego dithuto tšeo di bego di šetše di ba tlišeditše mehola e mentši, goba ba fetoga bahlaselwa ba dikgopolo tšeo di dulago di feto-fetoga tša batho, e lego tsela yeo e bego e šetše e tlišeditše ba dimilione tlalelo le manyami.—1 Ba-Korinthe 1:19-21; 3:18-20.

Go Phela ka “xo ya le Kriste”

Bahlabanela-bodumedi ba mo e ka bago nywaga e sekete e fetilego ba ile ba palelwa ke go kwešiša gore go phela ka “xo ya le Kriste” go bolela mo gontši go feta feela go bontšha potego ya bona go Jesu Kriste. (Mateo 7:21-23) Go bolela go phela ka go dumelelana ka botlalo le dithuto tša Jesu bjalo ka ge di hwetšwa ka Lentšung la Modimo leo le buduletšwego, Beibele. (Mateo 7:15-20; Johane 17:17) Jesu Kriste o itše: “Xe Le nama le Lentšu la-ka, Le barutiwa ba-ka ka xo rereša.” (Johane 8:31, mongwalo o sekamego ke wa rena.) O itše: “Seo bohle ba tl’o xo tseba ka sôna xe Le le barutiwa ba-ka, ké xe Le na le leratanô.” (Mongwalo o sekamego ke wa rena.)—Johane 13:35.

Go bolela therešo, bahlabanela-bodumedi bao ba be ba wetše molabeng wa ‘go forwa ka mafela ka go ya ka melawana ya batho.’ Ga go makatše gore  batho bao ba tlwaelegilego ba ile ba forwa ge baetapele ba bona ba bodumedi, bapišopo ba bona, “ba be ba thoma go tuma bjalo ka banna ba tša bohlabani.” Cyclopedia of Biblical, Theological, and Ecclesiastical Literature ka McClintock le Strong e bolela gore, “moya wa ntwa o ile wa ata kudu gare ga baruti, moo e lego gore ka dinako tšohle ge go be go e-na le selo se sengwe seo se bego se ka hwetšwa [ka yona], ba be ba dula ba itokišeditše ntwa.”

Ke’ng seo se bakilego boemo bjo bjo bo nyamišago? Ka morago ga lehu la baapostola ba Bakriste ba lekgolong la pele la nywaga, baetapele ba kereke ba bahlanogi ka mo go oketšegago ba ile ba hlanogela dithuto tša Kriste, feela bjalo ka ge Lentšu la Modimo le be le boletše e sa le pele. (Ditiro 20:29, 30) Kereke yeo e gobogilego mafelelong e ile ya ikgweranya kudu le mmušo wa lefase. Ngwaga-kgolong wa bone, go thwe Mmušiši wa Roma Constantine o ile a fetogela Bokristeng nakong ya ge a le kgaufsi le go hwa. Ka gona, Cyclopedia e bolela gore, “go ananywa ga diswantšho tša medimo e šele bakeng sa leswao la Sefapano go ile gwa bea Mokriste yo mongwe le yo mongwe ka tlase ga tlamo ya go hlankela e le mohlabani.”

Ke therešo gore Bakriste ge e le gabotse ba be ba se na tlamo e bjalo. Eupša “dipolelo tša maano” tša filosofi ya batho di ile tša ba lebiša go senyeng ka mo go tseneletšego tšohle tšeo Kriste a bego a di emela. (Ba-Kolose 2:4) Dingangišano tše dingwe tša bofora di ile tša dirišwa ka nako e telele bakeng sa go lokafatša dintwa tša batho le dikgohlano. Cyclopedia e bolela gore, lega go le bjalo, ge e le gabotse, bakeng sa motho yo a nago le botho goba motho yo a boifago Modimo gore a tšee karolo go “ditiro tša bosathane tša ntwa, bjalo ka ge di be di dirwa ka thulaganyo mehleng ya kgale goba di dirwa mehleng yeno, a ka se di dumelelanye ka tsela le ge e le efe le . . . melao ya motheo ya Bokriste.”

Madumedi ao a lego ka ntle ga Bojakane le ona a retologetše ntweng nywaga-kgolong ka moka. Ka go swana le dikereke tša Bojakane, a bolaile ditho tše dintši tša bodumedi bja ona ka noši gotee le tša a mangwe ka baka la diphapano tša setšhaba, dipolitiki le bodumedi. A dirišitše bošoro goba tšhošetšo ya ona bakeng sa go sokollela ba bangwe ditumelong tša ona ka noši. A mangwe a ona a tšere karolo tšhollong e kgolo ya madi ya histori bakeng sa go leka le go fihlelela merero ya ona. Ga a fapane le madumedi a Bojakane.

Ba Arogile Lefaseng

Ke ka baka la’ng Bakriste ba lekgolong la pele la nywaga ba be ba kgona go ipoloka ba arogile  dintweng tša tšhollo e kgolo ya madi gotee le dipolitiking tša mehleng ya bona? Ba ile ba thušwa ke melao ya motheo e mebedi. Wa mathomo, go be go e-na le taelo yeo Jesu a e neilego moapostola Petro nakong ya ge Petro a be a diriša tšhoša ya gagwe bakeng sa go mo šireletša: “Bušetša thšoša ya xaxo bodulong bya yôna; xobane e a swaraxo thšoša, ó tlo bolawa ka yôna.” (Mateo 26:52) Wa bobedi, mantšu ao Jesu a a boditšego Pilato nakong ya ge a be a botšiša mabapi le mohuta wa bogoši bja Jesu ge a re: “Mmušô wa-ka xa se o tšwaxo ’faseng leno. Xe mmušô wa-ka o ka be o e-tšwa lefaseng leno, bahlanka ba-ka ba ka be ba o hlabanêla. Byale mmušô wa-ka xa se o tšwaxo mono.”—Johane 18:36.

Bakriste ba lekgolong la pele la nywaga ba ile ba diriša bjang melao yeo ya motheo? Ba ile ba ipoloka ba arogile ka mo go feletšego lefaseng, ba kgomarela boema-gare ka go tia ge go e-tla ditabeng tša dipolitiki le tša bohlabani. (Johane 15:17-19; 17:14-16; Jakobo 4:4) Ba ile ba gana go rwalela magagabo bona dibetša. Histori e bontšha gabotse gore Bakriste ba lekgolong la pele la nywaga ga se ba ka ba tšea karolo megwantong ya botšhaba ya ba-Juda goba ba tlatša madira a mmušo wa Roma. Lega go le bjalo, ga se ba ka ba leka go botša baetapele ba bodumedi seo ba swanetšego go se dira, ka ge seo e be e le boikarabelo bja baetapele bao ba mmušo.—Ba-Galatia 6:5.

Justin Martyr ngwaga-kgolong wa bobedi C.E., o ngwadile mabapi le go tšea ga Bakriste “marumô ba rula maxwêtla ka ôna.” (Mika 4:3) Ge a be a arabela go bao ba ilego ba tsoša dikganetšo mabapi le boemo bja Bakriste, Tertullian o ile a botšiša gore: “Na ke mo go swanetšego go diriša tšhoša, mola Morena a bolela gore yo a swarago tšhoša o tlo bolawa ka yona?”

“[E-kwa] Modimo e le Mmuši go e na le Batho”

Go gana go ya ntweng ga se gwa ka gwa dira dilo gore di be bonolo bakeng sa Bakriste ba pele. Go be go thulana le ditumelo tšeo di bego di amogelwa tša mehleng yeo. Celsus yo e lego lenaba la Bokriste, o ile a kwera boemo bja bona. Tumelo ya gagwe e be e le gore yo mongwe le yo mongwe o swanetše go ya ntweng ge bao ba lego matleng a go buša ba be ba nyaka gore go dirwe bjalo. Go sa šetšwe lehloyo le legolo, Bakriste ba pele ba ile ba gana go latela filosofi le ge e le efe ya batho yeo e bego e ganetšana le dithuto tša Kriste. Ba itše: “Re swanetše go kwa Modimo e le mmuši go e na le batho.”—Ditiro 4:19; 5:29, NW.

 Dihlatse tša Jehofa mehleng yeno di latetše mohlala wa bona. Ka mohlala, kua Nazi ya Jeremane di ile tša gana ka mo go tiilego go tšea karolo dintweng tša Hitler tšeo di tletšego polao. Di be di ikemišeditše go kgotlelela ditlaišo tše šoro, gaešita le gore di hwe ge e ba go be go nyakega, go e na le go senya boema-gare bja tšona bja Bokriste. Go begwa gore “seripa se tee feela sa palo ya tšona se be se golegilwe gomme kotara e tee ya bolawa” ke ma-Nazi bakeng sa go kgomarela ga tšona melao ya motheo ya Beibele ka go tia. (Of Gods and Men) Ka gona, go ba dimilione tše masome-some bao ba bolailwego Ntweng ya II ya Lefase, ga go le o tee yo a bolailwego ke Dihlatse tša Jehofa. Go e na le go bolaya ba bangwe, Dihlatse di be di ikemišeditše go gafa maphelo a tšona, bjalo ka ge tše dintši tša tšona di ile tša dira bjalo.

Thuto Yeo re ka Ithutago Yona

Ke dithuto dife tšeo histori e ka re rutago tšona? Ka kgonthe e nngwe ke ye: Filosofi ya batho ka mo go tšwelago pele e lebišitše lehloyong le tšhollong e kgolo ya madi gare ga ditšhaba le batho. Mmoledi 8:9 ka mo go swanetšego e re: “Motho [o] sa buša motho xore a mo senyê.” Gomme lebaka la motheo bakeng sa se le hwetšwa go Jeremia 10:23, moo Lentšu la Modimo le rego: “Motho tsela y’axwe xa’ e buše; le monna mo a yaxo xa’ ikiše, le xe a xata a tiiša.” Aowa, Modimo ga se a bopela batho gore ba laole ditaba tša bona ka mo go atlegago ka ntle le yena. Ga se ba ka ba newa bokgoni bjo. Histori ka moka e bontšhitše seo.

Ga bjale, re le motho ka o tee ka o tee, re ka se kgone go fetoša seo baetapele ba ditšhaba ba se dirago ge ba boeletša masetlapelo a nakong e fetilego, e bile ga se ra newa matla a go leka go ba kgodiša gore ba tšee tsela e itšego. Eupša ga se ra swanela go tutueletšwa go tšea karolo dintweng tša bona le go ba karolo ya tšona. Jesu o boletše ka balatedi ba gagwe gore: “[Ga] se ba lefase, bjalo ka nna ge ke se wa lefase.” (Johane 17:14, PK) E le go phema go ba karolo ya dintwa tša lefase le, re swanetše gore re dumelele Lentšu la Modimo, Beibele—e sego dikgopolo tšeo di feto-fetogago tša filosofi ya batho—go hlahla maphelo a rena.—Mateo 7:24-27; 2 Timotheo 3:16, 17.

Bokamoso bjo bo Kgahlišago

Lentšu la Modimo leo le botegago le dira mo gontši kudu go feta feela go fo hlabiša seetša dilong tša kgale le tša gona bjale. Le nea tlhahlo e kgonthišeditšwego bakeng sa bokamoso. (Psalme 119:105; Jesaya 46:9-11) Le nea gape seswantšho se se bonagalago gabotse sa morero wa Modimo bakeng sa polanete ye. A ka se ke a dumelela batho go fediša lefase ka go diriša gampe ka tsela yeo e se nago tlhaologanyo matla a magolo ao thutamahlale le thekinolotši di ba neilego ona. O tla kgonthišetša gore lefase le le fihlelela boemo bja Paradeise yeo a bego a le reretše yona mathomong.—Luka 23:43.

Tabeng ye, Lentšu la Modimo le re: “Xobane ba ba tl’o xo dula mo naxeng, ké baloki; ba ba tl’o xo šala bà le xôna, ké bôná ba-ila-bokxôpô. Ba babe ba tlo fedišwa naxeng; bakxeloxi ba tlo rakwa mo xo yôna.” (Diema 2:21, 22) Se se tla direga kgaufsinyane, ka gobane mehla ye ya khuduego e nea bohlatse bja gore re phela “mehleng ya bofêlô” ya tshepedišo ye e kgopo ya gona bjale ya dilo. (2 Timotheo 3:1-5, 13) Ka kgonthe, mehla ye ya bofelo e baletšwe matšatši; gomme e kgaufsi le go fihla bofelong. Boporofeta bja Beibele bo re ruta gore: “Xomme lefase le a feta, le yôna kxanyoxô ya lôna. E a tl’o xo dula à le xôna xo ya xo ile, ké eo a diraxo tše Modimo a di rataxo.”—1 Johane 2:17; Daniele 2:44.

Kgaufsinyane Modimo o tla “senya basenya-lefase” gomme legatong la lefase le la gona bjale le šoro o tla tliša lefase le lefsa leo go lona “xo axilexo tokô.” (Kutollo 11:18; 2 Petro 3:10-13) Ka morago, bakeng sa bao ba šalago, “ó tlo phomola mexôkxô ka moka mahlong a bôná; le lehu le ka se hlwê le e-ba xôna; le xe e le manyami le dillô le bohloko, di ka se hlwê di e-ba xôna.” (Kutollo 21:1-4) Dintwa le bošoro di tla felela sa ruri, bjalo ka ge boporofeta bjo bo lego go Jesaya 2:4 bo tla phethagatšwa ka botlalo: “Ké mo ba tl’o xo tšea dithšoša ba rula mexomá ka tšôna, ba tšea marumô ba rula maxwêtla ka ôna. Xo ka se bê le sethšaba se se tl’o xo tšwêla se sengwê lerumô; batho ba tlo lesa xo ithuta xo hlabana.” Le wena o ka thabela bokamoso bjoo bjo bo thabišago bja ka mo go sa felego ge e ba o ithuta go tšwa dithutong tša histori.—Johane 17:3.

[Ntlhakgolo go letlakala 27]

Dihlatse tša Jehofa di ithutile go tšwa go Bakriste ba lekgolong la pele la nywaga

[Seswantšho go letlakala 24, 25]

Jesu o boletše gore Mmušo wa gagwe ga se karolo ya lefase le

[Seswantšho go letlakala 26]

Lentšu la Modimo le holofetša bophelo bjo bo sa felego bjo bo phethagetšego lefaseng la paradeise