Pagpaniid sa Kalibotan

Kulang sa Tulog nga Biyahe sa Kawanangan

Human mogugol ug lima ka bulan sakay sa estasyon sa kawanangan sa Rusya nga Mir niadtong 1997, ang astronot nga si Jerry Linenger nakamatikod nga ang kausaban gikan sa kahayag ngadto sa kangitngit samtang ang Mir nagtuyok sa yuta matag 90 minutos nakabalda pag-ayo sa iyang kinatulgan. Ngano? Aron makadaginot ug enerhiya, nahimong pangunang tuboran sa kahayag sa Mir ang kahayag sa adlaw nga molapos sa mga bentana. Busa, “sa dili madugay ang pagpulipuli sa adlaw, gabii, adlaw, gabii, 15 ka beses kada adlaw makabalda sa imong kinatulgan,” matod pa ni Linenger. Naghisgot bahin sa mga resulta sa dili-regular nga kinatulgan sa duha niya ka kaubang mga astronot, siya miingon: “Sila makatulog ug molabay sa imong atubangan nga naglutaw.” Sumala sa magasing New Scientist, ang pagpangitag mga paagi aron mahimong regular ang mga proseso sa lawas sa mga astronot “maoy hinungdanon sa kalamposan sa umaabot nga lagyong mga misyon.” Kay kon dili, “malisod pugngan ang pagduka sa mga astronot diha sa tagdugay nga mga panaw sa kawanangan.”

 Mga Langaw sa Prutas ang Nakauna Niini

Ang pagmugna ug makina nga magsagol sa hustong gidaghanon sa sugnod ug oksiheno aron mapadagan ang usa ka awto sa lainlaing mga katulinon ug sa gihapon mahuptang hinlo ang binuga nga hangin maoy malisod nga problema sa inhenyeriya. Nakab-ot kini sa mga tigdisenyo ug awto pinaagi sa paggamit ug “usa ka sistema sa mga balbula nga makapabag-o sa agos sa sugnod ug hangin dihadiha kon mausab ang katulinon,” nag-ingon ang The New York Times. Apan, ang mga tigdukiduki nga nagtuon sa langaw sa prutas didto sa University of Würzburg sa Alemanya di pa dugayng nakakaplag nga ang mga langaw sa prutas dugay nang naggamit ug susama gayod nga paagi sa paghanggab ug hustong gidaghanon sa oksiheno ug pagbuga ug carbon dioxide, nga dili mawad-an ug daghan kaayong tubig pinaagi sa alisngaw. Ang langaw sa prutas naggamit ug gagmitoyng mga buho nga nahimutang sa dughan ug tiyan niini aron makontrolar ang “hustong pagbayloay sa mga gas sa respiratoryo samtang gimenosan ang mawala nga tubig,” nag-ingon ang mantalaan. Kini midugang nga ang mga buho “mahimong mobuka pag-ayo o bug-os nga motak-op, ug mobuka sa lainlaing gidak-on, sulod lamang sa pipila ka segundo.”

Nahubog sa Gugma

Alang sa daghang tawo, ang pagkaibog makapatungha ug lalim nga pagbati, nagtaho ang pamantalaang El Universal sa Mexico City. Makapadaghan kini sa mga neurotransmitter sa utok sama sa dopamine. Ang sikologo sa pamilya nga si Giuseppe Amara nag-ingon nga ang ubang mga tawo, kay dili gustong mawala kining nahubog nga pagbati, mag-ilis-ilis ug trato nga dili magtukod ug dumalayong relasyon. Ang kalalim mahimong dangtag pipila ka bulan hangtod sa duha ka tuig. Dayon kining maong pagbati inanay nga mohupas, ug ang maong tawo mahimong mosugod na sa sunod nga ang-ang, diin ang usa ka hormone nga gitawag ug oxytocin modaghan, nga magpatungha ug mainiton ug dulot nga pagmahal. Bisan tuod nindot kaayo ang ang-ang sa romantikong gugma diin ang usa mobatig kalalim, miingon si Amara, kini makapahanap sa panghukom sa usa, nga magpugong kaniya sa pagkakita sa mga sayop sa lain. Busa, nag-ingon ang El Universal, ang mga espesyalista nagsugyot nga ang mga managtrato dili una magminyo hangtod nga sila “masinati sa usag usa sa gilapdon nga mamentinar nila ang maayong relasyon.”

Midaghan Pag-ayo ang Nagbulag ug Nagdiborsiyo sa Espanya

“Kita dili kinahanglang mouyon sa ideya nga kausa ra kita maminyo sa tibuok natong kinabuhi,” nag-ingon si Inés Alberdi, sosyologo ug awtor sa librong La nueva familia española (Ang Bag-ong Katsila nga Pamilya). Sumala sa gitaho sa mantalaang El País, daghang Katsila nga magtiayon ang dayag nga mibati ug sama niana. Usa ka di pa dugayng pagtuon sa Ministry of Justice nagpakita nga dunay usa nga magbulag o magdiborsiyo sa matag duha ka kaminyoon sa Espanya. Ang mga eksperto nagtagna nga magpadayon pagdaghan ang pakyas nga mga kaminyoon tungod sa nag-usab-usab nga mga panglantaw bahin sa kaminyoon ug sa mas dakong independensiya sa mga babaye labot sa panalapi. “Ang mga magtiayon kulang sa espiritu sa pagsakripisyo sa kaugalingon, [ug] ang mga batan-on dili andam nga moantos sa bisan unsa,” miingon si Luis Zarraluqui, presidente sa Spanish Association of Family Lawyers. “Mas daghan gani ang nangabungkag nga mga kaminyoon taliwala sa mga tigulang na, ilabina sa dihang moabot na sila sa edad sa pagretiro.” Ang naandang relihiyosong mga pagtuo dili igong makapahunong niining maong kiling. Bisan tuod 85 porsiyento sa mga Katsila nag-isip sa ilang kaugalingon nga mga Katoliko, ang gidaghanon sa nagbulag ug nagdiborsiyo miuswag ug 500 porsiyento sa milabayng 20 ka tuig.

Mga Kapeligrohan sa Pagtusok sa Lawas

Ang pagtusok ug alahas diha sa lainlaing parte sa lawas popular kaayo, ilabina taliwala sa mga batan-on. “Ikasubo, panagsa ra silang maghunahuna bahin sa mga sangpotanan niining maong lakang,” nag-ingon ang Polakong magasin nga Świat Kobiety. “Ang yugto sa pagkarebelyoso sa mga batan-on moagi, ug ang kilay nga gitusokan ug mga tipik sa metal dili na isipon nga dayandayan.” Ug bisan tuod ang metal mahimong kuhaon, magpabilin ang mga uwat. Dugang pa, ang pagtusok sa panit sa nawong makadaot sa mga nerbiyos ug mga ugat ug moresulta sa “pagpaminhod” maingon man sa “mga impeksiyon ug mga samad nga dugayng maalim.” Ang bakterya modaghan diha sa “umogon ug init nga palibot” sa baba, busa ang pagtusok ug alahas diha sa baba kasagarang mopatungha ug mga impeksiyon ug bisan pagkadunot sa ngipon. Ang mga fat cyst sa dagway sa gahi nga mga bugon mahimong moturok diha sa mga parte nga gitusokan diin daghan ang mga selula sa tambok, sama sa pusod ug sa mga dalunggan. Ang artikulo nagpasidaan nga “ang metal nga mga dayandayan kasagarang dunay sagol nga nikel. Ang mga tawo nga alerdyik sa maong metal makasinati ug mga simtoma sa pagkaalerdyik, sama sa pagpanghubag ug pagpangatol.”

“Barot nga Cosmetic Surgery”

Sulod sa milabayng napulo ka tuig, ang gipasakang mga sumbong human sa sayop nga cosmetic surgery miuswag ug 117 porsiyento sa Pransiya, mikomento ang pamantalaan nga Le Point, nga dunay 1 ka kaso sa matag 3 nga nalangkit sa operasyon sa dughan. Sumala sa mga espesyalista, mokabat ug 30 porsiyento sa mga cosmetic surgery ang nagkinahanglan ug dugang pagpasibo, ug ang ubang mga pasyente namatay pa gani tungod sa mga komplikasyon human sa operasyon. Nagsaway sa iyang gitawag ug “barot nga cosmetic surgery,” si Dr. Pierre Nahon, nga usa usab ka plastic surgeon, miingon: “Kaming tanan makahimo sulod sa 20 minutos sa operasyon nga kasagarang mokabat ug duha ka oras. Apan dili pareho ang resulta.” Sumala sa Le Point, “ang ubang mga klinika mas mainampingon sa pagpili sa ilang mga abogado kay sa ilang mga siruhano.”

Mga Kabalaka Bahin sa Pag-atiman sa Panglawas Didto sa Uropa

Nagkadaghan ang wala matagbaw sa mga serbisyo sa pag-atiman sa panglawas diha sa pipila ka nasod sa Uropa. Ang listahan sa European Commission nagpakita nga daghang tawo sa Portugal, Gresya, ug Italya ang mibati nga dili igo ang pag-atiman sa ilang panglawas. Ang mga serbisyo sa pag-atiman sa panglawas sa Uropa tinuod nga nabug-atan pag-ayo. Samtang nagkadaghan ang mga tigulang nga molupyo, mas daghang tawo ang adunay mga sakit nga sama sa Alzheimer. Sa laing bahin, ang mga opisyal sa panglawas mibati nga ang mga Uropanhon angayng mag-atiman pag-ayo sa ilang panglawas. Sumala sa sulat-balita nga EUR-OP News, “ang pagdiyeta, dili-aktibo nga mga estilo sa kinabuhi ug sobrang pagkaon ug mga saturated fat maoy gipasiugda ingong peligrosong mga kaugmaran,” ug “ang gidaghanon sa sobrag timbang nga mga lalaki ug babaye . . . nag-uswag.”

Kapintasan Batok sa Anglikanong mga Pari

“Ang agresibong mga parokyano nga sakop sa tungatungang hut-ong sa katilingban mamalikas ug managmal sa mga pari sa dihang mosilaob ang ilang kasuko tungod sa mga panaglalis labot sa mga kasal ug bunyag,” nag-ingon ang The Sunday Telegraph sa London. Ang usa ka pagtuon nga naglangkit sa 1,300 ka membro sa klero sa habagatan-sidlakang Inglaterra nagpadayag nga sulod sa duha ka tuig, kapin sa 70 porsiyento kanila ang gibalikas, mga 12 porsiyento ang gidagmalan, ug 22 porsiyento ang gihulga nga pasipad-an. Si Dr. Jonathan Gabe, nga maoy nangulo sa panukiduki didto sa Royal Holloway College sa London University, nagbasol sa “mga parokyano nga labing menos mamalikas kon dili matuman ang ilang gusto.” Gihisgotan usab niya “ang nag-anam ka agresibo nga mga konsumedor nga mamugos sa ilang mga katungod ug ang nag-us-os nga pagtahod ug pagsalig sa publiko sa inilang mga tawo” ingong mga hinungdan sa magubtanong panggawi sa mga parokyano. Ang reaksiyon sa ubang mga diosesis mao ang pagtagana ug pagbansay diha sa mga natad sama sa pagdepensa sa kaugalingon aron matabangan ang klero sa pag-atubang sa bangis nga mga parokyano.