Gikan sa Among mga Magbabasa

Relihiyosong Paglutos Ang artikulong “Relihiyosong Paglutos sa Georgia​—Hangtod Kanus-a Matapos?” (Enero 22, 2002) nakapaamgo kanako nga kining kalibotana kanunayng mag-usab-usab. Kanunay akong mamalandong sa mga artikulong sama niini, nga mangutana sa akong kaugalingon, ‘Unsay akong gihimo sa dihang nahitabo kini? Unsa ka lig-on ang akong relasyon kang Jehova sa panahong grabeng nag-antos ang akong mga igsoon?’ Palihog pahibaloa ang atong mga igsoon nga gihigugma namo sila ug nga naapektohan kami sa ilang mga pagsulay.

K. S., Tinipong Bansa

Sa dihang akong gibasa ang pagmaltratar nga gihimo ngadto sa mga Saksi ni Jehova sa Georgia, dili gayod nako kapugngan ang akong mga luha. Ako nag-ampo sa bug-os kong kasingkasing nga si Jehova magpaluyo ug magpanalipod kanila ug magbubo sa iyang dagayang gugma diha kanila. Buot kong masayod ang akong minahal nga mga igsoon sa Georgia nga ako nagaampo alang kanila. Bisan tuod ug ako ania sa laing dapit, ako mapasalamaton kaayo tungod sa pribilehiyo nga makaalagad kang Jehova nga nahiusa uban kanila.

M. T., Japan

Matag semana sa among mga tigom akong nadungog ang mga igsoon nga nag-ampo diha sa plataporma alang sa atong mga igsoon sa Georgia, apan wala kaayo akoy impormasyon kon unsay nagakahitabo didto. Wala gayod ako magdahom nga ang mapintas nga mga buhat sama sa gihisgotan niining artikuloha nagakahitabo diay. Pahibaloa sila nga ang ilang mga igsoon sa tibuok kalibotan nagaampo alang kanila. Sila nakadasig pag-ayo kanamong tanan nga nagaatubang ug mas gagmayng mga problema kon itandi kanila.

V. P., Tinipong Bansa

Ang pagtuo niining mga igsoona nakatandog pag-ayo kanako, ug nakahilak ako tungod sa ilang pag-antos. Sila nagpakita ug kaisog, kalig-on, ug dakong pagsalig kang Jehova. Malipay ako kon mahibalo sila nga ako misimpatiya kanila, gimahal ko sila, ug akong hinumdoman sila diha sa akong mga pag-ampo.

F. F., Italya

Okulto Mapasalamaton kaayo ako tungod sa artikulong “Mga Batan-on Nangutana . . . Pag-apil-apil sa Okulto​—Unsa ang Kapeligrohan?” (Enero 22, 2002) Kining artikuloha nakahatag kanakog kaisog sa pagwagtang sa bug-os sa usa ka kaduhaduhaang butang. Natukbil gayod ang akong kasingkasing sa pagbasa ug dugang bahin sa panig-ingnan diha sa Bibliya niadtong mga taga-Efeso nga nagsunog sa ilang espiritistikong mga basahon, bisan pag ang bili niini mikabat ug 50,000 ka pirasong pilak. (Buhat 19:19) Ang bili sa papel nga akong gilabay sa basurahan dili ikatandi sa bili sa mga butang nga ihatag ni Jehova kanako. Salamat sa pagpatik ug mga artikulong sama niini sa hustong panahon.

A. N., Japan

Nabawtismohan ako sa miaging bulan. Sa wala pa makakat-on bahin sa Bibliya, ako nag-apil-apil kanunay sa espiritismo pinaagi sa akong inahan nga dili Saksi ni Jehova. Ang artikulo miabot sa hustong panahon. Karon ako nahibalo na kon unsay akong bantayan, ug akong gibutang ang akong bug-os nga pagsalig kang Jehova. Human mabasa kining artikuloha sa makadaghan ug nagpunayg hisgot niini uban sa usa ka Kristohanong igsoong babaye, anam-anam nga nawala ang akong kahadlok.

A. P., Alemanya

Gikan sa Usa ka Magtutudlo Ingong usa ka magtutudlo sa elementarya, buot kong pahalipayan ang mga editor sa Pagmata! Ang inyong matulon-anong magasin maoy hinungdanong tabang alang sa usa ka timbang nga edukasyon. Kami sa akong kaubang mga magtutudlo naggamit sa ekselenteng mga artikulo ingong pasikaranan sa mga panaghisgot sa klase bahin sa moral nga mga prinsipyo ug katilingbanong mga isyu. Ang Pagmata! nagtabang sa pag-umol sa pagkatawo ug nagpauswag sa kalidad sa kinabuhi sa among mga estudyante pinaagi sa pagtabang kanila sa paghimog mga desisyon pinasikad sa tukma nga kahibalo.

F. C., Brazil