Mga Batan-on Nangutana . . .

Mga Music Video—Sa Unsang Paagi Ako Magmapilion?

nako sa ngalan sa usa ka kuwestiyonableng grupo o awit nga idispley, ibalhin dayon nako ang channel.”​—Casey.

MGA music video​—nakita sa daghang batan-on nga kini makalingaw kaayo. Apan sama sa gipakita sa unang artikulo bahin niining ulohana, daghang music video adunay ngil-ad nga mga paghulagway sa seksuwal nga imoralidad ug kapintasan. * Siyempre, sa dihang ang bisan unsang matang sa kalingawan magpasiugda na gani sa mga butang nga gidili sa Diyos, ang usa ka Kristohanon kinahanglang dili motan-aw niana. Apan, dili tanang music video sobra ka imoral. Ang uban medyo maayo ra man. Ang uban tingali dili man daotan gyod kaayo. Apan, ang maong mga video mahimong mopasa ug malinglahon nga mga mensahe nga supak sa Pulong sa Diyos.

Kon ang imong mga ginikanan mouyon nga ikaw motan-aw ug mga music video, kinahanglang magmapilion ka ug gamita ang imong nabansay-sa-Bibliya nga “mga gahom sa pagsabot” aron imong maila kon unsay maayo ug dili-maayong tan-awon. (Hebreohanon 5:14) Unsang mga prinsipyo sa Bibliya ang makatabang nimo niining bahina? Ang mosunod maoy pipila ka teksto sa Bibliya ug mga komento nga makatabang kanimo.

Proverbio 4:​23: “Labaw sa tanan nga pagabantayan, ampingi ang imong kasingkasing, kay niana nagagikan ang mga tuboran sa kinabuhi.” May kaugalingon ka bang kahimanan sa esports o instrumento sa musika nga bililhon kanimo? Seguradong giampingan nimo kinig maayo ug gitipigan sa luwas nga dapit. Dili gayod nimo kini ibutang sa dalan ug unya biyaan lamang, bisan sa makadiyot, sa kahadlok nga basin kini maguba o kawaton. Oo, imo kining bantayan. Sa samang paagi, kinahanglang mohukom ka sa pagbantay sa imong kasingkasing, bisan sa makadiyot dili nimo kini ipameligro pinaagi sa pagladlad niini sa law-ay nga kalingawan.

Efeso 2:​1, 2: “Kamo mao ang gibuhi sa Diyos bisan pag kamo mga patay diha sa inyong kalapasan ug mga sala, nga diha niana kamo kaniadto milakaw uyon sa sistema sa mga butang niining kalibotana, uyon sa magmamando sa awtoridad sa hangin, ang espiritu nga nagalihok karon diha sa mga anak sa pagkadili-masinugtanon.” Ang hangin mao ang espiritu sa kalibotan, ang panghunahuna ug mga tinamdan nga nagpalambo sa dili-diyosnong pamatasan. Kining espirituha gibanaag diha sa daghang music video ug nahasupak pag-ayo sa espiritu sa Diyos, nga maoy magpatungha sa mga  hiyas sa kalipay, kalinaw, ug pagpugong-sa-kaugalingon.​—Galacia 5:​22, 23.

2 Timoteo 2:​22: “Kalagiw gikan sa mga tinguha nga iya sa pagkabatan-on.” Ang pagtan-aw sa seksuwal nga mga esena​—bisan daklit lamang​—makapagimok na sa tinguha. Giangkon sa daghang batan-on nga lisod malimtan ang maong mga esena; daw kanunay pa nilang balikbalikon sa paghinumdom kana. Usa ka batan-on nga ginganlag Dave, nga nakatan-awg makapukaw sa unodnong pagbati nga video, miangkon: “Human niadto, matag higayon nga makadungog ako niadtong kantaha akong mahinumdoman ang maong video.” Busa ang pagtan-aw sa maong mga video makasamot lamang sa tinguha sa imoral nga pagpakigsekso.​—1 Corinto 6:​18; Colosas 3:5.

Proverbio 13:20: “Siya nga may pakiglabot sa mga hungog mahisugamak sa kadaot.” Pangutan-a ang imong kaugalingon, ‘Dapiton ba nako sa akong balay ang mga mamumuhat sa kapintasan, espiritismo, paghuboghubog, o imoralidad?’ Ang pagpakig-uban niining mga tawhana pinaagi sa telebisyon sama ra sa pagdapit kanila sa imong balay. Ikaw ba “mahisugamak sa kadaot” sa pagbuhat sa ingon? Si Kimberly mikomento: “Nakakita na akog mga kahimtang diin ang mga babaye, panahon sa tapoktapok, manundog sa binestihan o mopukaw sa unodnong pagbati nga sinayawan nga bag-o pa nilang nakita sa video.” Nakakita ka na tingali ug sama niana. Pinaagi sa pagsundog sa mga tawong walay pagtahod sa diyosnong mga sukdanan, kining mga batan-ona nagpakita nga sila nagsugod na sa ‘pagkasugamak sa kadaot.’ Busa, likayi gayod ang bisan unsang dagway sa ‘daotang pagpakig-uban.’​—1 Corinto 15:33.

Salmo 11:5: “Si Jehova magausisa sa matarong ug sa daotan, ug si bisan kinsa nga nahigugma sa kapintasan ginadumtan gayod sa Iyang kalag.” Kon kita motan-awg video nga magpasiugdag binuang, makauulaw nga kapintasan, labing menos dili kaha kini magpaila nga kita “nahigugma sa kapintasan”?

Ang Hagit sa Pagkamapilion

Tungod kay “ang tibuok kalibotan nailalom sa gahom sa usa nga daotan,” nagkalisod ang pagpangitag kalingawan nga wala mahugawi sa panghunahuna ug mga tinamdan sa kalibotan. (1 Juan 5:19) Ang ubang mga channel sa music video basin magpakitag daghang dili maayong salida. Bisan pag ang programa dili tuman ka imoral o pintas, kasagarang kini nagpalambo gihapon sa espiritu sa kalibotan. Usa ka propesyonal nga musikero mikomento nga ang usa ka iladong channel sa music video “nahimong channel sa ‘estilo sa kinabuhi’ inay channel sa musika.”

Ang solusyon daw yano lamang: Kon dili maayo ang salida sa video, ibalhin ang channel. Ang problema lang, basin kinahanglang igmat ka usab sa pagtan-aw sa ubang mga channel sa TV. Daghang channel magpasalida ug mga programa nga tuman ka pintas o law-ay o magpasundayag sa mga tawo nga nalangkit sa imoral nga mga kahimtang. Tinuod, makapalagot ug basin makapapikal pa gani, nga samtang nagtan-aw ug salida magsige ka man usab ug pangandam nga ibalhin ang channel. Ug usahay, kini nakadaot na kanimo ayha pa kini mabalhin. Ang imoral nga mga esena natisok na sa imong hunahuna. Bisan pa niana, makaseguro ka nga si Jehova nga Diyos magpanalangin sa bisan unsang sinserong paningkamot nga imong gihimo sa pagbantay sa imong kasingkasing.​—2 Samuel 22:21.

 Duna pay ubang praktikal nga mga tikang nga lagmit mapuslanon. Si Casey, nga gihisgotan ganina, misaysay kon unsay nakatabang: “Ang ngalan sa grupo ug ulohan sa awit sagad nga idispley sa eskrin sa pagsugod sa video. Ang mga grupo sa banda adunay mga reputasyon, busa halos mahibalo ka na kon unsang grupoha o unsang mga awita ang lagmit dili maayo. Busa inigkakita nako sa ngalan sa usa ka kuwestiyonableng grupo o awit nga idispley, ibalhin dayon nako ang mga channel. Sa pagsugod pa lang.”

‘Pagsulti sa Kamatuoran Diha sa Imong Kasingkasing’

Bisan pag ikaw adunay kahibalo sa mga prinsipyo sa Bibliya, posibleng tugotan nimo ang buhat nga dili maayo. Sa unsang paagi? Pinaagi sa pagtugot sa imong kaugalingon nga pakamatarongon kini. (Santiago 1:22) Ang Bibliya nag-ingon kanato nga ang higala ni Jehova mao kadtong “nagasulti sa kamatuoran diha sa iyang kasingkasing.” (Salmo 15:2) Busa magmatinud-anon sa imong kaugalingon. Likayi ang paglimbong sa kaugalingon. Kon ikaw nagpakamatarong sa imong pagtan-aw ug kuwestiyonableng mga salida, pangutan-a ang imong kaugalingon, ‘Mouyon kaha si Jehova nga ako motan-aw niini?’ Hinumdomi, sagad ang hagit wala diha sa yanong pagkahibalo kon unsay husto o sayop, kondili anaa sa pagdesisyon nga imong buhaton kon unsay maayo! Angay nimong hunahunaon ang imong relasyon kang Jehova nga mas bililhon kay sa usa ka matang sa kalingawan.​—2 Corinto 6:​17, 18.

Sagad nga dili igo ang paghimog taphaw, malangkobong determinasyon nga mas magmapilion. Ang imong determinasyon mawala dayon kon kini huyang. Ang Bibliya nagtug-an kanato kon giunsa sa alagad sa Diyos nga si Job sa pagpaningkamot sa pagpabiling maunongon sa iyang asawa. Siya miingon: “Ako mihimog pakigsaad sa akong mga mata. Nan unsaon ko man pagtan-aw nga maibogon sa usa ka ulay?” (Job 31:1) Palandonga kana! Si Job nakigsaad, o nakigkontrata, sa iyang kaugalingon nga limitahan ang tan-awon sa iyang mga mata. Sa pagkatinuod, ikaw makahimo sa samang butang. Lig-ona ang imong determinasyon​—solemneng panaad sa imong kaugalingon​—nga dili motan-aw sa daotang mga butang. Pagbutang ug espesipikong mga limitasyon. Iampo kana. Dayon tumana ang imong panaad, isulat kana kon makatabang man ugaling. Kon magkinahanglan kag ekstrang tabang, nganong dili kana isulti sa mga tawong mas magulang kanimo nga imong gisaligan​—pananglitan, imong mga ginikanan?

Tungod sa mga kapeligrohan, ang ubang Kristohanong mga batan-on nakahukom nga dili na lang gayod motan-aw ug mga music video. Bisag unsa pay imong desisyon niini, gamita ang imong mga gahom sa pagsabot. Hupti ang hinlo nga tanlag. Pinaagi lamang sa pagpahimulos ug kalingawan nga maayo ug makapalagsik, malikayan nimo ang pagdaot sa imong kaugalingon ug usab padayong mahuptan mo ang panaghigalaay kang Jehova.

[Footnote]

[Hulagway sa panid 12]

Ang ubang mga video nga dili tuman ka imoral nagpasiugda gihapon sa makadaot nga mga ideya

[Hulagway sa panid 13]

Magmadeterminado nga ikaw dili motan-aw sa mga butang nga wala uyoni sa Diyos