Hóbennan Sa Puntra . . .

Kon Mi por Ta Selektivo ku Videoclip?

“Asina mi mira e nòmber di un banda òf kantika dudoso, mi ta kambia kanal.”—Casey.

VIDEOCLIP—hopi hóben ta gusta nan sinfin. Pero manera un artíkulo anterior den e seri aki a mustra, tin hopi videoclip ku ta presentá esenanan hopi ofensivo di inmoralidat seksual i violensia. * Klaru ku un kristian no mester wak ningun forma di entretenimentu ku ta promové loke Dios ta kondená. Sin embargo, no ta tur videoclip ta abiertamente inmoral. Algun di nan ta basta sano. Otronan kisas ta parse di no ta presentá maldat abiertamente. Pero podisé na un manera masha fini nan ta transmití ideanan di moralidat ku ta na konflikto ku e Palabra di Dios.

Si bo mayornan ta haña ku bo tin mag di wak videoclip, lo bo mester ta selektivo, es desir, bo mester skohe ku kuidou i usa bo mente entrená dor di Beibel, ya asina bo por distinguí loke ta bon òf loke no ta apropiá pa wak. (Hebreonan 5:14) Kua ta algun prinsipio di Beibel ku por yuda bo skohe? Awor ta sigui algun teksto i komentario bíbliko ku lo por ta útil pa bo.

Proverbionan 4:23: “Warda bo kurason riba tur kos, pasobra e ta e fuente di bida.” Bo tin un ekipo di hasi deporte òf un instrumènt musikal ku bo ta konsiderá balioso? Kasi sigur bo ta hasi hopi esfuerso pa ten’é den bon kondishon i na un lugá sigur. Lo bo no pon’é pafó riba kaya sin un hende pa tira bista riba dje, ni sikiera pa un ratu, pa e no wòrdu hòrtá òf dañá. Sí, bo ta proteh’é òf ward’é. Di mesun manera bo tin ku tuma un desishon ku lo protehá òf warda bo kurason. No pone bo kurason ni sikiera pa un ratu den peliger dor di ekspon’é na entretenimentu ku no ta sano.

Efesionan 2:1, 2, NW: “Ta boso Dios a hasi bibu ounke boso tabata morto den boso ofensa i pikánan, den kua boso na un tempu a kana konforme ku e sistema di kosnan di e mundu aki, konforme ku e gobernante di e outoridat di aire, e spiritu ku awor ta obra den e yunan di desobedensia.” E aire ta referí na e spiritu di mundu, e manera di pensa i e aktitutnan ku  ta promové komportashon malbado. Hopi videoclip ta reflehá e spiritu aki i e ta kompletamente kontrali na e spiritu di Dios, ku ta produsí kualidatnan manera goso, pas i dominio propio.—Galationan 5:22, 23.

2 Timoteo 2:22: “Hui pa e pashonnan di hubentut.” Wakmentu di esenanan seksual—asta si nan ta masha kòrtiku—solamente lo stimulá pashon. Hopi hóben ta atmití ku ta difísil pa nan lubidá e esenanan ei; tin biaha nan sa asta sigui ripití nan den nan mente bes tras bes. Un yònkuman ku yama Dave, kende a wak un vidio provokativo, a konfesá: “Despues di esei, kada biaha ku mi tende e kantika ei mi ta kòrda riba e videoclip.” Pues anto, si bo wak videoclipnan asina, nan por lanta deseo pa relashon seksual inmoral.—1 Korintionan 6:18; Kolosensenan 3:5.

Proverbionan 13:20: “Un kompañero di hende bobo lo sufri daño.” Puntra bo mes: ‘Lo mi invitá personanan ku ta praktiká violensia, spiritismo, buracheria òf inmoralidat den mi kas?’ Asosiashon ku personanan asina via televishon ta meskos ku invitá nan den bo kas. Di bèrdat esei lo por pone bo “sufri daño”? Kimberly a komentá lo siguiente: “Mi a mira situashonnan kaminda mucha muhénan, na un get-together, ta imitá e bistí òf manera di baila provokativo ku nan a mira resientemente den un videoclip.” Kisas bo tambe a yega di mira esei. Dor di imitá personanan ku no tin rèspèt pa e normanan di Dios, e hóbennan aki ta mustra ku ya kaba nan a kuminsá “sufri daño.” P’esei definitivamente, evitá tur forma di “mal kompania.”—1 Korintionan 15:33.

Salmo 11:5: “SEÑOR ta pone e hustu i e malbado na prueba, ma esun ku ta gusta violensia Su alma ta odia.” Si nos ta wak videoclip ku ta promové violensia degradá i sin sentido, esei lo no duna hende e impreshon ku nos “gusta violensia”?

E Reto pa Ta Selektivo

Komo ku “henter mundu ta bou di kontròl di e malbado,” ta birando mas i mas difísil pa haña entretenimentu ku no ta kontaminá ku e manera di pensa i ku e aktitutnan di mundu. (1 Juan 5:19) Algun kanal di televishon ku ta pasa videoclip so, kisas ta mustra un kantidat grandi di videoclip inaseptabel. Pero asta ora e programashon no ta abiertamente inmoral òf violento, hopi bes tòg e ta promové e spiritu di mundu. Un músiko profeshonal a komentá ku un kanal di videoclip hopi konosí, “a kambia for di un kanal di muzik bira ‘un kanal ku ta promové sierto estilo di bida.’”

E solushon por parse simpel: Si un videoclip ta malu, kambia e kanal. E problema ta ku lo bo tin ku keda mesun alerta ora bo ta wak otro kanalnan di televishon. Hopi di nan ta presentá programanan ku ta mustra violensia i indesensia seksual ku luho di detaye, òf nan ta mustra personanan den sirkunstansianan moralmente kuestionabel. Nos tin ku atmití  ku por ta iritante, kisas asta frustrante, ora bo ta purba disfrutá di poko entretenimentu i a la bes mester ta semper kla pa kambia di kanal. I tin biaha, pa ora bo a kambia e kanal, ya e daño a ser hasí kaba. Ya kuadronan mental inmoral a keda grabá den bo mente. No opstante, bo por tin sigur ku Yehova Dios lo bendishoná kualkier esfuerso sinsero ku bo ta hasi pa protehá bo kurason.—2 Samuel 22:21.

Tin otro pasonan práktiko ku por resultá útil. Casey, menshoná anteriormente, a splika kiko e ta haña ta yud’é: “Normalmente nan ta mustra e nòmber di e banda i e tema di e kantika na kuminsamentu di e videoclip. Bandanan tin nan reputashon, p’esei kasi semper bo sa kua banda i kua kantika probablemente lo ta malu. Pues asina mi mira e nòmber di un banda òf kantika dudoso, mi ta kambia e kanal. For di kuminsamentu.”

‘Papia e Bèrdat den Bo Kurason’

Asta si bo tin un bon konosementu di prinsipionan bíbliko, por sosodé ku bo ta kuminsá tolerá loke ta ofensivo. Kon? Dor di permití bo mes hustifiká loke bo ta wak. (Santiago 1:22) Beibel ta bisa nos ku Yehova su amigu ta e persona ku ta “papia bèrdat den su kurason.” (Salmo 15:2) P’esei sea onesto ku bo mes. No gaña bo mes. Si bo ripará ku bo ta hustifikando pakiko bo ta wak algu dudoso, puntra bo mes: ‘Di bèrdat Yehova lo a aprobá e kos aki ku mi ta wak?’ Kòrda, hopi bes e reto no ta simplemente sa loke ta bon òf loke ta malu, sino disidí ku lo bo hasi loke ta bon! Bo mester mira bo relashon ku Yehova komo mas presioso ku kualkier forma di entretenimentu.—2 Korintionan 6:17, 18.

Normalmente no ta sufisiente pa bo djis proponé bo mes ku en general lo bo bai ta mas selektivo. Bo determinashon por disparsé masha lihé si e no ta firme. Beibel ta konta nos kon e hòmber di Dios ku yama Jòb tabata determiná pa keda fiel na su kasá. Jòb a bisa: “Mi a sera un aliansa ku mi wowonan; kon anto mi por a wak un bírgen?” (Jòb 31:1) Imaginá bo! Jòb a sera un aliansa, un kontrakt serio, ku su mes pa limitá loke lo e permití su wowonan wak. Eigenlijk, bo por hasi e mesun kos. Determiná firmemente—hasi un promesa serio na bo mes—ku lo bo no wak kos ku ta malu. Pone límitenan spesífiko. Hasi orashon tokante e asuntu. Anto kumpli ku bo akuerdo. Bo por asta pon’é riba papel, si esei ta yuda. Si bo tin mester di un tiki mas apoyo, dikon bo no ta papia e asuntu ku un hende grandi ku bo ta konfia, por ehèmpel bo mayornan?

Tin algun hóben kristian ku, en bista di e peligernan, a disidí ku gewon nan no ta wak ningun videoclip mas. Sea kual sea bo desishon den e asuntu aki, usa bo mente pa bo distinguí. Mantené un konsenshi limpi. Dor di disfrutá solamente di entretenimentu ku ta sano i refreskante, bo por evitá di perhudiká bo mes i tambe lo bo keda ku bo amistat ku Yehova.

[Nota]

[Plachi na página 12]

Algun videoclip ku no ta abiertamente inmoral, tòg ta promové ideanan perhudisial

[Plachi na página 13]

Sea determiná pa no wak kosnan ku Dios ta desaprobá