Ang Hunahuna sa Bibliya

Unsa ang Materyalismo?

ANG mga tawo natawo nga may kinaiyanhong hilig sa espirituwal ug panginahanglan sa pagsimba sa Diyos. Bisan pa niana, ang tawo gilalang gikan sa materyal nga mga elemento ug may materyal nga mga panginahanglan ug kapasidad sa pagkalipay sa materyal nga mga butang. Ang pipila ka Kristohanon daghag materyal nga mga bahandi. Kini ba mismo pamatuod sa materyalismo ug kakulang sa espirituwalidad? Sa pagtandi, ang mga tawong kabos mas lagmit ba nga mahimong dili materyalistiko ug mas lagmit magmahiligon sa espirituwal?

Lagmit mouyon ka nga daghan pa ang nalangkit sa materyalismo kay sa yanong pagbaton lamang ug bahandi o mga kabtangan. Tagda ang mosunod nga mga pananglitan sa Bibliya kon unsa ba gayoy materyalismo ug kon unsaon paglikay sa mga kapeligrohan nga ipahinabo niini sa atong espirituwalidad.

Sila May Bahandi ug Himaya

Taliwala sa matinumanong mga alagad sa Diyos sa mga panahon sa Bibliya may pipila ka tawo nga may bahandi ug himaya. Pananglitan, si Abraham “daghan kaayog panon sa mga hayop ug plata ug bulawan.” (Genesis 13:2) Si Job gibantog ingong “ang labing bantogan sa tanan nga taga-Sidlakan” tungod sa iyang daghang binuhing mga hayop ug mga alagad. (Job 1:3) Ang mga hari sa Israel, sama kang David ug Solomon, nakapanag-iyag dakong bahandi.​—1 Cronicas 29:​1-5; 2 Cronicas 1:​11, 12; Ecclesiastes 2:​4-9.

Ang bahandianong mga Kristohanon maoy bahin sa kongregasyon sa unang siglo. (1 Timoteo 6:17) Si Lydia gitawag ug “tigbaligyag purpura, sa siyudad sa Tiatira ug usa ka magsisimba sa Diyos.” (Buhat 16:14) Mahal ang tina nga purpura ug ang mga besti nga gitina niini ug sagad nga gitagana lamang kini sa mga tawong tag-as ug katungdanan o bahandianon. Busa, si Lydia lagmit nga may daghang bahandi usab.

Sa katugbang, ang pipila ka matinumanong mga magsisimba ni Jehova sa mga panahon sa Bibliya maoy kabos kaayo. Ang kinaiyanhong mga katalagman, mga aksidente, ug mga kamatayon nagnudnod sa pipila ka pamilya sa kakabos. (Ecclesiastes 9:​11, 12) Pagkalisod gayod alang sa mga tawong kabos nga makakita sa ubang mga tawo nga nagpahimulos sa bahandi o materyal nga mga kabtangan! Bisan pa niana, sayop gayod kon ilang hukman ang mga tawong dato ingong materyalistiko o maghinapos nga ang mga kabos nag-alagad sa Diyos nga mas bug-os. Ngano? Tagda kon unsay lintunganayng hinungdan sa materyalismo.

Ang Gugma sa Salapi

Usa ka diksiyonaryo nagbatbat sa materyalismo ingong “pagkapuliki o pagpasiugda sa materyal inay sa intelektuwal o espirituwal nga mga butang.” Busa, ang lintunganayng hinungdan sa materyalismo mao ang atong mga tinguha, mga prioridad, ug mga butang nga gisentro sa atong kinabuhi. Kini tin-aw nga gipasiugda sa mosunod nga duha ka pananglitan sa Bibliya.

 Si Jehova puwersadong nagtambag kang Baruk, nga maoy sekretaryo ni propetang Jeremias. Lagmit kabos si Baruk tungod sa mga kahimtang sa Jerusalem ug sa iyang pagpakig-uban sa di-iladong si Jeremias. Bisan pa niana, si Jehova miingon: “Bahin kanimo, ikaw nagpadayon sa pagtinguha ug dagkong mga butang alang sa imong kaugalingon. Ayaw pagpadayon sa pagtinguha.” Basin nagsugod na sa pagkamateryalistiko si Baruk, nga nagkapuliki na bahin sa bahandi o materyal nga kasegurohan sa uban. Gipahinumdoman ni Jehova si Baruk nga Iyang luwason siya gikan sa umaabot nga kalaglagan sa Jerusalem apan dili Niya salbaron ang iyang mga kabtangan.​—Jeremias 45:​4, 5.

Si Jesus naghatag ug ilustrasyon bahin sa usa ka tawo nga napuliki usab sa materyal nga mga butang. Mao ray giatiman niining tawhana ang iyang mga bahandi inay gamiton ang iyang kabtangan sa pagpalapad sa iyang pag-alagad sa Diyos. Ang tawong dato miingon: “Akong gub-on ang akong mga balay-tipiganan ug tukoron ang mas dagko, . . . ug ako moingon sa akong kalag: ‘Kalag, aduna kay daghang maayong mga butang nga natigom alang sa daghang katuigan; pagpahayahay, kaon, inom, paglipaylipay.’” Dayon si Jesus miingon: “Apan ang Diyos miingon kaniya, ‘Ikaw nga walay buot, karong gabhiona ilang pangayoon nga mapugsanon ang imong kalag gikan kanimo. Nan, kinsa ang magapanag-iya sa mga butang nga imong gitigom?’ Ingon usab niana ang tawo nga magatigom ug bahandi alang sa iyang kaugalingon apan dili dato ngadto sa Diyos.”​—Lucas 12:16-21.

Unsay ipasabot niining duha ka asoy? Kini motabang kanato sa pagsabot nga ang usa ka tawo maoy materyalistiko, dili tungod sa kadaghan sa iyang kabtangan, kondili sa pag-una sa materyal nga mga butang. Si apostol Pablo miingon: “Sila nga determinadong madato mangahulog sa tentasyon ug sa lit-ag ug sa daghang binuang ug makadaot nga mga tinguha, nga nagbanlod sa mga tawo sa kalaglagan ug sa kadaotan. Kay ang gugma sa salapi maoy gamot sa tanang matang sa makadaot nga mga butang, ug tungod sa pagpangab-ot niini nga gugma ang pipila nahisalaag gikan sa pagtuo ug nagtusaktusak sa ilang kaugalingon sa daghang kasakitan.” (1 Timoteo 6:​9, 10) Ang paningkamot nga mahimong dato ug ang gugma sa materyal nga mga butang maoy makaingon sa mga problema.

Kinahanglan ang Pagsusi sa Kaugalingon

Ang mga Kristohanon mabinantayon nga dili malit-agan sa materyalismo bisan unsa pay ilang kahimtang sa panginabuhi. Ang gahom sa bahandi malimbongon ug makatuok sa espirituwalidad. (Mateo 13:22) Kon atong unahon ang materyal inay ang espirituwal nga mga butang kita maapektahan niini nga dili kita makamatikod, uban ang makapasubong mga sangpotanan.​—Proverbio 28:20; Ecclesiastes 5:10.

Busa, maayong susihon sa mga Kristohanon ang ilang mga prioridad ug ang gisentro sa ilang kinabuhi. Bisan kon ang usa ka tawo adunay diyutay o daghang materyal, ang mga tawo nga mahunahunaon sa espirituwal maningkamot pagsunod sa tambag ni Pablo nga isalig ang ilang paglaom ‘dili sa walay-kasegurohang bahandi, kondili sa Diyos, nga dagayang naghatag kanato sa tanang butang aron kita malipay.’​—1 Timoteo 6:17-19.