Kon Mi Set Spiritual A Ser Sasiá

SEGUN E RELATO DI LUCIA MOUSSANETT

SITUÁ den e serunan di e skina nortwèst di Italia, serka di Alpen di Suisa i pegá ku e famoso Mont Blanc di Fransia, bo ta haña e region di Valle d’Aosta. Ei mi a nase na 1941 den e komunidat chikí di Challant St. Anselme.

Mi tabata yu mayó, i mi kuater otro rumannan tabata mucha hòmber. Mama tabata un muhé trahadó i un katóliko deboto. Tata tambe a bini di un famia religioso. Dos di su ruman muhénan tabata sùr. Mi mayornan a hasi hopi sakrifisio material pa mi, i asta a sòru pa mi por a haña un edukashon. Den nos komunidat chikí no tabatin skol, p’esei ora mi tabatin 11 aña mi mayornan a manda mi un internat dirigí dor di sùr.

Einan mi a siña latin i franses, i tambe otro vak. Anto ora mi a hasi 15 aña, mi a kuminsá pensa seriamente riba kon mi ta bai sirbi Dios. Mi a rasoná ku e mihó manera pa sirbié lo ta di drenta un kombento. Pero, mi mayornan no a gusta e idea aki, ya ku ta Mama so lo mester a keda kuida mi ruman hòmbernan. Mi mayornan a spera ku mi edukashon lo a yuda mi haña un bon trabou i asina lo mi a yuda mi famia finansieramente.

Ounke e reakshon di mi mayornan a duel mi, mi tabata ke tin un berdadero propósito den  bida i mi a sinti ku Dios mester ta na promé lugá. P’esei na 1961, mi a drenta un kombento katóliko romano.

Mi Bida di Sùr

E promé lunanan mi a studia e norma- i reglanan di iglesia i a hasi trabou manual den e kombento. Na ougùstùs 1961 mi a kuminsá mi novisiado, es desir e periodo di siña, i a kuminsá bisti e paña típiko di sùr. Tambe mi a proponé nan pa mi duna mi mes un nòmber nobo, Ines, nòmber di mi mama. Ora nan a asept’é, mi a bira konosí komo Sùr Ines.

Ounke mayoria novisia ta traha den kombento, mi tabatin sufisiente edukashon pa traha komo maestra di skol básiko. Dos aña despues, na ougùstùs 1963, mi a hasi mi votonan i a bira sùr den e órden di Sùrnan di San Giuseppe na Aosta, Italia. Mas despues e kombento a finansiá mi edukashon adishonal dor di mandá mi na e Universidat di Maria Santissima Assunta na Roma.

Ora mi a regresá Aosta na 1967, despues di a kaba mi estudio na Roma, mi a kuminsá duna lès na un skol sekundario. Na 1976, nan a ofresé mi e puesto di kabes di skol. Ounke ainda mi tabata duna algun lès, mi a wòrdu enkargá ku atministrashon di e skol i a bira miembro di direktiva di skol di e region di Valle d’Aosta.

Mi berdadero deseo tabata di yuda hende pober. Mi tabata sinti masha hopi pa nan. P’esei mi a organisá vários programa sosial, entre otro, un programa pa yuda hende sin famia ku tabatin un malesa mortal. Tambe mi a kuminsá un programa pa duna lès na yunan di imigrante. Fuera di esei, mi tabata buska trabou i kas pa hende pober i a yuda perkurá asistensia médiko pa esnan den nesesidat. Mi a purba hiba mi bida na armonia ku e prinsipionan religioso di iglesia.

E tempu ei mi a aseptá teologia katóliko, inkluso e siñansanan di iglesia manera Trinidat, alma inmortal i e punto di bista katóliko tokante hende su futuro eterno. Ya pa e tempu ei, teologia katóliko tabata permití tambe puntonan di bista manera por ehèmpel ku por tin mas ku un religion, lokual a nifiká aseptá otro religion i eksistí huntu ku nan.

Kosnan Ku A Kuminsá Molestiá Mi

Sin embargo, algun kos den Iglesia Katóliko a molestiá mi. Por ehèmpel, promé ku boutismo i konfirmashon, mayornan i yunan supuestamente mester studia kiko e pasonan aki ta nifiká. Sin embargo, mayoria di nan nunka no tabata bin lès, i otronan no a hasi un esfuerso pa studia. Ademas, tabatin hende ku ora un parokia no aseptá pa batisá i konfirmá nan, nan a simplemente bai un otro parokia pa batisá òf konfirmá einan. Pa mi, esei tabata un kos superfisial i hipókrita.

Tin biaha mi tabata puntra mi mes i otro sùrnan: “Nos no mester ta predikando e Evangelio en bes di dediká nos mes na tur tipo di otro aktividat?” Nan tabata kontestá mi: “Nos ta prediká dor di hasi bon obra.”

Ademas, tabata difísil pa mi kere ku mi mester bai konfesá mi pikánan serka un pastor. Mi a rasoná ku mi mes mester por papia ku Dios tokante tal asuntunan personal. Ademas, e idea di siña orashon for di kabes i keda ripití nan, tabata difísil pa mi aseptá. Tambe tabata duru pa mi kere ku papa ta infalibel. Na dado momentu, mi a disidí ku lo mi tin mi propio kreensianan tokante e asuntunan ei i ku lo mi djis sigui kumpli ku mi bida religioso.

Set pa Konosementu Bíbliko

Semper mi tabatin un rèspèt profundo pa Beibel i e deseo di konos’é. Ki ora ku mi tabatin ku tuma un desishon òf ku mi a sinti ku mi mester di Dios su sosten, mi a lesa Beibel. Ounke nunka nos no a studi’é den kombento, mi a les’é riba mi mes. E relato di Isaias 43:10-12, kaminda Yehova Dios ta bisa: “Boso ta mi testigunan,” semper a impreshoná mi. Sin embargo, n’e tempu ei mi no a komprondé e pleno nifikashon di e palabranan ei.

Tempu ku mi a bai universidat na Roma den dékada di 1960, mi a sigui un kurso di kuater aña den teologia, patrosiná dor di Vatikano. Pero Beibel no tabata un di e bukinan di instrukshon. Despues ku mi a regresá Aosta, mi  a asistí na hopi konferensia ekuméniko, asta na esnan patrosiná pa organisashonnan ku no tabata katóliko i tambe di esnan ku a konsistí di vários denominashon. Esei a duna mi mas gana di konosé e siñansanan di Beibel. Tabatin muchu hopi konfushon entre gruponan ku a pretendé di ta siña tokante e mesun Beibel!

Siñando Mas Tokante Beibel

Na 1982, un Testigu di Yehova a bishitá e sentro kaminda mi tabata hasi trabou sosial i a purba kuminsá un kòmbersashon tokante Beibel ku mi. Ounke mi tabata hopi drùk, mi a gusta e idea di siña tokante Beibel. P’esei mi di: “Pasa serka mi na mi skol, i ora mi tin un ora liber nos por papia.”

Ounke e señora a pasa, mi no tabatin niun “ora liber” den mi programa. Nèt den e tempu ei mi mama a haña sa ku e tin kanser, p’esei poko dia despues mi a tuma verlòf pa yud’é. Despues di su morto na aprel 1983, mi a bolbe bèk na trabou, pero pa e tempu ei e Testigu a pèrdè kontakto ku mi. Pero djis despues, un otro mucha muhé Testigu di binti piku aña a pasa pa papia tokante Beibel. Den e dianan ei mi tabata lesa e buki bíbliko di Revelashon riba mi mes, p’esei mi a puntr’é: “Ken ta e 144.000 menshoná aki na Revelashon kapítulo 14?”

Mi a siña ku tur bon hende ta bai shelu, i p’esei mi no por a komprondé dikon aparentemente e 144.000 aki ta ser separá for di e otronan den shelu. Mi tabata puntra mi mes: ‘Ta ken e 144.000 aki ta? Kiko nan ta hasi?’ E preguntanan aki a keda bai-bini den mi mente. E Testigu a sigui purba di haña mi, pero mi tabata asina okupá ku nunka e no a logra.

Ku tempu, e Testigu a duna Marco (un ansiano den su kongregashon) mi adrès. Finalmente, na febrüari 1985, Marco a topa mi. Komo ku mi tabata drùk nos a papia solamente un par di minüt, pero nos a traha un sita. Despues Marco ku su kasá Lina, a kuminsá bishitá mi regularmente, i a yuda mi komprondé Beibel. Den poko tempu mi por a mira ku siñansanan katóliko básiko manera Trinidat, alma inmortal i fièrnu di kandela klaramente no tabata basá riba Beibel.

Asosiashon ku e Testigunan

Ora mi a bai un reunion di Testigunan di Yehova na nan Salòn di Reino, tabata bisto ku kosnan tabata hopi otro for di Iglesia Katóliko. Tur hende, no solamente un kor, a kanta i partisipá den e reunion mes. Tambe mi a kuminsá mira ku henter e organisashon tabata konsistí di “ruman.” Di bèrdat nan tabata interesá den otro. E kosnan aki a impreshoná mi.

Durante e tempu ei, mi tabata asistí na e reunionnan den mi paña di sùr. Mi por a mira ku algun di nan a keda impreshoná pa mira un sùr na Salòn di Reino. Mi a sinti e mesun goso i satisfakshon ku bo ta sinti ora bo ta rondoná pa e amor di un famia grandi. Tambe, segun ku mi a studia, mi a kuminsá mira ku hopi di e prinsipionan riba kua mi a basa mi bida no tabata na armonia ku e Palabra di Dios. Por ehèmpel, Beibel no ta bisa ku sirbidónan di Dios mester bisti paña spesial. E sistema di puesto i rango den Iglesia i e splendor seremonial tabata basta diferente for di loke Beibel ta bisa tokante ansianonan humilde ku ta hiba delantera den e kongregashon.

Mi a sinti komo si fuera mi tabata senk, manera kos ku mi no tin tera firme bou di mi pia. A parse imposibel ku pa 24 aña mi a biba den kreensianan robes. Sin embargo, mi a rekonosé bon kla ku esaki tabata e bèrdat. Mi tabatin miedu di pensa ku na edat di 44 aña, mi mester a kuminsá mi bida di nobo. Pero kon lo mi por a sigui kana ku wowo será awor ku mi a mira kiko Beibel realmente ta siña?

Un Desishon Krusial

Mi tabata sa ku si mi bandoná e kombento, esei lo a nifiká ku lo mi keda sin niun rekurso material. Sin embargo, mi a kòrda e palabranan di David ku ta bisa ku ‘nunka e hustu lo keda desampará ni su desendientenan lo tin ku kana pidi pan.’ (Salmo 37:25) Mi tabata sa ku lo mi pèrdè un sierto grado di komodidat i siguridat material, pero mi a pone mi konfiansa den Dios i a rasoná: ‘Di kiko mi mester tin miedu?’

Mi famia a pensa ku mi a bira loko. Ounke esei a molestiá mi, mi a kòrda e palabranan di  Hesus: “Esun ku stima tata òf mama mas ku mi, no ta digno di mi.” (Mateo 10:37) Na mesun tempu, gestonan simpel di e Testigunan a enkurashá mi i fortalesé mi. Ora mi tabata kana riba kaya den mi paña di sùr, nan tabata hasi sigur di bin kumindá mi. Esaki a laga mi sinti asta mas serka di e hermandat i komo parti di nan famia.

Finalmente mi a bai serka e madre superiora i a splik’é dikon mi a disidí di bandoná e kombento. Ounke mi a ofresé pa mustr’é den Beibel dikon mi a tuma e desishon aki, el a nenga di skucha, bisando: “Si mi kier komprondé kualkier kos den Beibel, mi por yama un eksperto di Beibel!”

Iglesia Katóliko a keda di shòk pa mi desishon. Nan a akusá mi di ta inmoral i di a bira loko. Sin embargo, hende ku tabata konosé mi tabata sa ku e akusashonnan ei ta falsu. Hende ku mi tabata traha kuné a reakshoná den diferente manera. Tin di nan a konsiderá loke mi ta hasi komo un akto di kurashi. Otronan a sinti pena, pensando ku mi ta bai den un kaminda robes. Algun di nan asta tabatin masha duele di mi.

Dia 4 di yüli 1985, mi a bandoná Iglesia Katóliko. Sabiendo kon otro personanan ku a tuma e desishon ei a ser tratá, e Testigunan tabata teme pa mi siguridat i a skonde mi pa mas o ménos un luna. Nan tabata bin buska mi pa bai reunion i despues tabata hiba mi bèk kaminda mi tabata biba. Mi a keda for di bista te ora ku kos a plakia. Anto, dia 1 di ougùstùs 1985 mi a kuminsá sali den sirbishi ku e Testigunan di Yehova.

Ora mi a asistí na un Kongreso di Distrito di Testigunan di Yehova mas lat den ougùstùs, medionan di komunikashon a haña sa ku mi a bandoná iglesia i a publiká e relato. Ora ku mi a batisá dia 14 di desèmber 1985, e televishon i korant lokal a haña esei asina skandaloso ku nan a bolbe publiká e relato, hasiendo sigur ku tur hende sa kiko mi a hasi.

Ora mi a bandoná e kombento, mi tabata blo bashí. Mi no tabatin trabou, ni kas ni penshon. P’esei pa mas o ménos un aña, mi a traha  kuidando un persona paralisá. Na yüli 1986, mi a bira un pionero, manera Testigunan di Yehova ta yama nan predikadónan di tempu kompletu. Mi a muda bai un área kaminda tabatin un kongregashon chikí ku a kaba di ser formá. Einan mi tabata duna lès privá di idioma i otro lès mas, probechando asina di mi edukashon. Esaki a duna mi chèns di tin un programa fleksibel.

Sirbiendo den Teritorio Stranhero

Awor ku mi a siña e bèrdat di Beibel, mi kier a kompartié ku mas tantu hende posibel. Komo ku mi por a papia franses, mi a pensa di bai sirbi den un pais afrikano kaminda nan ta papia franses. Pero na 1992, Testigunan di Yehova a haña rekonosementu legal den e pais bisiña Albania. Na fin di e aña ei, un grupo chikí di pionero di Italia a ser asigná pa bai prediká einan. Entre e pioneronan ei tabatin Mario i Cristina Fazio di mi kongregashon. Nan a invitá mi pa bishitá nan i pa pensa riba e posibilidat di sirbi na Albania. P’esei despues di a evaluá esei kuidadosamente i hasi orashon, mi a bandoná na edat di 52 aña e siguridat relativo di mi pais pa bai den un mundu kompletamente diferente.

Esei a tuma lugá na mart 1993. Ora mi a yega Albania mi a ripará mesora ku maske geográfikamente mi no tabata muchu leu for di mi pais natal, tòg mi tabata den un otro mundu. E hendenan tabata bai tur kaminda na pia, i nan tabata papia albanes, un idioma kompletamente inkomprendibel pa mi. E pais tabata pasando dor di kambionan grandi, bayendo di un sistema polítiko pa un otro. Sin embargo, e hendenan tabatin hopi set pa e bèrdat di Beibel, i nan tabata gusta lesa i studia. Studiantenan di Beibel tabata hasi progreso spiritual masha lihé mes, i esei a hasi mi kurason kontentu, i a yuda mi ahustá na e ambiente nobo aki.

Ora mi a yega Tiranë, e siudat kapital, na 1993, tabatin un kongregashon so na Albania, i un poko mas ku 100 Testigu plamá rònt e pais. E luna ei, na e promé dia spesial di asamblea ku nan a tene na Tiranë, tabatin 585 persona presente i 42 a batisá. Maske mi no a komprondé nada, tabata masha konmovedor pa tende e Testigunan kanta i mira nan paga asina bon tinu. Na aprel tabatin selebrashon di e konmemorashon òf Memorial di e morto di Hesukristu, i 1.318 persona a asistí! For di e tempu ei padilanti e aktividat kristian a prosperá na Albania.

Mi tabatin kustumber di para wak e stat di Tiranë for di mi balkon na di kuater piso i puntra mi mes: ‘Ki dia nos lo logra prediká na tur e hendenan aki?’ Yehova Dios a sòru pa esei. Awor tin 23 kongregashon di Testigunan di Yehova na Tiranë. Den henter e pais tin 68 kongregashon i un 22 grupo, pa un total di 2.846 Testigu. Tur e kresementu aki a tuma lugá den solamente un par di aña! I nos tabatin 12.795 hende na e Memorial di aña 2002!

Durante e dies añanan aki na Albania, mi tabatin e gran privilegio di yuda por lo ménos 40 persona yega te na boutismo. Vários di nan ta sirbi awor komo pionero i den otro rasgonan di sirbishi di tempu kompletu. Atraves di añanan, nan a asigná seis grupo di pionero italiano pa yuda ku e predikashon na Albania. Pa kada grupo nan a prepará un kurso di tres luna pa siña e idioma, i mi a haña e invitashon pa duna e kuater último kursonan.

Na prinsipio ora mi amistatnan a tende tokante mi desishon pa bandoná iglesia, nan reakshon tabata sumamente dramátiko. Pero despues di tur e añanan aki, nan aktitut a suavisá ora nan a mira ku mi ta na pas i tin un bida kalmu. Felismente, mi famia ta apoyá mi muchu mas tantu awor, inkluso un tanta di 93 aña ku ainda ta sùr.

For di dia ku mi a konosé Yehova, el a kuida mi bon i a yuda mi pasa dor di hopi diferente sirkunstansia! El a dirigí mi pasonan na su organisashon. Ora mi wak bèk riba mi pasado, mi ta kòrda kon mi tabata anhelá di por yuda e pobernan, esnan ménos privilegiá i esnan den nesesidat. Tambe mi a deseá di por a dediká mi kompletamente den sirbishi na Dios. P’esei mi ta gradisí Yehova, pasobra el a sòru pa mi set spiritual wòrdu sasiá.

[Plachi na página 21]

Un famia albanes ku mi a studia Beibel kuné. Diesun di nan a batisá

[Plachi na página 21]

Mayoria di e señoranan aki ku mi a studia Beibel kuné na Albania, awor ta den sirbishi di tempu kompletu