Gikan sa Among mga Magbabasa

Gidayeg ang Pagmata! Dalayegon kaayo kamo sa inyong pagpatik sa Pagmata! Gihatagan ninyog paglaom ang katawhan. Ang akong unang duha ka kopya sa Pagmata! gihatag kanako sa akong silingan sa dihang namatay ang akong bana. Naguol gayod ako pag-ayo ug dili gustong makakitag tawo. Apan human nako mabasa ang inyong mga magasin, ako mikalma ug nakaamgo nga dili kini mao ang kataposan sa akong kinabuhi. Sa ulahi, ang akong anak nga babaye nagdala kanakog duha pa ka gula, nga gihatag kaniya sa usa ka nars samtang didto siya sa ospital. Dayon gihatagan akog pipila ka kopya diha sa dalan sa mga Saksi sa among dapit. Pipila lang ka kopya sa Pagmata! ang akong nabatonan apan gisublisubli ko kini pagbasa sa dihang maguol ako. Gitudloan niini ang mga tawo kon unsay maayo ug gitabangan sila nga makasabot sa katarongan kon nganong ingon niana ang atong panggawi.

I.Y.A., Rusya

Mga Kahuyangan Salamat sa inyong pagsulat sa artikulong “Ang Hunahuna sa Bibliya: Palabyon ba sa Diyos ang Atong mga Kahuyangan?” (Nobyembre 8, 2002) Sa walay duhaduha, kini mao ang labing maayong tabang nga akong nadawat. Dako kaayo kining tabang sa pagsabot kon giunsa paglantaw sa Diyos ang atong mga kahuyangan.

E. C., Tinipong Bansa

Nag-ampo ako kang Jehova bahin sa usa ka personal nga problema ug naglaom alang sa tubag. Ug unya gipatik ninyo kining artikuloha. Sa dihang nahuman na nako kinig basa, nag-ampo ko agig pasalamat.

M. S., Japan

Mga Keyboard Kinahanglan kong magsulat ug mubong sulat sa pagpasalamat sa artikulo bahin sa mga keyboard sa piano nga nag-ulohang “Makaila Ka ba sa Kalainan?” (Nobyembre 8, 2002) Ganahan gyod ko ug musika​—ilabina sa piano. Ug gusto kong makat-onan ang pipila sa mga awit nga gikanta nato diha sa Kingdom Hall. Busa sulayan nako pagkat-on kini ug sugdan nakog praktis ang synthesizer nga anaa sa suok sa akong lawak sulod sa dugay nang katuigan.

V. T., Tinipong Bansa

Ingong usa ka tigtugtog ug clarinet ug mahiligon sa musika, gusto kong suhiron ang kalibotan sa musika maylabot sa keyboard. Unom ka tuig kanhi, gisugdan nako ang pagtuon ug piano, nga dili gayod unta maarangan sa pinansiyal kon wala pa gamita ang digital nga piano. Gisundog niini ang tingog sa piano ug sa harpsichord.

S. T., Scotland

Nagtuon akog musika sa eskuylahan. Duna akoy diyutayng nakat-onan bahin sa mga instrumento nga dunay keyboard, apan wala nako masabti kon giunsa kini paghimo o kon unsay mga kalidad niini. Kining artikuloha, uban sa daling masabtan nga mga pagpatin-aw ug makalingaw nga mga hulagway niini, nakatabang kanako sa pagpauswag sa akong pagsabot bahin sa maong ulohan. Daghan kaayong salamat.

A. M., Japan

Crazy Horse Salamat sa artikulong “Crazy Horse​—Usa ka Bukid nga Gihimong Monyumento.” (Nobyembre 8, 2002) Miabot gayod kini sa panahon nga ako nag-andam ug usa ka taho alang sa eskuylahan bahin sa Sioux ug Cheyenne ug kon sa unsang paagi sila nagkinabuhi. Gidayeg sa magtutudlo ang akong taho! Salamat.

F. V., Tinipong Bansa

Panagkita Pag-usab Mao pay pagkahuman nakog basa sa artikulong “Talagsaong Panagkita Pag-usab Human sa 30 ka Tuig.” (Oktubre 22, 2002) Hilabihan ang gibati nakong pagpasalamat, kalipay, ug kaguol. Nalipay ako kang Mark Ruge ug Dennis Sheets, kinsa nakatultol sa dalan paingon kang Jehova. Apan, naguol ako nga ang pipila sa akong lima ka anak wala pa makatultol sa hustong dalan, bisan pag gimatuto sila ingong mga Kristohanon. Malikayan unta nila ang dakong kasakit kon natultolan lang nila ang dalan paingon sa Diyos! Kanunay kong giampo nga sa ngadtongadto matultolan ra nila kana. Salamat sa maong artikulo. Natagbaw niini ang tinuod nga panginahanglan.

M. O., Tinipong Bansa