Manipud Kadagiti Agbasbasa

Naidayaw ti Agriingkayo! Nagsayaat ti ar-aramidenyo a panangipablaak iti Agriingkayo! Ik-ikkanyo iti namnama dagiti tattao. Ti immuna a dua a kopiak ti Agriingkayo! ket inted ti maysa a kaarrubak idi natay ni lakayko. Malmaldayak idi ken diak kayat a makita ti asinoman. Ngem kalpasan a binasak dagiti magasinyo, kimmalmaak ket naamirisko a saan a daytoy ti paggibusan ti biagko. Idi agangay, inikkannak ti balasangko iti dua pay nga edision, nga inted kenkuana ti maysa a nars bayat ti kaaddana idiay ospital. Kalpasanna, idi addaak iti kalsada, addada kalugarak a Saksi a nangted kaniak iti sumagmamano a kopia. Addaanak iti sumagmamano laeng a kopia ti Agriingkayo! ngem basbasaek ida ken ul-ulitek a basaen ida no malmaldayak. Naimbag ti isursuro dagitoy kadagiti tattao ket tultulonganda ida a mangtarus kadagiti makagapu ti kababalintayo.

I.Y.A., Russia

Dagiti Pagkapuyan Pagyamanan iti panagsuratyo iti artikulo a “Ti Panangmatmat ti Biblia: Palabsen Aya ti Dios Dagiti Pagkapuyantayo?” (Nobiembre 8, 2002) Di pagduaduaan a dayta ti kasayaatan a tulong a naawatko. Dakkel ti naitulongna tapno maawatanmi no kasano ti panangmatmat ti Dios kadagiti pagkapuyanmi.

E. C., Estados Unidos

Adda problemak nga ikarkararagko idi ken ni Jehova ket ninamnamak a sapay koma ta sungbatanna. Kalpasanna, impablaakyo daytoy nga artikulo. Idi nalpasko a binasa, nagkararagak tapno agyaman.

M. S., Japan

Dagiti Teklado Masapul nga agsuratak tapno agyamanak gapu iti artikulo maipapan kadagiti teklado ti piano a napauluan iti “Mailasinmo Aya ti Naggidiatanda?” (Nobiembre 8, 2002) Pagay-ayatko ti musika​—nangruna ti piano. Kayatko met a sursuruen ti dadduma kadagiti kankantaenmi idiay Kingdom Hall. Isu a padasek ken rugiakton ti agensayo iti synthesizer nga adun a tawen nga adda iti siledko.

V. T., Estados Unidos

Kas maysa a tumutokar iti klarinete ken managayat iti musika, kayatko idi a padasen ti agusar kadagiti teklado iti benneg ti musika. Innem a tawenen ti napalabas, pinadasko ti nagadal iti piano a diak kabaelan iti pinansial no saan a digital piano ti usarek. Matuladna nga agpadpada ti uni ti piano ken ti klabe.

S. T., Scotland

Nagadalak iti musika idiay eskuelaan. Nakasursuroak bassit maipapan kadagiti instrumento nga addaan iti teklado, ngem diak idi maawatan no kasano ti pannakaaramidda wenno no ania dagiti kalidadda. Daytoy nga artikulo, agraman dagiti nalaka a maawatan a panangilawlawagna ken dagiti makapainteres a retrato ti nakatulong tapno umadu ti pannakaammok iti daytoy a suheto. Pagyamanan unay.

A. M., Japan

Crazy Horse Pagyamanan iti artikulo a “Crazy Horse​—Panamagbalin a Monumento iti Dati a Bantay.” (Nobiembre 8, 2002) Dimteng iti umiso a tiempo bayat nga isagsaganak idi ti maysa a report para idiay eskuelaan maipapan kadagiti umili a Sioux ken Cheyenne ken no kasano ti panagbiagda. Dinayaw ti maestrak ti reportko! Pagyamanan.

F. V., Estados Unidos

Panagkinnita Manen Kabasbasak ti artikulo a “Naisangsangayan a Panagkinnita Manen Kalpasan ti 30 a Tawen.” (Oktubre 22, 2002) Kasta unay ti panagyaman, ragsak, ken ladingitko. Maragsakanak para kada Mark Ruge ken Dennis Sheets ta immadanida ken Jehova. Nupay kasta, maladingitanak ta saan a nasayaat ti nagtungpalan ti dadduma kadagiti lima nga annakko, nupay napadakkelda kas Kristiano. Nagadu a saem ken panagsagaba ti naliklikanda koma no inkagumaanda ti umadani iti Dios! Kanayon nga ikarkararagko a dumtengto koma ti aldaw nga aramidenda dayta. Pagyamanan iti artikulo. Impaayna ti kasapulak.

M. O., Estados Unidos