Sabon—Usa ka “Bakuna nga Ikaw-Ikaw ray Magdapat”

“ANG ikaduha nga pangunang tigpatay sa mga bata sa kalibotan dili ang malaria, ni tesis, ni AIDS. Kini mao ang . . . kalibang,” nagtaho ang magasing The Economist. Bisan pa niana, daghan sa mga biktima nga mga bata ang buhi pa unta karong adlawa kon sila ug ang ilang mga pamilya kanunay pang nanghunaw ginamit ang sabon.

Nakaplagan sa mga tigpanukiduki sa London School of Hygiene and Tropical Medicine nga “ang hustong paagi sa pagpanghunaw makapamenos ug 43% sa mga sakit nga nagdalag kalibang,” matod pa sa The Economist. “Kini epektibong makapamenos usab sa mga impeksiyon sa respiratoryo, ang pangunang tigpatay sa mga bata. Nakaplagan sa usa ka malukpanong pagtuon nga gipahigayon alang sa kasundalohan sa Amerika nga ang kanunayng paghingos-hingos ug pag-ubo mius-os ug 45% sa dihang ang mga sundalo nanghunaw kalima sa usa ka adlaw.” Bisan diha sa kabos nga mga nasod, ang sabon maabot sa kadaghanang pamilya. Busa, kini haom nga gihubit ingong “usa ka matang sa bakuna nga ikaw-ikaw ray magdapat.” Ug kini dili pa gyod sakit!

Ang Bibliya usab nagdasig sa kahinlo. “Hinloan nato ang atong kaugalingon sa tanang kahugawan sa unod ug espiritu,” nag-ingon ang 2 Corinto 7:1. Bisan tuod ang Diyos sa panguna interesado sa atong espirituwal nga kaputli, siya nag-isip usab sa atong pisikal nga kahinlo ingong hinungdanon. (Levitico, mga kapitulo 12-15) Siyempre, wala siya magdahom nga kita maghinobra. Bisan pa niana, angay natong batasanon ang pagpanghunaw human mogamit sa kasilyas, human hugasi o ilisi ug lampin ang bata, sa dili pa maghikay ug pagkaon o mokaon, ug sa bisan unsang okasyon diin adunay dakong kalagmitan nga atong ikapasa ang makadaot nga mga kagaw o virus ngadto sa uban. Pinaagi sa kanunayng pagpanghunaw, atong gipasundayag ang atong Kristohanong gugma alang sa atong pamilya ug sa tanan natong ikauban.—Marcos 12:31.