Sabon​—“Pagbakunam iti Bagim”

“SAAN a malaria, wenno sarut, wenno AIDS ti maikadua a kangrunaan a pakatayan dagiti ubbing iti lubong no di ket ti . . . panagtakki,” kuna ti magasin a The Economist. Nupay kasta, sibibiag pay laeng koma ita ti adu kadagitoy nga ubbing no regular koma idi ti panangsabonda kadagiti imada.

Naammuan dagiti managsukisok idiay London School of Hygiene and Tropical Medicine a “mabalin a mapabassit iti 43% ti bilang dagiti agtakki no umiso ti panangbuggoda kadagiti imada,” kuna ti The Economist. “Mabalin a kasta met laeng ti kadakkel ti epektona kadagiti impeksion iti aangsan, nga isu ti kangrunaan a pakatayan dagiti ubbing. Natakuatan iti nasaknap a panangadal iti kabibiag dagiti soldado ti America a bimmassit iti 45% ti bilang dagiti agpanateng ken aguyek idi naminlima a nagbuggo dagiti soldado iti kada aldaw.” Kadagiti napanglaw a pagilian, kabaelan ti kaaduan a pamilia ti gumatang iti sabon. Gapuna, maitutop a mayarig dayta a “pagbakunam iti bagim.” Kasta met a saan a nasakit dayta a kita ti bakuna!

Iparparegta met ti Biblia ti kinamanagdaldalus. “Dalusantayo koma ti bagbagitayo manipud iti amin a mabalin a mangrugit iti lasag wenno iti espiritu,” kuna ti 2 Corinto 7:1. (The New English Bible) Nupay ti Dios ket maseknan a nangnangruna iti naespirituan a kinadalustayo, napateg met kenkuana ti pisikal a kinadalus. (Levitico, kapitulo 12-15) Siempre, dina namnamaen nga agbalintayo a nadalus unay. Kaskasdi, rumbeng nga iyugalitayo ti agbuggo kalpasan nga immisbo, immibleng, sinukatantayo ti lampin wenno diaper ti maladaga, sakbay nga agisaganatayo iti taraon wenno mangantayo, ken iti aniaman a kasasaad a mabalin a makayakartayo kadagiti makadangran a mikrobio wenno virus iti sabsabali. No regular a bugguantayo dagiti imatayo, maipakitatayo ti Nakristianuan nga ayat iti pamiliatayo ken iti amin a makapulapoltayo.​—Marcos 12:31.