Le Fasimoli—O se “Tui Puipui e Fai e Oe Lava”

E TUSA ai ma le faamatalaga a se tasi mekasini, “e lē o le malalia, po o le fatafata vaivai (TB), po o le AIDS, le māfuaaga autū lona lua o le feoti o tamaiti, a o . . . le manava tatā.” (The Economist) Ae ana faaaogā e lē aunoa e nei tamaiti ma o latou aiga le fasimoli e fufulu ai o latou lima, semanū e oo mai lava i le taimi nei o loo soifua pea i latou.

Ua toe taʻua e le mekasini lava lea e faapea, ua iloa e tagata suʻesuʻe o le Aʻoga o le Soifua Mālōlōina ma Vailaau o le Teropika i Lonetona e faapea, “e 43 pasene le tele e mafai ona faaitiitia ai faamaʻi o le manava tatā, e ala lea i le fufuluina o lima. Atonu e tele foʻi se aogā o le faia faapea e tusa ai ma faamaʻi e aafia ai totoga o le alā ʻea, lea ua avea ma māfuaaga autū o le maliliu o tamaiti. O se saʻiliʻiliga tele na faia i le vaegaʻau a Amerika na iloa ai, e 45 pasene le tulaga na faaitiitia ai le aofaʻiga o fitafita e tafe isu ma fetalei, ina ua fufulu o latou lima, e faalima i le aso.” Ua gafatia e le tele o aiga i atunuu tau ati aʻe le tau o le fasimoli. Ua talafeagai ai la ona faaigoaina o “se tui puipui e fai e oe lava,” ma o se tui e lē tigā!

Ua uunaʻia foʻi e le Tusi Paia le tumamā. Ua faapea mai le 2 Korinito 7:1: “Ia tatou faamamā iā te i tatou i mea uma e leaga ai le tino atoa ma le agaga.” (2 Korinito 7:1) E ui o loo muamua ona naunau mai le Atua i lo tatou mamā faaleagaga, ae e tāua foʻi iā te ia lo tatou mamā faaletino. (Levitiko mataupu 12-15) O le mea moni e na te lē o faatalitalia i tatou e soona mamā naʻuā. Ae e ao ona fai ma a tatou masani le fufuluina o o tatou lima pe a māeʻa le faaaogāina o le fale lē taʻua, pe a uma ona sui le napekini o se pepe, pe a sauni e fai se meaʻai ma a o leʻi taumafa, ma i so o se taimi lava e ono tulaʻi mai ai le aafia o isi i ni o tatou siama. Ua tatou faaalia ai lo tatou alofa faa-Kerisiano mo lo tatou aiga ma isi uma o loo tatou feiloaʻi pe afai e fufuluina o tatou lima e lē aunoa.—Mareko 12:31.