Ang Hunahuna sa Bibliya

Sa Unsang Paagi Makasukol ka sa Sayop nga mga Tinguha?

“Sa dihang buot nakong buhaton ang maayo, ang daotan ania kanako.”—ROMA 7:21.

TINGALI labaw kay sa ubang mga apostoles, si Pablo naningkamot sa pagdasig sa uban sa pagsunod sa hataas nga mga prinsipyo sa Kristiyanidad. (1 Corinto 15:9, 10) Bisan pa niana, siya prangkang miangkon sa ibabaw. Iyang nasinatian ang mapinadayonong panagsumpaki tali sa iyang hunahuna ug sa iyang sayop nga mga tinguha. Gibati mo ba usab ang gibati ni apostol Pablo? Sa pagkatinuod, ingong dili-hingpit nga mga linalang, kinsa kanato ang wala makasinati nianang panagsumpaki sa kahiladman?

Alang sa daghan, ang pagpakigbugno aron mabuntog ang sayop nga mga tinguha maoy kusganon kaayo. Ang uban nakigbisog sa mga pangandoy sa imoral nga seksuwal nga katagbawan. Ang uban naulipon sa pagkagiyan sa sugal, tabako, ginadiling mga droga, o alkoholikong ilimnon. Sa dihang hasolon sa makadaot ug mahugaw nga mga tinguha, sa unsang paagi masuklan nato kini? Unsang tabang ang mabatonan? Matapos ba gayod ang pagpakigbugno batok sa sayop nga mga tinguha?

Gugma—Ang Hinungdanong Butang sa Pagsukol sa Sayop nga mga Tinguha

Gipunting ni Jesus ang duha ka kinadak-ang mga sugo diha sa Moisesnong Balaod. Ang una mao kini: “Higugmaon mo si Jehova nga imong Diyos sa tibuok mong kasingkasing ug sa tibuok mong kalag ug sa tibuok mong kaisipan.” (Mateo 22:37) Kon atong higugmaon ang Diyos sa paagi nga giingon ni Jesus nga angay natong buhaton, dili ba ang pagpahimuot Kaniya mao ang atong kinadak-ang tinguha? Kon mao, kanang matarong nga tinguha makatabang kanato sa pagpakigbugno bisan sa nakagamot pag-ayong sayop nga mga tinguha!  Dili kini usa ka hinanduraw lamang nga teoriya. Milyonmilyong Kristohanon ang malamposong nakigbugno batok sa sayop nga mga tinguha matag adlaw. Sa unsang paagi imong maugmad ang maong suod kaayong relasyon sa Diyos? Pinaagi sa mapabilhong pagpamalandong sa iyang kaayo ingon sa makita diha sa iyang kalalangan, sa Bibliya, ug sa iyang personal nga mga pakiglabot kanato.—Salmo 116:12, 14; 119:7, 9; Roma 1:20.

Ang ikaduhang kinadak-an nga sugo nga gihisgotan ni Jesus mao: “Higugmaon mo ang imong silingan sama sa imong kaugalingon.” (Mateo 22:39) Si apostol Pablo nag-ingon nga ang gugma “dili bastos” ug “dili mangita sa kaugalingong kaayohan niini.” Busa ang maong dili-mahakogong gugma motabang kanato sa paglikay sa bisan unsang kagawian nga makapasakit sa uban. (1 Corinto 13:4-8) Sa unsang paagi kini maugmad? Pinaagi sa pagbutang sa atong kaugalingon sa kahimtang sa uban ug sinserong paghunahuna sa ilang mga pagbati ug dumalayong kaayohan.—Filipos 2:4.

Unsang Tabang ang Mabatonan?

Tungod kay ang Diyos nakasabot kon unsa ka lisod alang kanato ang pagbuhat kon unsay matarong, siya nagtagana ug ubay-ubayng matang sa mga tabang. Pinaagi sa iyang sinulat nga Pulong, ang Bibliya, siya nagtudlo kanato sa pagdumot kon unsay daotan ug sa pag-ugmad ug maayong pagtahod kaniya. (Salmo 86:11; 97:10) Ang Bibliya naundan sa tinuod-kinabuhing mga asoy nga nagpasundayag sa malaglagong sangpotanan sa pagpadaog sa sayop nga mga tinguha. Dugang pa, si Jesus nag-ingon nga kon atong pangayoon kini, ang Diyos mohatag kanato sa Iyang balaang espiritu, ang kinadak-ang puwersa sa uniberso. (Lucas 11:13) Palig-onon niini ang atong determinasyon sa pagbuhat kon unsay matarong. Ang laing tagana mao ang pagpaluyo sa usag usa ug ang pagdasig nga atong madawat gikan sa ubang mga Kristohanon nga nakigbugno usab batok sa sayop nga mga tinguha. (Hebreohanon 10:24, 25) Samtang ilisan niining maong positibo nga mga impluwensiya ang negatibong mga impluwensiya, kita matabangan sa pagpakigbisog sa pagbuhat kon unsay matarong. (Filipos 4:8) Mosaler ba gayod kining paagiha?

Tagda si Fidel, kinsa nailhan sa iyang komunidad ingong palahubog. Samtang nailalom sa impluwensiya sa alkoholikong ilimnon, siya manabako, manugal, ug makig-away sa uban. Ang iyang pagtuon sa Bibliya ug pagpakig-uban sa mga Saksi ni Jehova nakatabang kaniya sa pagbuntog sa maong mga batasan. Siya karon nakatagamtam na ug mas maayong kinabuhi uban sa iyang asawa ug duha ka anak.

Mangutana tingali ang usa, ‘Apan unsa na man kon mosugmat pag-usab ang akong kahuyangon?’ Si apostol Juan adunay gisulat maylabot sa maong posibilidad. Siya misulat: “Minahal kong mga anak, ako nagsulat kaninyo niining mga butanga aron kamo dili makasala. Apan, kon adunay makasala, kita adunay usa ka magtatabang ngadto sa Amahan, si Jesu-Kristo, usa nga matarong. Ug siya usa ka halad pasig-uli alang sa atong mga sala, apan dili lamang sa atoa kondili usab nianang sa tibuok kalibotan.” (1 Juan 2:1, 2) Oo, ang halad ni Jesus magtabon sa mga kasaypanan sa usa ka tawo nga maghinulsol ug sinserong maningkamot sa paghimog mga kausaban aron sa pagpahimuot sa Diyos. Tungod sa maong tagana, aduna bay maayong katarongan si bisan kinsa nga mohunong sa pagpakigbugno sa pagbuhat kon unsay matarong?

Ang Sayop nga mga Tinguha Mabuntog

Kon atong ugmaron ang atong gugma alang sa Diyos ug sa silingan ug pahimuslan ang tabang sa Diyos, bisan karon kita magmalamposon sa atong pagpakigbugno batok sa sayop nga mga tinguha. Gawas pa, ang Pulong sa Diyos nagpasalig kanato nga kining maong pakigbugno dili magpadayon hangtod sa hangtod. Sa dili madugay, kadtong nagpahimulos sa espirituwal nga mga tagana sa Diyos bug-os nga mamaayo, sa pisikal ug sa espirituwal. (Pinadayag 21:3-5; 22:1, 2) Sila mapahigawas gikan sa kabug-at sa sala ug kamatayon nga gipahinabo niini. (Roma 6:23) Sa laing bahin, kadtong tinuyong magabuhat ug mahugaw ug makadaot nga mga tinguha dili makaangkon sa maong mga panalangin.—Pinadayag 22:15.

Pagkamakapahupay ang pagkahibalo nga dili na kita kinahanglang makigbugno pa batok sa sayop nga mga tinguha hangtod sa hangtod. Kini pagawagtangon sa bug-os ug sa dayon. Pagkadakong kahupayan unya kana!