Le Manatu o le Tusi Paia

E Faapefea Ona E Teena Faanaunauga Sesē?

“Pe a ou loto atu i le lelei e fai, ua iā te aʻu le leaga.”—ROMA 7:21.

ATONU sa sili atu ona galue mamafa le aposetolo o Paulo na i lo o se isi lava aposetolo e faaauiluma mataupu silisili maualuluga o le Faa-Kerisiano. (1 Korinito 15:9, 10) Ae e leʻi matamuli o ia e faailoa mai le manatu o loo taʻua i luga. Na oo pea iā te ia se taua i le va o lona mafaufau ma ona faanaunauga sesē. Po ua oo ea iā te oe lenā lagona e pei ona iai i le aposetolo o Paulo? O le mea moni, i le avea ai ma tagata lē lelei atoatoa, o ai ea se tasi ua lē oo i ai lenā feteenaʻiga i totonu?

O le toʻatele o tagata, e matuā faigatā tele le taua ina ia manumalo i faanaunauga sesē. E iai nisi o loo tauivi ma faalogona malolosi mo feusuaʻiga lē mamā. O nisi ua pulea e le pelē tupe, le tapaa, o fualaau faasāina, po o le ʻava. Pe afai e iai iā i tatou ia faanaunauga leaga ma lē mamā, e mafai faapefea ona tatou teena? O ā ni fesoasoani o loo iai? Pe faamata e iai se taimi o le a muta ai le tauivi ma faanaunauga sesē?

Le Alofa—O le Ki i le Teena o Faanaunauga Sesē

Na faailoa mai e Iesu ia poloaʻiga e lua e sili ona tāua mai le Tulafono na tuuina atu iā Mose. O le poloaʻiga muamua lenei: “E te alofa atu i le Alii lou Atua ma lou loto atoa, ma lou agaga atoa, ma lou manatu atoa.” (Mataio 22:37) Pe afai tatou te alolofa i le Atua e pei ona tatau ona tatou faia e tusa ma le fetalaiga a Iesu, pe e lē ao ea ona avea le faafiafiaina o Ia ma o tatou faanaunauga sili? Pe afai o lenā, o lo tatou faanaunauga  la mo le amiotonu o le a fesoasoani lea i la tatou tauiviga ma o tatou faanaunauga e aupito sili ona leaga! E lē faia fua lenei manatu. E faitau miliona Kerisiano ua taulau i aso taʻitasi i le faatoʻilaloina o o latou faanaunauga sesē. E mafai faapefea ona e ati aʻe se faiā malosi ma le Atua? E ala i le manatunatu loloto ma le talisapaia o lona agalelei e pei ona vaaia i ana foafoaga i le Tusi Paia, ma i ana feutagaʻiga ma i tatou taʻitoʻatasi.—Salamo 116:12, 14; 119:7, 9; Roma 1:20.

O le tulafono sili lona lua na taʻua e Iesu: “E te alofa atu i lē lua te tuaoi, ia pei o oe lava iā te oe.” (Mataio 22:39) Na faapea mai le aposetolo o Paulo, o lea alofa “e lē amio matagā, e lē saʻilia e ia ana lava mea.” O lea ituaiga o alofa e lē manatu faapito, o le a fesoasoani iā i tatou e ʻalofia se amio e faatigā pe faaleaga ai i isi. (1 Korinito 13:4-8) E faapefea ona tatou atiina aʻe lea alofa? E ala lea i lo tatou tuu o i tatou i le tulaga o isi ma ia manatu moni i o latou faalogona ma lo latou lelei tumau.—Filipi 2:4.

O ā ni Fesoasoani o Loo Iai?

Talu ai e malamalama le Atua i le faigatā tele iā i tatou ona faia o le mea tonu, ua ia aumaia ai ni fesoasoani eseese. E ala i lana Afioga tusia, le Tusi Paia, ua ia aʻoaʻoina ai i tatou ina ia ʻinoʻino i le leaga ma ia ati aʻe se faaaloalo tatau mo ia. (Salamo 86:11; 97:10) Ua iai i le Tusi Paia ni tala moni o ni olaga o nisi, e faaalia ai le taunuuga leaga e oo i ai, pe a manumalo faanaunauga sesē. E lē gata i lea, na fetalai Iesu e faapea, afai tatou te ole atu i le Atua mo Lona agaga paia, o le mana lea e sili ona malosi i le vateatea, o le a ia foaʻiina mai. (Luka 11:13) O le a mafai ona faamalosia ai la tatou filifiliga ia faia le mea tonu. O se isi sauniuniga, o le lagolagosua ma le faalaeiau lea e tatou te maua mai isi Kerisiano o loo taumafai foʻi e teena faanaunauga sesē. (Eperu 10:24, 25) O le a tatou maua le fesoasoani i la tatou tauiviga e faia le mea tonu, e ala i le uunaʻi ese o mea leaga e mea lelei. (Filipi 4:8) Pe faamata e aogā moni le faia faapea?

Seʻi tagaʻi foʻi iā Fidel, o se tasi na lauiloa i lona nuu ona o lona onā. O le taimi e inu ʻava ai, e ulaula ai foʻi o ia, ma pelē tupe, ma faamisa i isi. Na fesoasoani lana suʻesuʻega o le Tusi Paia, atoa ai ma lona faatasitasi ma Molimau a Ieova, ina ia tuu ia faiga. Ua ia maua nei se olaga e sili atu ona lelei faatasi ma lana avā ma lana fanau e toʻalua.

Ae atonu e faapea mai se tasi, ‘Ae faapefea pe a ou toe faia le sesē lea na ou tuua?’ Na talanoaina e le aposetolo o Ioane lenā tulaga pe a oo ina tupu. Na ia tusi e faapea: “Si aʻu fanau e, ou te tusi atu nei mea iā te outou, ina neʻi agasala outou; pe afai foʻi e agasala se tasi, o iā te i tatou le fautua i luma o le Tamā, o Iesu Keriso lea, o lē amiotonu. O le togiola foʻi o ia mo a tatou agasala, e lē gata foʻi i a tatou, a e atoa foʻi ma agasala a le lalolagi uma lava.” (1 Ioane 2:1, 2) Ioe, ua aveesea e le taulaga a Iesu ia sesē a le tagata e salamō ma taumafai ma le loto ina ia sui auā le faafiafiaina o le Atua. Pe a fua atu la i lea sauniuniga, pe e iai ea se māfuaaga tatau e solomuli ai se tasi mai le tauivi ina ia faia le mea ua tonu?

O le a Faatoʻilaloina Faanaunauga Sesē

Pe afai e tatou te ati aʻe lo tatou alofa mo le Atua ma tuaoi ma faaaogā le fesoasoani a le Atua, e mafai lava ona tatou taulau i le taimi nei i la tatou taua ina ia teena faanaunauga sesē. E lē gata i lea, ua faamautinoa mai e le Afioga a le Atua le lē tumau ai pea o lea taua. I le lumanaʻi lata mai, o i latou e faaaogāina sauniuniga faaleagaga a le Atua, o le a malolosi atoatoa i le tino ma le faaleagaga. (Faaaliga 21:3-5; 22:1, 2) O le a latou saʻoloto mai le avega o le agasala, atoa ai ma le oti lea e tupu mai ai. (Roma 6:23) I le isi itu, o i latou o loo naunau e faatino faanaunauga lē mamā ma leaga, o le a lē maua na faamanuiaga.—Faaaliga 22:15.

Maʻeu se faamāfanafanaina i le iloa o le a lē tumau pea ona tatou tauivi ma o tatou faanaunauga sesē. O le a matuaʻi aveesea e faavavau. Maʻeu se mapusaga o le a iai!