Taraon Manipud iti Bukodmo a Kanatengan

BABAEN TI MANNURAT TI AGRIINGKAYO! IDIAY CENTRAL AFRICAN REPUBLIC

ITI adu a pagilian, inaldaw a pakaseknan dagiti tattao no kasanoda a taraonan ti pamiliada. Gapu iti kinangina dagiti kadawyan a nateng masansan a nakarigrigat ti mangtaraon iti pamilia. Nupay kasta, nakasarak ti dadduma iti medio simple a solusion​—ti panagmula iti bukodda a taraon!

Mabalin a kayatmo a padasen ti agmula iti bassit a kanatengan. Mabalin nga awan ti nalawa a daga iti aglawlaw ti balaymo, ngem nalabit adda bassit a daga iti asidegmo a mabalinmo a kiddawen a mulaan. Panunotem ti masalimetmetam a kuarta babaen ti panagmulam iti naimas ken makapasalun-at a taraon! Ti panaghardin ket maysa pay a pagwatwatan. Mabalin met a ti panaghardin ket aramidem a proyekto ti pamilia, a mabalin a tagiragsaken dagiti annakmo. Kinapudnona, makaisuro ti panagmula iti natnateng. Isurona dagiti kalidad a kas iti kinaanus. (Santiago 5:7) Kanayonanna, ti pannakakita iti panagtubo dagiti mula ti mangyadani kadatayo iti Namarsua iti amin a naimbag a banag.​—Salmo 104:14.

Ngem dimo pagarupen a nakalaklaka ti agmula iti bukodmo a kanatengan wenno mabalin a dagus a magun-odam dagiti resulta. Nupay kasta, babaen iti determinasion ken bassit a pannakaammo, mabalin nga agballigika!

Nagballigi ti Maysa a Pamilia

Alaem a pagarigan ni Timothée ken ni Lucie​—agassawa a Kristiano nga addaan iti dua nga annak nga agnanaed idiay Bangui, a kabesera ti Central African Republic. Natakuatanda a ti panaghardin ket praktikal ken makaparagsak a pangnayon iti bassit a birokda.

Idi agtawen pay la iti 13 ni Lucie, pinagbalinna a bassit a kanatengan ti asideg ti balayda, ket tinaripatona dayta kalpasan nga aggapu iti eskuelaan ken iti ngudot’ lawas. Naragsakan a mangbuybuya iti idadakkel dagiti mulana. Ngem adu a tawen pay ti napalabas sa napanunotna ti aghardin maipaay iti pamiliana. Inyurnosna a mulaan ti asideg a lote a maus-usar idi a pagbasuraan. Nakitana ti pagimbagan dayta. Imbes a naperdi ti daga, ti  panagrupsa dagiti basura iti naglabas nga adu a tawen ti nangpadam-eg iti dayta a makatulong iti panagmula. Inkeddeng da Lucie ken Timothée a pagbalinen dayta a lote a nabunga a kanatengan.

Panangrugi

Ngem umuna, masapul nga agsirarakda. Nakisaritada iti dadduma maipapan iti panagmula iti nateng ket dimngegda a naimbag. Tangay kasapulan ti irigasion iti daga, nasursuroda pay ti nagkali iti bukodda a bubon. Nakatulong met ti panagbasada kadagiti libro maipapan iti panaghardin.

Nabasada no kasano nga apektaran dagiti mula ti sabsabali a mula. Naammuanda met no kasano nga agtitinnulong dagiti mula tapno agbiagda. Nupay kasta, talaga a pagkuritegen ti dadduma a mula ti sabali a mula. Kuna ti dadduma nga agkabagay dagiti carrot ken kamatis iti panagmula. Nasayaat met nga agkadua a maimula ti kinsay ken cauliflower. Ket “aggagayyem” dagiti eneldo, gisantes, pipino, letsugas, ken sibuyas. Nupay kasta, saan nga agkabagay ti berde a letsugas ken ti mula a parsley a kapamilia ti kinsay. Dadaelen dagiti sibuyas ti berde nga utong ken dagiti gisantes. No makadangran ti maysa a mula iti sabali, kumapsut dagitoy ket nalaka a dadaelen dagiti peste ken naranggas nga insekto.

Naammuan met da Timothée ken Lucie a saan a nainsiriban ti agmula iti maymaysa a kita ti mula iti maymaysa a kinelleng. No rauten dagiti insekto wenno sakit, mabalin a madadael amin. Ti panagmula iti napili a naimbag nga agduduma a kita ti mula ti nakatulong kadakuada a mangpabassit iti kasta a parikut. Dagiti makaagas a mula ken masetas ket mangparagsak ken mangpapintas iti kanatengan ken mangawis kadagiti uyokan ken dadduma pay a makatulong nga insekto tapno nalasbang ti hardin.

Naammuan met daytoy nga agassawa ti saan nga agisprey iti insektisidio kadagiti mulada. Naammuanda a ti panagmula laeng iti bawang ket makatulong a mangpaksiat iti sumagmamano a peste iti hardin. *

Masapul ti kinagaget ken anus, ngem ita addaanen da Timothée ken Lucie iti nalasbang a kanatengan. Agapitda iti repolio, parsley, kamatis, carrot, pipino, ken tarong​—no dadduma sobra pay ngem iti kasapulan ti pamilia!

Agmulaka iti Bukodmo a Hardin!

Saan laeng nga idiay Africa a natakuatan dagiti tattao a praktikal ti panagmula iti bukod a kanatengan. Idiay Alemania, kas pagarigan, adda nasurok a sangamilion a mapagmulaan a lote iti asideg ti siudad. No dadduma, dagiti nabingaybingay a pagmulaan ket grupo ti babassit a lote (a 200 agingga iti 400 a metro kuadrado) a maipaabang kadagiti agnanaed iti siudad. Napanaganan dagitoy iti Schrebergaerten (naipasurot iti nagan ni Daniel Schreber, maysa nga Aleman a doktor). Sigun iti maysa a managsukisok, dagitoy babassit a hardin ket “dakkel ti pasetda nga agpataud kadagiti kappuros a prutas ken nateng.” Agserbi met dagiti hardin a “paraiso” kadagiti hardinero​—maysa a lugar a pagtrabahuan ken paginanaan.

Ikari ti Biblia a dumtengto ti aldaw a ti intero a daga ket agbalinen a sangalubongan a paraiso​—agpaypayso a paraiso. (Lucas 23:43) Ngem kabayatanna, nalabit makasarakka iti sangakelleng a daga ket maragsakanka nga agapit iti taraon iti bukodmo a bassit a hardin.

[Footnote]

[Ladawan iti panid 24]

Agsaksakdo da Timothée ken Lucie agpaay iti hardin ti pamiliada

[Ladawan iti panid 24]

Ti nabingaybingay a paghardinan idiay Munich, Alemania