Fanau Mai i Faigatā!

Ua fanau mai se pepe i se lalolagi faigatā, e lē alofa, ma tumu i popolega. E ui e lē mafai ona ia faamatalaina mai ona faalogona, ua manatu nisi saienitisi, ua ia iloa mea a o leʻi fanau mai.

Ua fai mai le tusi The Secret Life of the Unborn Child: “Ua iloa nei faapea, e iloa mea e se pepe a o iai i le manava o lona tinā, ma e amata i le ono masina (pe i se taimi e vave atu), ona ia matuā lagonaina faalogona eseese.” O loo tau mānatu saienitisi pe faamata e lē o aafia le pepe i se taimi mulimuli ane o lona olaga ona o le faigatā o lona fanau mai, e ui atonu e na te lē o manatuaina.

Pe a mavae le fanau mai, o le a faaauau pea tulaga faigatā. O le a lē toe otometi le fafagaina o ia e pei ona sa iai i le manava o lona tinā. Ua motusia le sootaga lea na faaooina atu ai iā te ia le okesene ma meaʻai. E ao ona ia mānava ma ʻai ina ia ola ai. E na te manaʻomia se tasi e fafaga iā te ia ma vaavaaia isi o ona manaʻoga faaletino.

E ao foʻi ona tuputupu aʻe o ia i le mafaufau, faalogona, ma le faaleagaga. O lea, e manaʻomia se tasi e tausi iā te ia.