Mea o Loo Manaʻomia ma Mananaʻo i ai Pepe

MAI lava i le taimi faatoʻā fanau mai ai, e manaʻomia e se pepe le tausiga alofa, e aofia ai ma le milimili lemū ma le paʻi paʻi atu iā te ia. E talitonu nisi fomaʻi e faapea e matuā tāua tele lea tulaga i le 12 itula lea o loo sosoo ma le taimi faatoʻā fanau mai ai pepe. Ua latou faapea mai o le mea e sili ona manaʻomia e le tinā ma lana tama i le taimi e fanau ai, “e lē o le moe po o le ʻai, a o le milimili ma le opoopo, ma ia vaai ma faalogo le tasi i le isi.” *

E faalenatura le faalogona o le matua ina ia aapa atu e sii, opo, ma milimili lana pepe, ma o le a lagona ai e le pepe le māfana atu i ona mātua ma tali atu i lo la alofa. Ona o le malosi tele o lea sootaga o le a lē faavaivai ai mātua e faia ni faataulaga auā le tausiga o le pepe.

Ae afai ua leai se alofa faapea mai mātua, e tauau ina faasolo ina vaivai le pepe ma iʻu ai lava i le oti. O lea la, ua talitonu nisi fomaʻi e tāua tele le tuuina atu o le pepe i lona tinā i le taimi tonu e fanau mai ai. Ua latou faapea mai a itiiti mai, e tusa o le 30 i le 60  minute le umi e ao ona iai le feiloaʻiga a le tinā ma lana tama.

E ui ina faatāuaina e nisi lea feiloaʻiga i le va o le tinā ma lana pepe, ae atonu o le a fai si faigatā, po o le a lē mafai foʻi lava i nisi falemaʻi ona faatinoina lea tulaga, ona ua masani lava ona aveese pepe faatoʻā fananau mai ma o latou tinā ina ia puipuia ai i latou mai ni maʻi. Ae ua iai nisi faamaoniga e faaalia ai e faapea atonu o le a faaitiitia le maua o pepe i se maʻi e ono oti ai pe a tuu o ia i lona tinā. O lea ua faateleina le aofaʻi o falemaʻi, ua latou malilie e tuu le pepe faatoʻā fanau mai i lona tinā mo sina taimi.

Popolega e Tusa ai o le Fesootaʻiga ma le Pepe

O nisi tinā ua latou lē lagonaina se alofa mo a latou pepe i le taimi muamua na latou vāai ai i ai. O lea ua latou fesili ifo ai, ‘Pe faamata o le a faafaigatā ona ou alofa iā te ia?’ E moni e lē faapea o tinā uma o le a oso aʻe se faalogona alofa i lana pepe i le taimi muamua e vaai ai i ai. Ae e leai se mea e popole ai fua.

E tusa pe tuai ona oso aʻe se faalogona alofa o le tinā i lana tama, ae o le a matuā sili atu ona malosi i se taimi mulimuli ane. Ua faapea mai se tinā ua iai le poto masani: “E leai se tulaga e tulaʻi mai i le taimi e fanau ai lau pepe o le a faalagolago i ai le lelei po o le lē lelei o lua sootaga ma lau tama.” Ae afai o loo e maʻitaga ma o loo iai sou popolega, atonu e lelei ona e talanoa i lau fomaʻi a o leʻi oo i lea taimi. Ia faamanino i ai ou manaʻoga e tusa ai o le taimi ma le umi e te manaʻo e lua te faamasani ai ma pepe i le taimi lava e fanau mai ai.

“Talanoa Mai!”

E foliga mai e iai lava taimi faapitoa e sili ona lelei auā le aʻoaʻoina ai e pepe o ni mea patino, ma e iai foʻi le mutaaga o na taimi faapitoa. O se faataʻitaʻiga, e faigofie lava i se tamaitiiti laʻitiiti ona ia aʻoaʻoina se gagana e tasi pe sili atu foʻi. Ae e foliga mai o le taimi e sili ona faigofie mo lona aʻoaʻoina ai o se gagana, e amata ona muta i le lima o ona tausaga.

O le a matuā faigatā lava i le tamaitiiti ona aʻoaʻoina se gagana pe a oo atu lona matua i le 12 agaʻi i le 14 tausaga. E tusa ai ma le faamatalaga a Peter Huttenlocher, o se fomaʻi o neula o tamaiti, “ua faasolo ina faaitiitia le tele ma le aofaʻiga o vaega o le faiʻai e taulimaina ai gagana.” E manino mai la o uluaʻi tausaga e lima o le tamaitiiti e sili lea ona tāua mo le aʻoaʻoina o se gagana!

E mafai faapefea e se pepe ona faia lea tulaga faigatā o le iloa ona tautala, lea e tāua tele mo le ati aʻe o isi tomai faalemafaufau? O le auala autū lava, e ala lea i le fetalanoaaʻi ma ona mātua. E sili ona tali mai pepe pe a talanoa atu tagata iā te ia. O Barry Arons, o se alii e galue i se aʻoga e taʻu o le Massachusetts Institute of Technology, ua ia mātauina e faapea: “O le pepe . . . e faataʻitaʻi i le leo o lona tinā.” Ae o se mea mālie ua mātauina, e lē faataʻitaʻia e le pepe ia leo uma e faalogo i ai. E pei ona mātauina e Arons, e “lē faataʻitaʻia [e le pepe] le ʻoʻī o le moega a o luelue e le tinā, lea e faia i le taimi o loo talanoa atu ai o ia i lana pepe.”

O mātua mai i vaega eseese o le lalolagi, ua latou talanoa atu i a latou pepe i gagana e faafaigofie ma ese mai le auala e masani ona tautatala ai. A o talanoa atu le matua i se auala alofa, o le a sili atu ona topetope le tātā o le fatu o le pepe. E iai le talitonuga e fesoasoani lea tulaga ina ia vave ona iai se sootaga i le mafaufau o le pepe e tusa o upu ma mea o loo faatatau i ai. A aunoa ma se tala e faia i ai, e pei o loo ole atu le pepe i ona mātua: “Talanoa Mai!”

“Uaʻi Mai iā te Aʻu!”

Ua mautinoa nei e faapea i le tausaga muamua pe ā, o le a iai i le tamaitiiti le lagona māfana i le tagata matua o loo tausia o ia, ma e masani lava o le tinā o loo faia lea tulaga. Pe a lagonaina e le tamaitiiti le mautū o lea faiā, o le a faigofie ona ia faamasani atu i isi, na i lo se tamaitiiti e lē o lagonaina le mautū o le sootaga ma ona mātua. Ua iai le talitonuga e faapea, e ao ona iai lea lagona māfana i le va o se tamaitiiti ma lona tinā, a o leʻi atoa le tolu o ona tausaga.

O le ā e ono tupu pe afai e faatalalē le tinā i lenei itu i lea vaitaimi sili ona tāua o le olaga o le tamaitiiti, aemaise o se taimi e faigofie ona aafia ai i aafiaga mai isi? O Martha Farrell Erickson, o se tamaʻitaʻi na suʻesuʻeina ma faamaumauina tulaga o ni tinā e toʻa 267 ma a latou fanau mo le  silia ma le 20 tausaga, na ia faapea mai: “Ua avea le lē amanaʻia o le tamaitiiti ma mea e faifai mālie ona mou atu ai le naunau o le tamaitiiti, seʻia oo ai lava ina leai sona manaʻo e faamasani i isi, po o le lalolagi lautele.”

I se taumafaiga ina ia faamatala mai lona manatu e tusa o āuga matuiā o le lē amanaʻia o faalogona o le tamaitiiti, ua faapea mai Dr. Bruce Perry mai le Falemaʻi o Tamaiti i Texas: “Afai e te fesili mai po o lē fea e sili ona leaga, o le gauia o ponaivi uma o se pepe ua ono masina le matua, po o lou lē amanaʻiaina o ona faalogona mo le lua masina, o lea iā te aʻu lava ia, e sili atu ona leaga le lē amanaʻiaina o le pepe mo le lua masina.” Aiseā? I le vaaiga a Perry, “e mafai ona toe faaleleia ponaivi, ae afai e lē maua e le tamaitiiti se uaʻi atu i ai mo le lua masina, lea e manaʻomia mo le sologa lelei o lona faiʻai, o le a tumau ai le faiʻai i se tulaga lē mautū.” E lē o tagata uma e ioeina lea manatu. Ae ua faaalia mai i saʻiliʻiliga faasaienisi e faapea, e tāua tele i le mafaufau o se tamaitiiti ona iai i se siʻomaga e amanaʻia ai ona faalogona.

Ua tusia faapea i le tusi Infants: “I se isi faaupuga, o loo naunau pepe ia alofa atu, ma ia alofaina foʻi o ia e isi.” E masani lava ona tagi se pepe ona e peiseaʻī o loo ole atu i ona mātua: “Uaʻi mai iā te aʻu!” E tāua tele i mātua ona tali atu ma le agaalofa. O se faiā faapena o le a iloa ai e le pepe e na te mafai ona faailoa mai ona manaʻoga i isi. Ua ia aʻoaʻo ai le auala e atiaʻe ai ni faiā ma isi.

‘Ae e Lē Matanana ai la le Pepe?’

Atonu o le a e faapea mai, ‘Afai e tagi lava pepe ma ou tago atu faanānā, pe faamata ou te lē o faamatananaina ai o ia?’ Atonu o le tulaga lenā, ae e matuā eseese lava manatu o tagata e tusa ai o lenā tulaga. Talu ai e eseese uma tamaiti, o le tulaga masani lava o mātua e filifili po o lē fea le mea e sili mo a latou fanau. Ae ua iloa mai i ni saʻiliʻiliga e leʻi leva atu e faapea pe afai e fiaʻai le pepe, pe e lē o lelei lana faalogona, po o lē fiafia foʻi, o le a faamatuu mai e lona tino ni homone, ma o le a ia lagonaina ai le popole. E na te faaalia lona popole e ala i le tagi. Ua taʻua e faapea pe a tali atu se matua i le manaʻoga o le pepe, e fesoasoani o ia i le atiina aʻe o ituaiga o sela i le faiʻai o le pepe lea o le a mafai ai e le pepe ona faafilemu ia lava. E lē gata i lenā, e tusa ai ma Dr. Megan Gunnar, o le a itiiti homone e taʻu o le cortisol, e faia i le tino pe a popole o le a iai i se pepe na vave ona tali atu ma le alofa lona matua iā te ia. Afai foʻi e oo le lē fiafia i lea pepe, o le a vave ona taofia e lona tino le iai o lea homone.

Ua taʻua e Erickson e faapea o “pepe na vave ona tali atu pea i ai o latou mātua, aemaise i le 6-8 masina muamua o lona olaga, e lē tagivale e pei o le pepe lea e tuu lava e tagi.” Afai ae tagi le pepe, e tāua foʻi lou tali atu i auala eseese. Pe afai e tutusa lava lau tali atu i taimi uma e tagi ai, e pei o le fafaga po o le sii o ia, o le a oo ina matanana o ia. I nisi taimi, a e talanoa i ai, atonu ua lava lava lenā e faanā ai. Atonu foʻi e aogā lou  sōsō atu i ai ma talanoa lemū i ai. I le isi itu, atonu o loo manaʻomia sina au paʻi paʻi atu i lona papatua po o lona manava.

Ua faapea mai se alagāupu mai atunuu Asia i sasaʻe: “O le tagi, o le vaega lenā a le pepe,” auā o le tagi, o le auala autū lea e faailoa atu ai e le pepe sona manaʻoga. Faamata o le ā se faalogona e oo iā te oe pe afai e lē amanaʻia oe e se tasi i taimi uma e te manaʻo ai i se mea? O lea la, faamata o le ā le lagona e oo i lau pepe lea e na te lē mafaia se mea pe a aunoa ma sē e tausi iā te ia, pe afai e lē amanaʻia o ia i taimi uma o loo ia manaʻomia ai sina uaʻi atu? Ae o ai e ao ona uaʻi atu i lana tagi?

O Ai e Tausia le Pepe?

O se tusigāigoa e leʻi leva atu i le Iunaite Setete na faaalia ai e faapea, o le aofaʻiga o tamaiti mai le taimi na fananau mai ai seʻia oo i le vasega tolu, o le 54 pasene o i latou, o loo vaavaaia i le tele o taimi e nisi tagata e ese mai i o latou mātua. Atonu o loo manaʻomia e le tele o aiga le taufai faigaluega o mātua ina ia lava ai le faasoa. E toʻatele tinā e ave ni aso mālōlō auā le tausiga o lana pepe faatoʻā fanau mai mo ni nai vaiaso po o ni masina foʻi. Ae a mavae lenā taimi, o ai o le a tausia le pepe?

O le mea moni, e leai se tulafono patino e tusa ai o lenā tulaga. A ia manatua, o loo matuā manaʻomia pea e le pepe le tausiga lelei i lea taimi tāua o lona olaga. E ao i mātua ona matuā mafaufau lelei e tusa ai o lea mataupu. E ao ona la filifili lelei e tusa ai ma le mea e tatau ona fai.

O Dr. Joseph Zanga mai le American Academy of Pediatrics, o se tasi e faia ni saʻiliʻiliga faapitoa e tusa o tamaiti, ua ia faapea mai: “Ua manino atili mai e faapea e tusa lava po o le ā le lelei o nofoaga faapitoa mo le tausiga o tamaiti, ae e lē mafai ona suia e na nofoaga le taimi lea o loo manaʻomia e tamaiti mai i o latou tinā ma tamā.” Ua popole nisi tagata popoto faapitoa i le lē mafai e tamaiti i nofoaga faapitoa mo lo latou tausiga, ona faamasani ma fetalanoaaʻi ma le tagata o loo vaaia i latou i se tulaga o loo latou manaʻomia ai.

Talu ai lo latou iloaina o manaʻoga tāua o a latou fanau, ua filifili ai nisi tinā faigaluega e nofo i le fale na i lo le tuu o le tausiga tāua o a latou fanau i isi. Na faapea mai se tasi fafine: “Ua tauia aʻu i se lagona o le lotomalie lea ou te matuā talitonu e lē mafai ona maua mai i se isi lava galuega.” O le mea moni, e lē o tinā uma e mafai ona faia faapena ona o loo manaʻomia le tupe e o latou aiga. O le toʻatele lava o mātua e ao ona ave a latou fanau i nofoaga faapitoa mo le tausiga o tamaiti, ma o lea e latou te matuā taumafai ai e uaʻi atu ma faaalia le alofa iā latou fanau i taimi e latou te faatasi ai. Ua faapena foʻi ona faia e mātua nofo toʻatasi o ē faigaluega ni taumafaiga malosi i le tausia aʻe o a latou fanau, ma ua matuā manuia ni iʻuga ua oo i ai.

E mafai ona avea le tausiga o fanau o se galuega e olioli ai, ma e tele le fiafia e maua mai ai. Ae o se galuega e faigatā ma e tele ona luʻi. E mafai faapefea ona e taulau i lona faatinoina?

[Faaopoopoga i lalo]

[Pusa/Ata i le itulau 18]

O Pepe Lē Leoa

Ua taʻua e nisi fomaʻi i Iapani e faapea ua faateleina le aofaʻi o pepe e lē fetagisi toe lē featai. Ua taʻu i latou e se fomaʻi faapitoa mo tamaiti e suafa iā Satoshi Yanagisawa, o pepe lē leoa. O le ā le māfuaaga o le lē faaalia mai e ia pepe o o latou faalogona? O le talitonuga o nisi fomaʻi e faapea, ua tupu lea tulaga ona ua lē o iai sa latou fesootaʻiga ma o latou mātua. Ua tusa lea tulaga ma le faamalosia o le taofia e le pepe o le faaalia mai o ona faalogona. O se tasi o manatu e tusa ai o le māfuaaga o lea tulaga e faapea, ua fiu le pepe talu ai le lē amanaʻia pea o ia, ma lē malamalama i ana taumafaiga e fesootaʻi atu.

E tusa ai ma le faamatalaga a Dr. Bruce Perry, o le fomaʻi pule i le vaega e suʻesuʻe i mafaufau i le Falemaʻi o Tamaiti i Texas, pe afai e lē uaʻi atu mātua i le pepe i le taimi ua tatau ai, atonu la o le a lē mafai ona tupu le vaega o lona faiʻai lea e na te atiina aʻe ai lagona alofa. Pe afai e lē alolofa mātua i le tamaitiiti, atonu o le a lē alofa atu le tamaitiiti i isi. Ua talitonu Dr. Perry o loo iai se sootaga i nisi o taimi o na tulaga i le taimi a o laiti ma le pogai o le tagofiaina o fualaau faasāina ma le ʻava, atoa ai ma gaoioiga sauā i nisi o le ʻautalavou.

[Ata i le itulau 19]

A o fesootaʻi le matua ma lana pepe, o le a faamalosia ai la laʻua faiā