Hom Medicine—Waswe, Hem Savve Helpem Iu?

FROM taem bifor kam, pipol bin iusim hom medicine for treatim sik. Datfala Ebers Papyrus, wea olketa raetem long Egypt long samting olsem mek-16 century B.C.E., recordim planti handred difren kaen hom medicine wea pipol bin talem for difren kaen sik. Bat planti taem, pipol long wan genereson explainim olketa medicine hia go long next genereson and no raetem.

Luk olsem kaen hom medicine wea kam from Rome and Greece bifor hem start witim waka wea datfala doctor long Greece bifor, Dioscorides, hem duim, wea hem raetem buk De Materia Medica. Datwan hem kamap main information saed long olketa medicine for nara 1,600 year. Long staka kantri long world, pipol tinghae yet long wei for iusim hom medicine. Long Germany, olketa gavman health program helpem man for peim kost bilong hom medicine.

Nomata samfala taem pipol talem hao olketa hom medicine sef winim olketa niu medicine wea olketa doctor givim, datwan hem no stret evribit. So olketa kwestin hem kamap: Saed long olketa hom medicine, wanem nao iumi need for careful long hem and wanem nao best samting for duim? And tu, waswe, enitaem wanfala medicine hem bae moabeta winim narawan? *

Hao Olketa Hom Medicine Savve Help

Pipol talem hao olketa medicine wea man wakem from tree or plant savve helpem body. Olketa talem hao samfala savve helpem body for winim sik, helpem bele saed long strongfala kaikai, mekem man relax, helpem man go long toilet, or help balancem olketa gland.

Hom medicine savve help saed long wei for strongim body and finisim sik. Olsem example, samfala plant wea aotem wata from body, olsem parsley, garem staka potassium tu. From man and animal lusim datfala important samting wea body needim for grow taem olketa mimi, hem gud tumas hao olketa plant olsem garem potassium insaed. Olsem tu, datfala valerian plant (Valeriana officinalis) wea pipol iusim longtaem kam for mekem man relax, hem garem staka calcium. Luk olsem calcium mekem wei wea datfala plant savve helpem man relax hem moa strong.

 Hao for Iusim Hom Medicine

Iu savve iusim hom medicine long olketa difren wei. Maet for drinkim hot olsem tea, boelem samting long wata for mekem medicine kamaot insaed wata then drinkim datwan, mixim samting wea kamaot from plant witim lelebet alcohol, or putim long garekil witim plasta. Iu savve mekem tea taem iu pourim hot wata insaed kap witim wanfala hom medicine. Bat olketa long medical sei for no boelem insaed wata eni hom medicine wea iu drinkim olsem tea. Wei for kasem medicine from samfala rut and skin bilong tree hem for boelem long wata.

Waswe long medicine wea mix witim alcohol? Wanfala buk hem sei datwan hem medicine from plant wea olketa iusim pure alcohol or alcohol wea mix witim wata, or brandy, or vodka for mekem.” Nara wei tu hem for mekem datfala medicine long wei wea fitim for putim long body. Planti taem hem for putim long olketa part bilong body wea garem sik and wea pain.

No olsem planti vitamin and drug, man no need for kaikai firstaem bifor hem iusim hom medicine bikos staka hom medicine hem olsem kaikai nomoa. Samfala hom medicine olketa putim insaed olketa capsule wea isi for keepim and drinkim. Sapos iu disaed for iusim hom medicine hem gud for followim instruction bilong olketa long medical.

For longfala taem, pipol iusim hom medicine for treatim flu, bele soa bihaen kaikai, wei for no savve toilet, no savve sleep, and for stopem toroaot. Bat samfala taem olketa iusim hom medicine for olketa sik wea moa serious—no just for healim sik bat for protectim man from sik tu. Olsem example, long Germany and Austria, olketa iusim plant wea garem nem saw palmetto (Serenoa repens) olsem first samting for treatim prostatic hyperplasia (wea hem wei wea prostate gland hem boela) wea no kamap cancer. Long samfala kantri, 50 go kasem 60 percent long olketa man bae gogo kasem disfala sik. Bat hem important for doctor lukim datwan firstaem for savve wanem nao mekem datwan for boela, bikos sapos datwan hem cancer, hem bae needim nara strongfala medicine wea fitim datwan.

Samting for Careful Long Hem

Nomata staka pipol savve iusim wanfala hom medicine, iumi mas careful. No tingse hem sef bikos hem kam from wanfala plant and pipol sei hem “natural.” Wanfala encyclopedia abaotem olketa hom medicine sei: “Sorre for talem bat tru samting nao hem hao samfala hom medicine barava danger wan. [Sorre nao] samfala pipol no tingting gud firstaem bifor olketa iusim olketa hom medicine nomata hem danger wan or nomoa.” Samfala hom medicine savve changem fast bilong heart beat, blood pressure, and sugar long blood. Dastawe, pipol wea garem problem witim heart, hae blood, or problem witim sugar long blood olsem diabetes, mas barava careful.

Bat planti taem, samting wea man kasem bihaen hem iusim hom medicine hem saed long olketa allergy. Insaed diswan hem hed soa, eye raon, toroaot, or body hem skras. From hom medicine strong for aotem sik from body, hem savve mekem man feel olsem hem flu. Maet hem luk olsem hem worse for lelebet taem and then isisi start for gud bak. Planti pipol bilivim hao diswan hem from first samting wea datfala medicine duim hem for aotem from body olketa poison samting wea kamaot from datfala sik.

Wei wea samfala man dae from olketa iusim hom medicine strongim hao iumi need for careful and kasem gudfala advaes. Olsem example, datfala hom medicine ephedra, wea staka pipol iusim for lus weight, savve apim go moa hae blood. Long United States, winim wan handred man dae from medicine wea olketa mekem from ephedra. Bat wanfala pathologist long San Francisco, Steven Karch, hem sei: “Mi savve long samfala wea iusim ephedra and wea dae, bat hem from olketa ova tumas witim or garem bigfala sik long heart finis.”

Doctor Logan Chamberlain, wea raetem wanfala buk abaotem hom medicine, hem sei: “Klosap evri report long olketa year wea just go pas abaotem nogud samting wea happen long man wea iusim hom medicine hem from pipol hia no iusim long stretfala wei. . . . Olketa instruction saed long haomas for iusim hem sef sapos man followim. Sapos savveman saed long hom medicine hem talem iu for duim difren samting hem olraet, bat sapos nomoa, followim evribit olketa instruction.”

Savveman saed long hom medicine, Linda Page hem talem disfala advaes: “Nomata iu garem serious health problem, hem moabeta for iusim lelebet medicine nomoa, no staka. Hom medicine bae really help sapos iu iusim lelebet  evritaem and iusim for longfala taem lelebet. Hem tek taem for kasem bak gudfala health.”

Wanfala buk abaotem hom medicine explainim hao samfala hom medicine savve kosim samting for happen long body wea hem olsem saen for man savve hem ova tumas witim. Olsem example, wanfala hom medicine wea savve mekem man relax bae mekem man toroaot sapos hem ova tumas witim. Bat, no evri hom medicine givim saen for man savve hem ova tumas witim, so iumi mas followim olketa instruction.

Nomata olsem, planti pipol bilivim hao, for wanfala hom medicine helpem man hem mas iusim wanem hem fitim and long stretfala wei. Planti taem, only wei for duim olsem hem for iusim medicine olketa kasem from wei for boelem wanfala plant. Hem nao olketa duim witim ginkgo biloba wea olketa bin iusim for longfala taem for helpem memory and helpem blood for muv free raonem body, bikos iu needim planti kilogram long leaf bilong hem for mekem wanfala treatment nomoa.

Wanfala Mix wea Maet Danger

Hom medicine maet kosim problem sapos man iusim witim medicine from doctor. Olsem example, hom medicine savve mekem strong bilong nara medicine hia katdaon, mekem moa strong, mekem body aotem hem long wei wea moa fast, or mekem nogud wei wea datfala medicine affectim man hem moa big. St. John’s wort, wea planti pipol long Germany iusim for treatim sorre feeling, kosim body for aotem planti nara medicine from doctor tu taems moa fast, wea mekem medicine hia no helpem man tumas. So sapos iu iusim olketa medicine wea doctor givim, wea insaed diswan hem olketa pill for famili planning, askem doctor firstaem bifor iu iusim hom medicine.

Wanfala buk abaotem wei wea hom medicine aotem sik sei: “Alcohol, marijuana, cocaine, and olketa nara drug wea affectim tingting and feeling bilong man and tobacco savve putim laef long danger taem man mixim witim samfala hom medicine. . . . Hem wise for stap klia long olketa drug olsem especially taem iu sik.” Hem olsem tu for woman wea babule and wea susum pikinini. Bat, saed long tobacco and olketa nogud drug wea man depend long hem, olketa Christian kasem protection taem olketa obeyim komand long Bible for “klinim [olketa seleva] from evri samting wea mekem body and spirit dirty.”—2 Corinthians 7:1.

Saed long hom medicine, nara buk sei: “Sapos iu kamap babule taem iu iusim hom medicine, talem doctor and finis for iusim go kasem taem iu savve story gud witim doctor. Trae for rememberim haomas iu bin iusim and for haomas taem.”

Wanfala encyclopedia abaotem hom medicine sei: “Planti danger stap taem man disaedem seleva wanem medicine for iusim and haomas for iusim.” Long box long disfala page, “Danger From Wei for Disaedem Treatment Seleva,” bae iu lukim samfala danger saed long olketa hom medicine.

Olsem witim evri medicine, iumi shud no iusim olobaot olketa hom medicine. Iumi mas savve gud abaotem olketa and balance, and remember hao no eni gudfala treatment stap for samfala sik. Olketa tru Christian luk forward long taem wea samting wea kosim sik and dae—wei for no perfect wea iumi kasem from Adam and Eve—bae finis evribit anda long rul bilong Kingdom bilong God wea bae barava helpem man.—Romans 5:12; Revelation 21:3, 4.

[Footnote]

[Box long page 26]

Danger Bilong Wei for Disaedem Treatment Seleva

Olketa hia nao olketa danger from wei for no askem doctor firstaem bifor iu iusim hom medicine.

Maet iu no barava savve wanem sik nao iu garem.

Maet hom medicine iu iusim hem no fitim sik bilong iu nomata iu savve wanem sik iu garem.

Maet hom medicine iu iusim hem mekem iu feel gud lelebet bat hem bae no finisim sik, wea mekem iu delay for iusim medicine wea iu barava needim for datwan.

Maet hom medicine wea iu iusim hem no fitim for iusim witim medicine wea doctor givim​—olsem example, medicine for wanfala allergy, or for hae blood.

Maet hom medicine iu iusim finisim wanfala smol sik bat hem savve mekem nara health problem olsem hae blood kamap worse.

[Credit Line]

Source: Rodale’s Illustrated Encyclopedia of Herbs