Usa ka Halandomong Open House

TINAMPO SA MAGSUSULAT SA PAGMATA! SA MEXICO

SA Marso 15, 2003, ang mga delegado gikan sa kapin sa 40 ka nasod nagkatigom duol sa Mexico City alang sa dedikasyon sa bag-ong natukod nga mga bilding nga makita sa ubos. Kining maong mga bilding nga puy-anan ug mga pasilidad sa pag-imprenta maoy bahin sa kinaulahiang pagpadako sa sangang buhatan sa mga Saksi ni Jehova sa Mexico.

Sa 1974, sa dihang duna ray mga 65,000 ka Saksi sa Mexico, gidedikar ang unang mga bilding sa sanga niining dapita. Tungod kay kusog nga midaghan ang mga Saksi sa Mexico, ang pagdedikar sa dugang mga bilding gihimo sa 1985 ug dayon sa 1989. Ang kinaulahiang gidugang, nga naglangkob ug kapin sa dose ka bag-ong mga bilding, naglakip ug usa ka dakong imprentahan ug mga puy-anan nga kapuy-an ug mga 1,300 ka kawani sa sanga.

Duha ka semana human sa dedikasyon, gihimo ang usa ka open house alang sa mga silingan duol sa sangang buhatan. Lakip sa gipadad-ag sinulat nga mga imbitasyon mao ang mga opisyales sa maong dapit maingon man ang mga estudyante ug mga magtutudlo sa bag-ong natukod nga unibersidad nga nahimutang duol sa sanga. Daghan didto sa sanga ang naghunahuna kon pila kahay modawat sa imbitasyon.

Usa ka Makapatagbawng Sanong

Misanong ang 272 ka tawo, lakip na ang mga estudyante ug mga opisyales sa munisipyo. Ang mga bisita nakadayeg sa katahom ug kahinlo sa mga pasilidad ug nagpasalamat sa pagkamaabiabihon nga gipakita kanila. Usa ka babaye misulat diha sa guest book: “Ako mibisita sa inyong mga pasilidad sa unang higayon. Maanindot kini. Ako nakadayeg ug nagtahod na kaninyo kaniadto, apan misamot pa kini karon.”

Ang laing bisita miingon: “Sayop ang among pagtuo kon unsay ginahimo dinhi. Dunay gipakaylap nga mga hulungihong bahin kaninyo. . . . Apan ang akong nakita karon naghatag kanako ug pagsalig. Malipay kong modawat kaninyo sa akong balay tungod kay nagtuo ako nga mapuslanon ang inyong ginahimo.”

Ang usa sa mga tigpakigpulong sa unibersidad, kansang inahan maoy usa ka Saksi, nagdalag duha ka enterong klase aron sa pagbisita. Siya miingon: “Gusto kong masayod ang mga batan-on kon unsay ginahimo sa mga Saksi ni Jehova sa tibuok kalibotan. Dunay mga butang nga ilang makat-onan sa pagbisita dinhi.” Sa unsang paagi naapektohan ang mga estudyante sa maong pagbisita?

Ang usa misulat: “Salamat sa inyong pagkamaabiabihon. Kadto maoy dili-makalimtang adlaw alang nako ug sa akong mga klasmet.” Ang lain miingon nga ang mga tawo nga dili maminaw sa mga Saksi nga mobisita kanila walay ideya kon unsa gayod sila. “Kinahanglang bukas ang atong hunahuna ug andam kitang mamati sa ubang mga pagtulon-an,” siya mihinapos. Usa ka batan-ong lalaki miingon: “Lahi gayod akog hunahuna bahin sa mga  Saksi kaniadto, apan karon akong nahibaloan nga nagtinabangay kamo sa usag usa. Kamo morag gagmayng mga hulmigas—puliki kaayo.”

Upat ka membro sa kapolisan sa maong dapit ang nahilakip sa mga bisita. Ang usa kanila, nga usa ka babaye, miingon: “Talagsaon kini. Walay pagpihigpihig dinhi. Ang usa nga nanghinlo, ang hardinero, ang tanan managsama. . . . Kahibulongan kini.”

Duha ka gagmayng mga silingan, mga batang lalaki nga nuybe ug diyes anyos ang edad, miingon: “Nindot kini—dako kaayo.” “Ang nagustohan gyod nako mao ang mga makina. Paspas kaayo kini. Nalingaw ko kaayo sa mga makina nga nagputol ug mga papel.”

Ang usa ka traumatologist, iyang asawa, ug ilang anak nga babaye, nga usa ka estudyante sa unibersidad, nalakip sa mga bisita. Sa ilang pag-tour, ang asawa sa doktor nagsuknag daghang pangutana bahin sa Bibliya. Siya miingon nga napukaw ang iyang interes sa dihang miduaw ang mga Saksi sa iyang amahan, nga usa ka membro sa ebanghelikal nga relihiyon. Masuko ang iyang amahan, samtang ang mga Saksi nagpabiling kalmado. “Karon nakasabot na ko kon ngano,” matod pa niya.

Ang maong doktor ug ang iyang pamilya miingon nga nausab ang ilang panglantaw sa mga Saksi tungod sa ilang pagbisita. Kay nakamatikod sa ilang interes, ang ilang giya, si José, nagdapit kanila sa pagtambong sa Memoryal sa kamatayon ni Kristo ug nagtanyag kanila ug usa ka pagtuon sa Bibliya. Sila misugot, nga nag-ingon nga malipay silang moadto sa sangang buhatan aron magtuon.

Miabot sila pagkasunod semana, ug si José ug ang iyang asawa, si Beatriz, malipayong nag-abiabi kanila didto sa ilang lawak. Daghan kaayo silag mga pangutana nga ang unang pagtuon miabot ug tulo ka oras ug tunga! Ang maong pamilya mitambong sa Memoryal sa Abril 16—uban sa amahan sa asawa sa traumatologist—oo, ang usa nga masuko kanhi tungod sa mga pagduaw sa mga Saksi!

Ang usa ka linaing rason sa kalipay mao ang balita bahin sa gidaghanon sa mga literatura sa Bibliya nga nadala sa mga bisita sa ilang pagpauli—500 ka buok, ilabina mga Bibliya. Ang pipila kanila nag-ingon nga wala pa sila makabaton ug Bibliya sukad.

Ang usa ka babaye nga nagpuyo sa duol nag-ingon kang Armando, kinsa maoy nanghatag ug mga literatura sa Bibliya: “Sukad karon, moduyog na ko kaninyong mga Saksi sa inyong mga tigom, kay nahibalo ko nga kini mao ang kamatuoran.” Pipila ka semana sa ulahi, nalipay si Armando sa pagkakita sa maong babaye diha sa Kingdom Hall. Matod ni Armando: “Siya nagdala sa libro nga iyang nakuha panahon sa open house. Sa dihang gitimbaya ko siya, miingon siya nako: ‘Sa imong nakita, gihimo nako ang akong giingon nimo nga akong buhaton.’”

Ang tulo ka adlaw nga open house dali rang milabay. Apan makapalig-on kaayo kini. Ang pagkadungog ug mga komento bahin sa mga pasilidad sa sanga nga gisulti sa mga bisita nga miduaw sa unang higayon nakatabang sa mga membro sa sanga sa pagpabili pa gayod sa ilang pribilehiyo sa pag-alagad diha sa usa sa mga sangang buhatan sa mga Saksi ni Jehova.

[Mga hulagway sa panid 24, 25]

1. Bilding nga ayohanag sakyanan, 2. services building, 3. maintenance shops building, 4. mga puy-anan, 5. imprentahan, 6. awditoryum, 7. bilding alang sa mga bisita

[Mga hulagway sa panid 25]

Gatosgatos ang misanong sa imbitasyon ngadto sa open house, lakip na ang mga estudyante ug mga polis sa maong dapit