Un Open House Memorabel

DI UN ESKRITOR DI SPIÈRTA! NA MEXICO

DIA 15 di mart 2003, delegadonan for di mas ku 40 pais a reuní djis pafó di Siudat di Mexico pa e programa di dedikashon di e edifisionan resien konstruí ku bo por mira riba e potrètnan riba e páginanan aki. E edifisionan aki di residensia i imprenta ta parti di e ekspanshon mas resien di e sukursal di Testigunan di Yehova na Mexico.

Na 1974, tempu ku tabatin rònt di 65.000 Testigu na Mexico, nan a dediká e promé edifisionan di e sukursal na e sitio aki. Segun ku e kantidat di Testigu di Yehova na Mexico tabata krese drástikamente, nan a dediká mas edifisio nobo na 1985 i atrobe na 1989. E konstrukshonnan mas resien, ku ta konsistí di mas ku un dozein di edifisio nobo, ta inkluí un drùkerei inmenso i tambe edifisionan di residensia ku lo por akomodá te ku 1.300 hende.

Dos siman despues di e programa di dedikashon, nan a tene un open house pa e bisiñanan rònt di sukursal. Nan a manda invitashon skirbí na entre otro outoridatnan lokal i tambe na studiante- i dosentenan di un universidat resien fundá ku ta keda na otro banda di kaya. Hopi hende na sukursal tabata kurioso pa sa ta kuantu hende lo aseptá e invitashon.

Un Reakshon Ku Ta Duna Satisfakshon

En total 272 persona a reakshoná, inkluso studiantenan i funshonarionan di estado i di e munisipio. Bishitantenan a komentá riba e bunitesa i limpiesa di e lugá i a ekspresá apresio pa e hospitalidat ku a ser demostrá na nan. Un persona a skirbi den e buki di huéspet: “Esaki ta mi promé bishita na boso lugá. E ta una beyesa! Mi tabata atmirá i respetá boso kaba, pero awor mi ta hasi esei mas tantu ainda.”

Un otro bishitante a remarká: “Nos tabatin un impreshon robes di loke tabata tuma lugá aki. Tabatin rumornan ta sirkulá tokante boso. . . . Pero loke mi ta mira awor a duna mi konfiansa. Gustosamente lo mi risibí boso den mi kas pasobra mi ta haña ku loke boso ta hasi ta bale la pena.”

Un di e dosentenan di e universidat, kende su mama ta Testigu, a bin bishitá e sukursal ku dos klas di studiante. El a bisa: “Mi tabata ke pa e hóbennan sa kiko Testigunan di Yehova ta hasi rònt mundu. Nan por siña algun kos dor di bishitá e lugá aki.” Ki efekto e bishita tabatin riba e studiantenan?

Un di nan a skirbi: “Danki pa boso hospitalidat. Tabata un dia inolvidabel pa mi i mi koleganan di skol.” Un otro studiante a remarká ku hende ku no ta skucha e Testigunan ora nan bishitá  nan, no tin niun idea ken nan ta realmente. El a konkluí: “Nos mester ta tolerante i habrí pa otro kos.” Un mucha hòmber a bisa: “Mi tabatin kompletamente un otro idea di boso, pero awor mi ta mira ku boso ta apoyá otro. Boso ta keda meskos ku vruminga, asina okupá boso ta.”

Kuater agente polisial di e kuerpo lokal tabata entre e bishitantenan. Un di nan, un polis muhé, a remarká: “Esaki ta impreshonante. Aki no tin diskriminashon. Esun ku ta limpia, e hardinero, tur hende ta igual. . . . Esaki ta maravioso.”

Dos mucha hòmber bisiña, di nuebe i dies aña, a bisa: “E lugá aki ta nèchi, i hopi grandi.” “Loke ami a gusta mas ta e mashinnan. Nan ta masha lihé mes. Mi a gusta foral e mashinnan ku ta kòrta papel.”

Un dòkter, spesialista den leshonnan grave, huntu ku su esposa i nan yu muhé ku ta un studiante di universidat, tabata entre e bishitantenan. Durante e tour e kasá di e dòkter a hasi hopi pregunta bíbliko. El a konta ku su interes a lanta ora ku e Testigunan tabata bishitá su tata, kende ta miembro di un religion evangéliko. Su tata tabata bira furioso, miéntras ku e Testigunan tabata keda kalmu. “Awor mi ta komprondé dikon,” e señora a deklará.

E dòkter ku su famia a bisa ku nan bishita a kambia nan opinion di Testigunan. Tumando nota di nan interes, José, nan guia, a invitá nan na e Konmemorashon di e morto di Kristu i a ofresé nan un studio di Beibel. Nan a reakshoná positivo, bisando ku gustosamente nan lo bini sukursal pa e studio.

E siguiente siman nan a bini, i José ku su kasá, Beatriz, a keda emoshoná di por a risibí nan den nan kuarto. E famia tabatin asina hopi pregunta ku e promé studio a dura tres ora i mei! Nan a asistí na e Konmemorashon dia 16 di aprel—huntu ku tata di e dòkter su kasá—sí, esun ku tabata bira furioso ora ku e Testigunan bishit’é!

Un motibu spesial di alegria tabata ora a anunsiá e kantidat di literatura bíbliko ku e bishitantenan a bai kas kuné: 500 pida, spesialmente Beibel. Algun bishitante a bisa ku nunka promé nan no tabatin un Beibel.

Un señora ku ta biba den bisindario a bisa Armando, kende tabata enkargá ku e stènt di literatura bíbliko: “Djawe padilanti, lo mi djòin boso na boso reunionnan, pasobra mi sa ku esaki ta e bèrdat.” Un par di siman despues, Armando a keda kontentu di mira e señora aki na Salòn di Reino. Armando a konta: “E tabatin e buki ku el a haña durante e open house. Ora mi a kumind’é, el a bisa mi: ‘B’a wak, mi ta hasiendo loke m’a bisa bo ku mi ta bai hasi.’”

E tres dianan di e open house a pasa lihé. Pero nan tabata sumamente edifikante. Skuchando e komentarionan tokante e fasilidatnan di sukursal for di boka di hende ku a bishitá e lugá pa promé biaha, a yuda e miembronan di sukursal haña mas apresio ainda pa nan privilegio di por sirbi den un di e sukursalnan di Testigunan di Yehova.

[Plachinan na página 24, 25]

1. Edifisio di garashi, 2. edifisio di servisio na famia di Bètel, 3. edifisio di departamentunan di mantenshon, 4. residensianan, 5. drùkerei, 6. sala di ouditorio, 7. edifisio pa risibí bishitante

[Plachinan na página 25]

Sentenáres di hende a reakshoná riba e invitashon pa e open house, inkluso studiante i polis lokal