Menagano Yeo e Tlaišegago

GO TLOGA ge a be a e-na le nywaga e 14, Nicole o ile a ba le dinako tša go hlaselwa ke maikwelo ao a sa kgahlišego. Lega go le bjalo, ge a be a e-na le nywaga e 16, o ile a thoma go ikwa ka tsela e fapanego—maikwelo ao a sa tlwaelegago a lethabo le le feteletšego le go tlala matla kudu. Go ba le dikgopolo tše dintši, go lebala seo a nyakago go se bolela le go hlobaela di ile tša latelwa ke go gononela mo go se nago motheo ga gore bagwera ba gagwe ba be ba ikhola ka yena. Ka morago, Nicole o ile a bolela gore o be a ka kgona go fetola mebala ya dilo ge a rata. Ke gona mo moo mmago Nicole a ilego a lemoga gore thušo ya tša kalafo e a nyakega, ka gona a mo iša sepetlele. Ka morago ga go diša maikwelo a fetogago a Nicole ka kelohloko, mafelelong dingaka di ile tša utolla bothata: Nicole o be a tlaišwa ke bolwetši bja tšharakano ya maikwelo. *

Go swana le Nicole, dimilione tša batho lefaseng ka bophara di tlaišwa ke bolwetši bja go feto-fetoga ga maikwelo—e ka ba e le bolwetši bja tšharakano ya maikwelo goba sebopego se sengwe sa kgateletšego yeo e kgonthišeditšwego ka tša kalafo. Ditla-morago tša malwetši a e ka ba tše šoro. Steven yo a tlaišwago ke bolwetši bja tšharakano ya maikwelo o re: “Ke tšere nywaga e mentši ke e-kwa bohloko. Ke be ke e-ba le kgateletšego e šoro gomme ka morago ke ikwe ke thabile kudu. Kalafo le dihlare tša kalafo di ile tša thuša, eupša ke be ke sa dutše ke katana.”

Ke’ng seo se bakago bolwetši bja go feto-fetoga ga maikwelo? Go bjang go swarwa ke kgateletšego goba bolwetši bja tšharakano ya maikwelo? Bao ba swerwego ke bolwetši bjo—le bao ba ba hlokomelago—ba ka thušwa bjang go hwetša thekgo yeo ba e nyakago?

[Mongwalo wa ka tlase]