Pagbantay sa Kalibutan

Ginasiperan nga mga Pilas

Ang pagkipot sa mga pilas paagi sa medikal nga siper mas maayo sangsa kinaandan nga pagtahi, report sang Frankfurter Allgemeine Zeitung. “Ang de-siper nga bendahe nga ginagamit sa pag-opera adhesibo ukon nagatapik, kaangay lang sa kinaandan nga plaster. Ang bendahe, nga may mga unto, ginataklap sa magtimbang nga kilid sang pilas kag dayon ginasira kaangay sang siper sang panapton.” Ginpaanggid sang isa ka pagtuon sa University Clinic of Göttingen, sa Alemanya, ang duha ka grupo sang mga pasyente nga gin-operahan sa mga tumor sa panit. Gintahi sa kinaandan nga paagi ang tissue sa idalom sang panit sang duha ka grupo. Apang ang pinakaibabaw nga anib sang panit sang isa ka grupo ginkipot paagi sa medikal nga mga siper, samtang ang mga pilas sang isa naman ka grupo ginkipot paagi sa kinaandan nga pagtahi. Manipis lang ang pinalian sang mga pilas nga ginsiperan kag masami nga wala sing makita nga “nagahagdanhagdan” nga pinalian.

Ang mga Nagasimba sa Canada Padayon nga Nagabuhin

“Sa Canada, ang pagkadirelihioso nagapangibabaw,” siling sang French Canadian nga manunulat nga si Yann Martel sa isa ka interbyu sang Publishers Weekly. Dugang pa, ang isa ka report sa The New York Times nagsiling nga sa Montreal “ang mga nagasimba madasig nga nagadiutay amo nga mga 18 ka simbahan sang nagligad nga tatlo ka tuig ang ginsira kag ginpabay-an ukon ginhimo nga mga kondominyum kag, ang isa ginhimo pa gani nga restawran.” Suno kay Marguerite Van Die, isa ka propesora sa teolohiya sa Queen’s University sa Kingston, Ontario, “isa ini ka katilingban diin ang relihion wala na sing impluwensia sa kultura.”

Ang mga Kilat sa Venezuela Nagabulig sa Ozone Layer

Bisan pa 90 porsiento sang ozone sa palibot sang duta naporma paagi sa ultraviolet radiation halin sa adlaw, ang 10 porsiento ginatuga sang pagpangilat. Kag pirme nagapangilat sa mga katunggan sang Catatumbo National Park, sa Zulia State, Venezuela. Ang The Daily Journal sa Caracas nagreport nga may “140 tubtob 160 ka adlaw nga pagpangilat” kada tuig sa rehiyon sang Catatumbo River. Ginapatihan nga ang methane, nga resulta sang pagkadunot sang mga pananom kag iban pa nga mga butang sa palibot sang mga sapa kag katunggan, nagasimpon sa manubo nga mga panganod kag sa malain nga tiempo nga ginatunaan sang mga kilat. Ang isa pa nga makawiwili tuhoy sa kilat sa Catatumbo amo nga tuman ini kalayo amo nga wala sing mabatian nga daguob. “Isa ini ka kinaugali nga hitabo nga indi masapwan sa iban nga bahin sang kalibutan,” siling sang Lost World Adventures Web site.

Mga Siudad nga may Pinakamahal nga mga Balaklon

Ang Tokyo, Moscow, kag Osaka amo ang mga siudad nga may pinakamahal nga mga balaklon sa bug-os nga kalibutan. Amo sini ang resulta sang isa ka pagtuon nga ginhimo sang Mercer Human Resource Consulting. Ginbinagbinag sang pagtuon, nga naglakip sa 144 ka siudad, ang bili sang kada isa sang kapin sa 200 ka produkto kag serbisyo, pati na ang balay, panapton, transportasyon, kalingawan, kasangkapan, kag kagamitan sa balay. Napulo sa 20 ka siudad nga may pinakamahal nga mga balaklon ang yara sa Asia. Ang Geneva, London, kag Zurich amo ang mga siudad nga may pinakamahal nga mga balaklon sa Europa, sunod sa Moscow. Ang New York amo ang ikanapulo nga siudad nga may pinakamahal nga mga balaklon, kag wala sing siudad sa Canada ang nalakip sa una nga 100. Sa mga siudad nga may pinakabarato nga mga balaklon, ang Asunción sa Paraguay amo ang nagapanguna sa listahan.