Butang nga Mas Maayo pa kay sa Reporma

KON ang usa ka kahoy mamungag walay pulos nga bunga, ang problema dili masulbad pinaagig pagpul-ong sa pipila ka mga sanga. Ang maong kahoy kinahanglang putlon ug lukahon ang mga gamot niini. Dayon kinahanglang itanom ang lain nga kahoy, usa nga mamungag maayong bunga.​—Mateo 7:16-20.

Sa mao gihapong katarongan, bisan kadtong mga repormador nga dungganon kaayog mga tumong naningkamot lamang sa pagsulbad sa mga simtoma sa suliran sa katilingban​—korapsiyon, inhustisya, kawalad-on, ug pagpangawat. Apan mas lalom pa gayod ang lintunganayng hinungdan. Ang kinahanglang usbon mao ang tibuok sistema. Kini mao ang gisaad sa Bibliya.

Ang Gingharian sa Diyos maoy usa ka langitnong kagamhanan nga mohimog labaw pa gayod kay sa pag-organisar pag-usab o pagreporma sa tawhanong katilingban. Kanang maong kagamhanan mogamit ug usa ka bag-o gayong pamaagi sa pagdumala sa tawhanong mga kalihokan, nga maghiusa sa tanang tawo nga nailalom sa pagmando niini. Sulbaron ning maong kagamhanan ang mga suliran bahin sa edukasyon, panarbaho, puy-anan, nutrisyon, panglawas, ug sa kalikopan.

Ang Salmo 72:12-14 naghubit sa matagnaong paagi kon unsay himoon sa Mesiyanikong Hari ngadto sa katawhan: “Pagaluwason niya ang kabos nga nagatuaw alang sa tabang, ingon man ang sinakit ug si bisan kinsa nga walay magtatabang. Maluoy siya sa timawa ug sa kabos, ug pagaluwason niya ang mga kalag sa mga kabos. Gikan sa pagpanglupig ug sa kapintasan tubson niya ang ilang kalag.”

Apan aron ang katilingban bug-os walay korapsiyon, inhustisya, ug kawalad-on, dayag nga dili lang ang kagamhanan mao ang kinahanglang usbon kondili ang katawhan usab. Busa, ang maong Gingharian maghatag sa matag tawo ug personal nga giya kon unsaon sa pagkinabuhi ug malipayon, makahuloganon, ug makapatagbaw nga kinabuhi. Ang Bibliya nagasaad nga tabangan sa Gingharian sa Diyos ang yutan-ong mga ginsakpan niini sa pag-usab sa ilang kaugalingon. Sa unsang paagi?

Ang Gingharian sa Diyos mag-edukar sa mga ginsakpan niini diha sa mga dalan ni Jehova nga Diyos, sa ingon magtabang kanila sa pag-ugmad ug pagtuo ug gugma. (Isaias 11:9) Ang gugma alang sa Diyos maoy mopalihok sa kasingkasing. Pananglitan, sa unang siglo, nahibalag ni Jesus si Zaqueo, usa ka pangulong maniningil ug buhis kinsa nangilkil ug salapi pinaagig dili-matinud-anong pagpausbaw sa buluhisan sa mga tawo. Wala pugsa ni Jesus kining maong daotan nga opisyal sa pag-usab sa iyang kinabuhi. Hinunoa, gitabangan ni Jesus si Zaqueo sa pag-ila sa kaugalingon niyang sayop ug sa paghinulsol. Napalihok si Zaqueo tungod sa tukmang kahibalo sa mga prinsipyo ug gugma sa Diyos. Siya mihimog talagsaong mga kausaban.​—Lucas 19:1-10.

Dili ba kana usa ka maayo kaayong sulbad sa mga kahuyangan sa katilingban? Usa ka hingpit, matarong nga kagamhanan ang moatiman sa mga kalihokan sa katawhan dinuyogan sa personal nga panukmod sa matag indibiduwal sa pag-usab sa iyang mga dalan. Nagkinahanglan pa ba unya kitag reporma nianang panahona? Dili na, tungod kay bag-ohon sa Diyos ang tanang butang. Ang unang mga butang moagi na.​—Pinadayag 21:​4, 5.

 [Mga hulagway sa panid 10]

Ang Gingharian sa Diyos mopahinabog bug-os nga kausaban, dili reporma

[Hulagway sa panid 11]

Samtang dinhi sa yuta, gitabangan ni Jesus ang mga tawo sa paghimog personal nga mga kausaban