Nasaysayaat Ngem Reporma

NO AGBUNGA ti kayo iti rinuker, saan a marisut ti problema no masip-ak laeng ti sumagmamano a sangana. Masapul a mapukan ti kayo ken mairamutan. Kalpasanna, maimula ti sabali a kayo, daydiay agbunga iti nasayaat.​—Mateo 7:16-20.

Gapu iti kasta met la a rason, uray dagiti repormador nga addaan iti katan-okan a kalat ti mangpadpadas laeng a mangrisut kadagiti sintoma ti dakes a mapaspasamak iti kagimongan​—panagkunniber, kinaawan iti hustisia, pannakaikapis kadagiti kasapulan iti biag, ken panagtakaw. Ngem naun-uneg pay nga amang ti ramutna. Masapul a masukatan ti intero a sistema. Kastoy ti ikari ti Biblia.

Ti Pagarian ti Dios ket maysa a nailangitan a gobierno a saan laeng a mangbalbaliw iti kasasaad, porma, organisasion, wenno urnos ti natauan a kagimongan. Rugianto dayta a gobierno ti naan-anay a baro a pamay-an ti panangtarawidwid kadagiti aramid ti tao, sa pagkaykaysaenna ti sangatauan nga agpaituray iti dayta. Asikasuento daytoy a gobierno ti edukasion, trabaho, pagtaengan, nutrision, salun-at, ken ti aglawlaw.

Naimpadtuan a deskribiren ti Salmo 72:12-14 ti aramidento ti Mesianiko a Pagarian iti sangatauan: “Ispalennanto daydiay napanglaw nga agpatpatulong, kasta met daydiay naparigatan ken siasinoman nga awanan katulongan. Isu maasianto iti daydiay nanumo ken iti daydiay napanglaw, ket dagiti kararua dagidiay napanglaw isalakannanto. Iti pannakairurumen ken iti kinaranggas subbotennanto ti kararuada.”

Ngem tapno naan-anay a mawayawayaan ti kagimongan iti panagkunniber, kinaawan iti hustisia, ken pannakaikapis kadagiti kasapulan iti biag, sigurado a saan laeng a ti gobierno ti agbalbaliw no di ket masapul met nga agbalbaliw ti tattao. Gapuna, isuronto ti Pagarian ti tunggal tao no kasano ti maaddaan iti naragsak, addaan panggep, ken makapnek a biag. Ikari ti Biblia a tulonganto ti Pagarian ti Dios dagiti iturayanna ditoy daga a mangbalbaliw iti bagida. Kasano?

Sursuruanto ti Pagarian dagiti iturayanna iti daldalan ni Jehova a Dios, isu a matulonganda a mangpatanor iti pammati ken ayat. (Isaias 11:9) Ti panagayat iti Dios tignayenna ti puso. Idi umuna a siglo, kas pagarigan, naam-ammo ni Jesus ni Zaqueo, a pangulo dagiti agsingsingir ti buis ken agkuskusit babaen ti panagsingirna iti nangina a buis kadagiti tattao. Saan nga imbabain ni Jesus daytoy rinuker nga opisial tapno balbaliwanna dagiti aramidna, no di ket tinulonganna ni Zaqueo a mangbigbig iti basolna ket agbabawi. Babaen iti umiso a pannakaammo kadagiti nadiosan a prinsipio, natignay ni Zaqueo nga agayat iti Dios. Nakaskasdaaw ti panagbalbaliwna.​—Lucas 19:1-10.

Saan aya a dayta ti nagsayaat a remedio ti biddut iti kagimongan? Maysa a naan-anay ken nalinteg a gobierno a mangasikaso kadagiti aramid ti sangatauan agraman ti personal a pannakatignay ti tunggal tao a mangbalbaliw kadagiti dalanna. Iti dayta a tiempo, kasapulan pay kadi ti reporma? Saanen, ta napagbalinton ti Dios a baro ti amin a banag. Dagiti immuna a banag napalabasdan.​—Apocalipsis 21:4, 5.

 [Dagiti Ladawan iti panid 10]

Saan a reporma ti iyeg ti Pagarian ti Dios, no di ket naan-anay a panagbalbaliw

[Ladawan iti panid 11]

Idi adda pay ditoy daga ni Jesus, tinulonganna dagiti tattao a mangaramid iti personal a panagbalbaliw