Hóbennan Sa Puntra . . .

Pakiko Dios Ta Laga Nos Sufri?

“Dios ta den shelu kaminda tur kos ta dushi, miéntras aki bou nos ta sufri.” —Mary. *

HÓBENNAN djawe a nase den un mundu kruel. Ta manera kos ku temblor trágiko i desaster natural ku ta mata míles di hende a bira kos di tur dia. Guera i atake terorista ta dominá notisia. Enfermedat, krímen i aksidente ta ranka nos sernan kerí for di nos. Mary, e hóben sitá ariba, a pasa personalmente den un tragedia asina. Ta despues di morto di su tata el a ekspresá su amargura.

Ora nos pasa den un tragedia, ta masha normal pa nos sinti nos frustrá, kibrá, òf asta rabiá. Kisas bo ta puntra bo mes: ‘Pakiko e kos aki a pasa? Pakiko nèt ami?’ òf ‘Pakiko nèt awor aki?’ Preguntanan asina meresé un kontesta satisfaktorio. Pero pa haña e kontestanan korekto, nos tin ku akudí n’e fuente korekto. Awor nos tin ku atmití sí ku, manera un hóben ku yama Turrell a remarká, tin biaha hende “tin asina tantu doló ku nan no por pensa ku klaridat riba un asuntu.” Pues lo bo tin ku buska un manera di kalma bo emoshonnan un tiki pa bo por pensa na un manera lógiko i huisioso.

 Kon pa Enfrentá Realidatnan Desagradabel

Kisas nan ta kosnan desagradabel pa pensa ariba, pero morto i sufrimentu ta parti di bida. Jòb tabatin rason ora el a bisa: “Hende ku a nase di muhé ta biba poko dia i ta yen di problema.”—Jòb 14:1.

Beibel ta primintí un mundu nobo den kua ‘hustisia lo biba.’ (2 Pedro 3:13; Revelashon 21:3, 4) Sin embargo, promé ku e kondishonnan ideal ei bira realidat, humanidat mester pasa dor di un tempu di maldat nunka bisto. Beibel ta bisa: “Sabi esaki, ku den e último dianan tempunan trabahoso lo bin.”—2 Timoteo 3:1.

Kon largu e tempunan difísil aki lo dura? Hesus su disipelnan a hasi mas o ménos e mesun pregunta. Pero Hesus no a bisa nan spesífikamente ki ora i ki dia e kondishonnan deplorabel aki lo kaba. En bes di esei, Hesus a bisa: “Esun ku perseverá te na fin, esei lo ta salbá.” (Mateo 24:3, 13) Hesus su palabranan ta animá nos pa mira kosnan for di un punto di bista di término largu. Nos mester ta prepará pa wanta hopi situashon desagradabel promé ku e fin yega.

Hende Por Kulpa Dios?

Tin sentido anto pa rabia ku Dios pa motibu ku e ta laga hende sufri? No ora bo konsiderá ku Dios a primintí di pone fin na tur sufrimentu. No tin sentido tampoko pa pensa ku ta Dios ta pone kosnan malu sosodé. Hopi suseso trágiko ta simplemente resultado di aksidentenan. Por ehèmpel, imaginá bo ku bientu basha un palu abou i heridá un hende. Algun hende lo bisa ku ta Dios por ke ku esaki a sosodé. Pero no ta Dios a pone e palu kai. Beibel ta yuda nos komprondé ku e kosnan ei ta simplemente e resultado tristu di “tempu i suseso imprevisto.”—Eklesiastés 9:11, NW.

Falta di sano huisio tambe por kousa sufrimentu. Suponé ku un grupo di hóben ta sinta bebe na nan antoho i despues ta bai dal un buèlta den outo bou di influensia di alkohòl. Un aksidente serio ta tuma lugá. Ta ken su falta? Ta di Dios? Nò, pasobra nan a kosechá e konsekuensia di nan mes falta di sano huisio.—Galationan 6:7.

Podisé bo ta puntra: ‘Pero Dios no ta sufisiente poderoso pa pone fin na sufrimentu aworakí?’ Algun hende fiel den tempu bíbliko a hasi nan mes e pregunta ei. Profeta Habakuk a puntra Dios: “Pakiko bo ta wak ku toleransia riba esnan ku ta trata ku traishon? Pakiko bo ta keda ketu ora ku e malbadonan ta traga esnan ku ta mas hustu ku nan?” Pero tòg Habakuk no a saka konklushon muchu lihé. El a bisa: “Lo mi spera pa mira kiko e lo papia ku mi.” Despues, Dios a garantis’é ku na un “tempu stipulá” lo E pone fin na sufrimentu. (Habakuk 1:13; 2:1-3) P’esei nos mester tin pasenshi i warda pa Dios pone fin na maldat na su tempu stipulá.

Evitá di konkluí muchu lihé ku di un manera òf otro Dios kier pa nos sufri òf ku e ta bezig ta tèst nos personalmente. Echo ta ku sufrimentu por pone nos mihó kualidatnan sali na kla i Beibel ta bisa ku e pruebanan ku Dios ta permití por refiná nos fe. (Hebreonan 5:8; 1 Pedro 1:7) Sí, hopi hende ku ta pasa den eksperensianan difísil òf troumátiko ta haña mas pasenshi òf kompashon. Pero nos no mester konkluí ku ta Dios a kousa nan sufrimentu. E manera di pensa ei no ta tene kuenta ku nos Kreadó ta un Dios di amor i sabiduria. Beibel ta bisa bon kla: “No laga ningun hende bisa ora ku e wòrdu tentá: ‘Mi ta wòrdu tentá dor di Dios.’ Pasobra Dios no por wòrdu tentá dor di maldat, i e mes no ta tenta ningun hende.” Al kontrario, for di Dios nos ta haña “tur bon regalo i tur don perfekto”!—Santiago 1:13, 17.

Pakiko Dios Ta Permití Maldat

Di unda, anto, maldat ta bini? Kòrda ku Dios tin oponente—prinsipalmente esun “kende ta wòrdu yamá Diabel i Satanas, kende ta gaña henter mundu.” (Revelashon 12:9) Dios a pone nos promé mayornan, Adam ku Eva, den un mundu liber di problema. Pero Satanas a konvensé Eva ku sin e gobernashon di Dios lo bai e mihó. (Génesis 3:1-5) Lamentablemente, Eva a kere e mentiranan di Satanas i a desobedesé Dios. Adam a djòin e den e rebelion aki. Kiko tabata e resultado? Beibel ta bisa ku “morto a pasa pa tur hende.”—Romanonan 5:12.

 En bes di kaba mesora ku e rebeldia ei dor di destruí Satanas i su kompinchinan, Dios a haña ku ta mihó pa laga tempu pasa. Kiko el a logra? Un kos ku el a logra sigur ku esei ta ku Satanas a keda desenmaskará komo un mentiroso! Dor di esei tambe awor hende lo tin sufisiente prueba ku independensia for di Dios ta desastroso. Esei no ta eksaktamente loke a tuma lugá? “Henter mundu ta bou di kontròl di e malbado.” (1 Juan 5:19) Ademas, “hende a ehersé outoridat riba . . . otro hende pa su daño.” (Eklesiastés 8:9) Religionnan di humanidat ta un tutu di siñansanan kontradiktorio. Balornan moral a alkansá e nivel di mas abou. Hende a purba ku tur sorto di gobièrnu ku bo por imaginá. Nan ta firma tratadonan i adoptá leinan, pero te ainda nan no a logra satisfasé e nesesidatnan di e hende komun. Loke ta hasi e miseria pió ta e gueranan.

Ta keda bon kla anto ku Dios mester intervení i pone fin na maldat! Pero ta na e debido tempu di Dios esaki lo tuma lugá. Tanten e dia ei no yega, nos tin e privilegio pa sostené e gobernashon di Dios dor di obedesé su lei- i prinsipionan den Beibel. Ora mal kosnan sosodé, nos por haña konsuelo den e speransa sigur di bida den un mundu liber di problema.

No Ta Abo So

Tòg, ora nos ta pasa den sufrimentu, kisas nos ta puntra nos mes, ‘Pakiko nèt ami?’ Sin embargo, apòstel Pablo ta rekordá nos ku no ta nos so ta sufri maldat. Pablo ta bisa ku “henter e kreashon ta keha i ta sufri e dolónan di parto huntu, te awor.” (Romanonan 8:22) E echo ku bo ta konsiente di esaki por yuda bo trata ku e sufrimentu. Por ehèmpel, e atakenan terorista di 11 di sèptèmber 2001 na New York i Washington, D.C., a laga Nicole emoshonalmente troumatisá. E ta atmití: “Mi a keda den shòk i spantá.” Pero ora el a lesa kon su rumannan kristian a enfrentá e tragedia ei, su punto di bista a kambia. * “Mi a realisá ku di bèrdat mi no ta mi so. Pokopoko pero sigur mi a kuminsá rekuperá di mi doló i tristesa.”

Den algun kaso, ta sabí pa buska un hende ku bo por papia kuné—un mayor, un amigu maduro òf un ansiano kristian. Ora bo deshogá bo kurason na un persona ku bo ta konfia, lo bo por haña un “bon palabra” di animashon. (Proverbionan 12:25) Un hóben kristian di Brazil ta kòrda: “Mi a pèrdè mi tata nuebe aña pasá, i mi sa ku Yehova lo resusit’é un dia. Pero un kos ku a yuda mi tabata di pone mi sintimentunan riba papel. Tambe mi tabata papia e kosnan aki ku mi amigunan kristian.” Abo tin berdadero “amigu” den ken bo por konfia? (Proverbionan 17:17) Si ta asina, probechá di nan yudansa amoroso! No tene miedu di yora òf ekspresá bo emoshonnan. Hesus mes “a yora” morto di un amigu!—Juan 11:35.

Beibel ta sigurá nos ku un dia nos lo wòrdu “librá for di . . . sklabitut na korupshon” i disfrutá di “e libertat glorioso di e yunan di Dios.” (Romanonan 8:21) Miéntras tantu, hopi bon hende lo por sufri. Pero e echo ku bo ta konsiente pakiko hende ta sufri i ku esei lo no dura hopi mas, mester ta un konsuelo pa bo.

[Nota]

[Plachi na página 24]

Lo ta bon pa ekspresá bo tristesa