Manipud Kadagiti Agbasbasa

Pornograpia Pagyamanan kadagiti serye a “Pornograpia​—Makadangran Aya Wenno Saan?” (Hulio 22, 2003) Kasapulak daytoy direkta a balakad. Nabiit pay a nagbalinak a Kristiano isu a managbuyaak idi iti pornograpia. Nakatulong kaniak dagiti artikulo tapno ad-adda a maawatak no kasano a makadangran dayta ken no ania dagiti nainget a pamuspusan tapno maisardengko ti pannakaadiktok.

E. P., Estados Unidos

Dua a tawenen ti napalabas, narakrak ti 22 a tawen a naragsak a panagasawak gapu iti diborsio. Gapu iti pornograpia, pinanawannakami ti nasingpet idi nga asawak ken nadungngo nga ama ti annakko. Gapu iti nakaro a pannakaadiktona, nagbalbaliw ti ugalina. Nagbalin a naunget, managulbod, ken nauyong ti dati a nadungngo ken nasingpet nga asawak. Pagarupko no sisiak idi ti agsagsagaba kadagiti epekto ti pornograpia, ngem maamirisko itan nga adu ti maap-apektaran iti dayta a parikut. Pagyamanan iti daytoy nagsayaat ti pannakaisuratna a serye.

L. T., Estados Unidos

Sakbay a nagadalak iti Biblia, adiktoak iti pornograpia iti nasurok a sangapulo a tawen. Aniaman ti ibagbaga dagiti mangitantandudo iti dayta, naan-anay nga awan ti pagimbaganna. Sakbay a nagbalinak a Saksi ni Jehova, adiktoak iti dandani amin a gagangay a droga. Kadagiti amin a nakaadiktuak, ti pornograpia ti karirigatan nga isardeng. Pangngaasiyo ta itultuloyyo ti mangipablaak kadagiti artikulo a kas iti daytoy.

J. A., Estados Unidos

Agimtuod Dagiti Agtutubo Naimpusuan nga agyamanak gapu iti artikulo nga “Agimtuod Dagiti Agtutubo . . . Apay a Mariknak a Rumbeng nga Agbalinak a Perpekto?” (Hulio 22, 2003) Agtawenak iti 25 ken maysaak nga ebanghelisador iti amin a tiempo. Sipud idi ubingak, ipadpadisko ti bagik kada manong ken manangko nga uppat ken tallo a tawen nga in-inauna ngem siak. Managbabainak unay ken impagarupko nga awan ti serserbik. Tapno madaerak dagitoy a rikna, inkagumaak ti agbalin a perpeksionista. Siuumiso ti panangdeskribir daytoy nga artikulo iti riknak. Kayatkon a balbaliwan ti panagpampanunotko.

M. Y., Japan

Sangapulo ket innem ti tawenko ken nabiit pay a nadayagnos nga addaanak iti depression. Kanayon idi nga aramidek ti bambanag nga awan pakapilawanda, ken masansan a tagibassitek ti bagik gapu ta saanak a naballigi. Dimteng daytoy nga artikulo iti umiso a tiempo. Agsangsangitak bayat a basbasaek dayta. Diak pulos impagarup a makidangdangadang met ti adu pay a sabsabali iti isu met la a rikna. Pagyamanan iti serye ti “Agimtuod Dagiti Agtutubo.” Segseggaak ti sumaganad nga artikulo.

L. S., Estados Unidos

Dagiti Zebra Mussel Sangapulo ket dua ti tawenko, ket talaga a nagustuak ti artikulo a “Dagiti Peste a Makadalus.” (Hulio 22, 2003) Nasdaawak ta makayitlog gayam ti kabaian iti 500,000 iti kada tawen ken adda agarup 700,000 a mussel iti maysa a metro kuadrado. Masapul nga ipategtayo ti baybay agsipud ta dayta ti pagnanaedan dagiti zebra mussel ken dadduma pay a parsua. No aramidentayo dayta, ipakpakitatayo met nga ipatpategtayo ni Jehova a Dios. Pangngaasiyo ta itultuloyyo ti agsurat kadagita a makapainteres nga artikulo!

E. T., Italia

Dagiti Daan a Ruar Nabiit pay a nadayagnos nga adda Parkinson’s disease ti nataenganen nga anakko a babai. Nakasarakak iti artikulo maipapan iti daytoy a sakit iti Enero 8, 1988, a ruar ti Agriingkayo! Namin-adu a binasami a sangapamiliaan ti artikulo a kaduami ti anakko. Gapu itoy, natulongankami a mangsango iti dayta a kasasaad. Masansan a mangipadamag ti Agriingkayo! kadagiti sakit nga ita pay la a naammuanmi, isu a makaparegta unay dagitoy nga artikulo kadagiti maap-apektaran kadagita a sakit. Naimpusuan nga agyamanak iti trabahoyo.

E. M., Japan