For di Nos Lektornan

Pornografia Danki pa e seri “Pornografia—Inofensivo òf Perhudisial?” (8 di ougùstùs 2003) Mi tabatin mester di e konseho franko aki. Promé ku mi a bira un kristian, pa hopi tempu mi a wak pornografia. E artíkulonan a yuda mi mira mas kla ku nunka kon perhudisial e ta i ki pasonan desisivo bo tin ku tuma pa bo libra bo mes di e adikshon aki.

E. P., Merka

Dos aña pasá mi matrimonio felis di 22 aña a kaba na divorsio. Pornografia literalmente a ranka un esposo maravioso i tata amoroso for di nos. E adikshon teribel aki a pone un persona ku tabata bondadoso i amabel bira krepchi, mentiroso i bestial. Mi tabata sinti ku ta mi so ta víktima di pornografia, pero awor mi ta realisá ku e ta un krísis ku ta afektá hopi hende. Danki pa boso artíkulonan informativo.

L. T., Merka

Promé ku mi studia Beibel, mi tabata adikto na pornografia pa mas ku 10 aña. Apesar di kiko ku esnan ku ta boga p’e ta pretendé, no tin nada-nada positivo den dje. Promé ku mi a bira un Testigu di Yehova, mi tabata adikto na kasi tur droga prinsipal. Di tur mi adikshonnan, pornografia tabata esun di mas difísil pa vense. Sea asina bon di sigui publiká e tipo di artíkulonan aki.

J. A., Merka

Hóbennan Sa Puntra Mi ta gradisí boso di henter mi kurason pa e artíkulo “Hóbennan Sa Puntra . . . Dikon Mi Ta Sinti Ku Mi Mester Ta Perfekto?” (8 di ougùstùs 2003) Mi ta un predikadó di tempu kompletu di 25 aña di edat. For di tempu mi tabata chikitu, mi tabata kompará mi mes ku mi ruman muhé ku ta kuater aña mas grandi ku mi, i ku mi ruman hòmber ku ta pasa mi ku tres aña. Mi a lucha ku un kompleho di inferioridat, pensando ku mi no ta bal nada. Pa kombatí e sintimentunan aki, mi a purba di ta perfekto. E artíkulo aki a deskribí eksaktamente kon mi ta sinti. Mi ke kambia mi manera di pensa.

M. Y., Hapon

Mi tin 16 aña, i dòkternan a kaba di diagnostiká ku mi ta sufri di depreshon. Semper mi a purba di hasi kosnan a la perfekshon, i hopi bes mi ta kondená mi mes komo un hóben frakasá. E artíkulo aki a yega nèt na ora. Ora mi tabata les’é, mi no por a stòp di yora. Nunka mi a realisá ku hopi otro hende ta lucha ku e mesun sintimentunan. Danki p’e seri “Hóbennan Sa Puntra.” Mi ta ansioso pa haña e siguiente artíkulo.

L. S., Merka

Uso di Droga Masha danki pa e seri “Kiko Bo Por Hasi si Bo Famia Ta Usa Droga?” (8 di aprel 2003) Mi ta studiando Beibel ku Testigunan di Yehova pa algun tempu kaba, pero debí n’e problema aki mi no por a progresá spiritualmente. Ora mi a lesa e kuadro “Yudansa pa Usadónan di Droga Ku Ta Rekuperando,” mi a realisá ku si mi ke logra den mi esfuersonan pa rekuperá, mi tin ku lesa Beibel tur dia i apliká su prinsipionan. Tambe, e echo ku mi sa ku Dios tin interes den mi a konmové mi.

R.S.A., Brazil

Edishonnan Mas Bieu Resientemente dòkternan a konstatá ku mi yu muhé adulto tin e malesa di Parkinson. Mi a haña un artíkulo riba e malesa aki den e Spièrta! [na spañó] di 8 di yanüari 1988. Henter nos famia a lesa e artíkulo vários biaha huntu ku mi yu muhé. Dor di esei, nos a logra enfrentá nos situashon na un manera kalmu. Ounke e artíkulo aki a ser skirbí mas ku 15 aña pasá, nos a benefisiá hopi for di dje. De bes en kuando, Spièrta! a splika tokante malesanan ku nunka nos no a tende di dje, i e artíkulonan aki mester ta un tremendo animashon pa esnan ku ta sufri di e malesanan ei. Mi ta gradisí boso di kurason p’e trabou ku boso ta hasi.

E. M., Hapon