E Sukunan di Bida

SUKU—probablemente bo ta usa suku den hopi kos; entre otro den bolo, kòfi, etcetera. Pero bo tabata sa ku suku por kuminsá un revolushon den biologia ku por ta igual ku e revolushon ku e deskubrimentu di DNA a krea?

Resientemente sientífikonan a studia kon sèlnan ta usa suku simpel manera glucose pa traha molekül gigantesko “ku na tamaño i komplehidat ta meskos ku DNA i proteina,” segun e revista New Scientist. “Kasi tur aspekto di biologia tin di haber ku suku, por ehèmpel, rekonosé vírus, kuaha sanger, i yuda sèl di spèrma drenta eisèl.” Na mesun tempu, defektonan den nan komposishon a ser relashoná ku un kantidat oumentante di enfermedat, manera debilidat muskular (‘spierzwakte’) i reumatismo di artrítis. Segun e informe: “Ta awor numa biólogonan a kuminsá komprondé ki efekto e sukunan aki tin riba e kurpa humano, pero den e proseso nan ta haña nan ta bolbe pensa riba e ideanan di hopi tempu atras tokante kon bida ta funshoná.”

Sientífikonan a inventá e palabra “glycome” pa referí n’e sèt kompletu di suku ku un sèl òf un organismo ta produsí, meskos ku e palabra “genome” ta enserá henter e sèt di gene. Sin embargo, e glycome di un sèl ta “probablemente míles di biaha mas kompliká ku e genome,” segun Ajit Varki, direktor di e Sentro di Investigashon i Formashon di Glycobiologia n’e Universidat di California, San Diego, Merka. Pakiko e glycome ta asina kompliká?

Den sèlnan, sukunan simpel—monosakarida—ta pega huntu pa forma polisakarida. Esakinan, na nan turno, ta wòrdu usá pa forma molekül gigantesko ku por kontené mas ku 200 unidat di sukunan mas simpel. Pa motibu di e manera tridimenshonal den kua e sukunan aki ta konfigurá, ku ta masha importante pa nan funshon, “un molekül di suku ku ta konsistí di apénas seis unidat por yega n’e kantidat asombroso di 12 mil mion posibel struktura,” segun New Scientist.

Varki a deskribí e problemanan formal ku investigadónan ta haña nan kuné den e kampo nobo aki, ku yama glycobiologia, bisando: “Ta manera kos ku nos a kaba di deskubrí e kontinente di Norteamérika. Awor nos tin ku manda eksploradónan pa haña sa kon grandi esaki ta.”

Klaramente, e mekanismonan kompliká di sèl bibiente ta indiká un inteligensia supremo. Serka hopi hende, e echo aki ta lanta un sintimentu di temor respetuoso. Abo ta sinti meskos?—Revelashon 4:11.