Pagtudlo Kang Kristi sa Paghigugma sa Diyos

ANG among anak nga babaye, si Kristi, natawo sa 1977. Wala madugay human niadto, gisultihan kami sa among doktor sa makapasubong balita: si Kristi natawo nga halos bungol ug adunay dili-grabeng matang sa cerebral palsy. Kami wala gayoy ideya nga kini dako kaayog epekto sa among kinabuhi.

Paglabay sa pipila ka bulan, ang akong bana nga si Gary ug ako nagsugod pagtambong sa linaing mga klase didto sa siyudad sa Melbourne, Australia, diin kami nagtuon kon unsaon pagpakigkomunikar ug pagtudlo sa among anak. Miadto usab kami sa National Acoustic Laboratory sa Melbourne. Didto, si Kristi, nga napulo pa lang ka bulan, gitaoran ug gagmayng mga hearing aid. Dili siya gusto niini, ug kay kini aduna may gagmayng mga alambre, hulboton dayon niya kini human namog taod niini sa iyang gagmayng mga dalunggan! Aduna usab siyay ibakos nga baterya, nga medyo bug-at.

Tungod sa cerebral palsy, naglisod si Kristi sa pagkat-on ug lakaw. Busa, gikinahanglan niya ang senemanang sesyon uban sa physical therapist. Apan pag-edad ug tulo, makalakaw na si Kristi, bisan tuod daghang beses siya nga natumba. Gipadayon ang physical therapy hangtod nga siya nag-singko anyos. Kasamtangan, mibalhin mig puyo sa duol nga lungsod sa Benalla, diin nagpalakaw si Gary ug negosyo.

Pagtudlo Kang Kristi

Gisultihan kami sa usa ka magtutudlo sa mga bungol nga si Kristi nagkinahanglan ug linaing matang sa edukasyon. Nagpasabot kana ug lain na usab nga pagbalhin, niining tungora sa Bendigo, usa ka siyudad nga adunay tunghaan alang sa mga bungol. Sanglit ako nagsabak sa among ikaduhang anak, wala kami mobalhin dayon hangtod nga si Kristi nagkuwatro anyos ug ang among anak lalaki, si Scott, lima ka bulan. Sa usa ka ospital sa Bendigo, ang senemanang mga sesyon sa pagtuon sa pagsulti gisugdan​—usa ka pagtuon nga miabot ug napulo ka tuig. Si Gary ug ako nagsugod usab sa pagtuon ug sign language.

Ang among gikabalak-an pag-ayo mao ang espirituwal nga edukasyon ni Kristi. Abi god ninyo, si Gary ug ako maoy mga Saksi ni Jehova, ug determinado kami sa pagmatuto kang Kristi diha “sa disiplina ug sa pagdumala-sa-kaisipan ni Jehova.” (Efeso 6:4) Apan unsaon namo paghimo kana? Ang prinsipal sa tunghaan ni Kristi miingon: “Ang pagtudlo kang Kristi bahin sa Diyos mao ang kinalisoran nga itudlo. Ang Diyos dili makita, busa unsaon nimo pagpatin-aw ang Diyos ngadto kaniya?” Pagkadako sa problema nga giatubang namo niadto! Sa ngadtongadto among nahibaloan nga ang pagtudlo kang Kristi nagkinahanglan ug daghan kaayong panahon, pagtuon, ug pailob.

Sa primero, migamit kami ug mga larawan ug mga drowing, nga gihimo kana nga simple kaayo kutob sa maarangan. Ginadala namo siya sa Kristohanong mga tigom ug sa buluhatong pagsangyaw, bisan tuod wala siyay kalibotan kon unsay nagakahitabo. Sa dihang si Kristi nahanas sa sign language, daghang bag-ong mga butang ang iyang nasabtan ug nasinati nga wala niya mahimo sukad! Bisan pa niana, daghang pulong, prase, ug mga hunahuna sa Bibliya nga lisod ipatin-aw. Ang usa sa iyang paboritong libro mao ang Akong Basahon sa mga Estorya sa Bibliya, a nga gisulat gayod para sa mga bata. Ang mabulokong mga hulagway​—uban sa among  gihimo nga mga drowing​—mapuslanon kaayo. Sa ngadtongadto, ang gugma alang sa Diyos misugod sa pagtubo sa kasingkasing ni Kristi.

Ang prinsipal sa tunghaan ni Kristi malulotong naghikay nga makontak namo ang ubang mga Saksi nga nagmatuto ug bungol nga mga anak. Usa ka dakong higayon sa pag-uswag ang mitungha sa dihang ilang gisaysay kon unsaon pagsangyaw sa mga tawong bungol ngadto sa mga tawong makadungog. Ang usa ka paagi mao ang pagtunol nila ug kard nga adunay pinatik nga mensahe sa Kasulatan. Busa sa dihang si Kristi andam na sa pagpakig-ambit sa mga kamatuoran sa Bibliya ngadto sa uban, wala gayod siya maglisod sa paghimo niana! Nahimo siyang dili-bawtismadong magmamantala sa maayong balita sa edad nga 14. Sa 1994, nabawtismohan siya sa edad nga 17.

Bisan pa niana, gikinahanglan ni Kristi ang maayong panag-ubanay, ug naglisod siya sa pagpakighigala uban sa mga Saksi nga makadungog. Busa kami ni Gary nagsugod paghimog mga klase sa sign language alang sa mga kauban namo sa kongregasyon nga interesadong motabang sa mga bungol. Ang pipila niadtong miapil sa among mga klase nakakita sa ulahi ug trabaho ingong tighubad alang sa mga bungol. Apan labawng hinungdanon, daghan niadtong nakahibalo sa pagsenyas nalipay kaayo sa pagpakigkomunikar kang Kristi. Karon makapahimulos nag maayo si Kristi gikan sa among Kristohanong mga tigom ug mga asembliya. Hangtod karon, aktibo siya sa pagpakigbahin niana. Mapasalamaton kaayo si Kristi sa mahigugmaong kaikag nga gipakita sa mga igsoon diha kaniya.

Usa ka adlaw, gipadayag ni Kristi kanamo ang iyang tinguha sa pagkahimong regular payunir, o bug-os panahong magwawali. Gitabangan siya ni Gary sa pagkuhag lisensiya sa pagdrayb, ug human mahikay ang ubang mga butang, si Kristi natudlo ingong regular payunir niadtong 1995. Sa 2000, siya nakabaton usab ug part-time nga trabaho sa usa ka tunghaang elementarya. Didto, nagtabang-tabang siya sa pagtudlo sa mga batang bungol.

Karon si Kristi, Gary, among anak nga si Scott, ug ako nakaambit sa kalipay sa pag-alagad ingong regular nga mga payunir. Nalipay mi sa paggugol ug panahon sa pagtudlo sa mga tawo bahin sa among Diyos, si Jehova!

‘Ang mga Hangyo sa Among mga Kasingkasing’

Ang pagkabungol ni Kristi maoy usa gihapon ka hagit kanamong tanan. Usahay, sa dihang si Kristi makigbahin sa Kristohanong ministeryo, walay usa ang makahubad alang kaniya, walay usa nga iyang kasultihan sa iyang mga hunahuna ug mga pagbati. Siya miingon: “Morag nagpuyo ako sa laing nasod diin ang tanan nagsulti ug laing pinulongan.” Bisan pa niana, kaming tanan nakakat-on sa pagdumalag maayo sa iyang kahimtang.

Nakahatag kanamo ug kahupayan ang mga pulong sa Salmo 37:4: “Magbaton ka usab ug tumang kalipay diha kang Jehova, ug ihatag niya kanimo ang mga hangyo sa imong kasingkasing.” Si Kristi nangandoy gayod nga makadungog sa tunog sa musika ug sa tingog sa kinaiyahan ug sa pagsulti nga madunggan sa iyang mga minahal. Nangandoy ako sa panahon nga si Kristi makabati sa akong tingog. Kami adunay pagtuo nga kining mga hangyo sa among kasingkasing matuman sa dili madugay, sumala sa gisaad sa Bibliya.​—Isaias 35:5.​—​Tinampo.

[Footnote]

[Hulagway sa panid 14]

Si Kristi, sa 14 ka bulan, nga naghawid sa “Akong Basahon sa mga Estorya sa Bibliya”

[Hulagway sa panid 15]

Si Kristi nga nagsangyaw sa maayong balita nga naggamit ug pinatik nga kard

[Hulagway sa panid 15]

Si Scott, Kristi, Gary, ug Heather Forbes karon