Vakavulici o Kristi me Lomana na Kalou

NA LUVEI keirau yalewa o Kristi, a sucu ena yabaki 1977. Sega ni dede a tukuna vei keirau na neitou vuniwai e dua na itukutuku rarawataki dina: o Kristi e sucu didivara qai tauvi koya vakalailai na cerebral palsy. Sega ni keirau siqema ena gauna oya na levu ni veiveisau ena kauta mai ena neitou bula.

Ena vica na vula e muri, keirau sa dau lai tiko kei Gary na watiqu ena dua na vuli ena korolevu o Malevani, e Ositerelia. E kea keirau vulica na sala me keirau veitaratara kina kei na luvei keirau, me rawa tale ga ni keirau vakavulici koya. Keirau a lako tale ga ina National Acoustic Laboratory e Malevani, me lai tokara kina o Kristi, se qai vula tini, e dua na irogorogo lailai. E sevaka na tokara ni tu na kena wa, ni vakaciqiri yani e daligana ena dreta laivi, ena kena totolo duadua keirau na ciqira lesu tale! Ena dara tale ga na beleti me taura na kena batiri ni sa rui bibi.

Ena vuku ni mate na cerebral palsy, e dredre kina vei Kristi me vuli lako. Oya na vuna e veimacawa ena vakavulici koya na kenadau ni vakaukauayago. Bau lako rawa kina o Kristi ni sa yabaki tolu, dina ni levu na gauna e bale. E dau vakaukauayago tiko me yacova ni sa yabaki lima. Ena gauna vata oqori keitou a toki ena tauni lailai o Benalla, e vakabisinisi e kea o Gary.

Vuli o Kristi

E dua na qasenivuli ni didivara a tukuna vei keirau ni na gadrevi na nodra veivuke na kenadau ena vuli i Kristi. E tiko ena siti o Bendigo e dua na nodra koronivuli na didivara, kena ibalebale oqo ni keitou sa na toki e kea. Ia keitou mani sega ni toki​—niu sa tikobibi tale ena ikarua ni luvei keirau—​me yacova sara ni sa yabaki va o Kristi qai vula lima o Scott. Ena dua na valenibula e Bendigo, e dau vakavulici kina o Kristi e veimacawa me kila na vosa​—oqo ena taura e tini tale na yabaki. Keirau mani tekivu vulica tale ga kina kei Gary na vosa vagalu.

Ia, na ka keirau kauaitaka vakalevu me vakavulici o Kristi ena veika vakayalo. Ni keirau iVakadinadina i Jiova kei Gary, keirau saga me keirau tuberi Kristi “e na vunau kei nai vakavuvuli ni Turaga [o Jiova].” (Efeso 6:4) Keirau na cakava vakacava oqo? Na qasenivuli liu ni koronivuli i Kristi e kaya: “Na ka dredre duadua na nona vakavulici o Kristi me kila na Kalou. Nida sega ni raica na Kalou, ena vakavulici vakacava vua?” Oqo e dua na ka ni bolebole levu! Keirau kila ni nona vakavulici o Kristi ena vinakati kina vakalevu na gauna, na vuli, kei na vosota.

Ni qai tekivu, keirau dau vakayagataka ga na vosa rawarawa vaka kina na iyaloyalo kei na droini. Keirau dau kauti koya ena soqoni vakarisito kei na cakacaka vakavunau, dina ga ni sega ni kila na ka e caka tiko. Ni sa kila o Kristi na vosa vagalu, sa tekivu e dua na bula vou vua, ni oqo sa rawa ni kila qai cakava tale ga na ka e sega ni cakava rawa e liu! Ia, e levu na vosa, iyatuvosa, kei na vakasama vakaivolatabu e dredre ni vakamacalataki. E dua vei ira na ivola e dau taleitaka na iTalanoa mai na iVolatabu, * e tabaki sara ga me baleti ira na gone. E yaga tale ga na iyaloyalo rokataki  kei na so na droini keirau cakava. Toso na gauna sa tekivu kadre e loma i Kristi nona lomana na Kalou.

A vukei keirau na qasenivuli liu nei Kristi me keirau veitaratara kei na so na iVakadinadina i Jiova e didivara tale ga na luvedra. E dua na toso levu vei keitou nira vakamacalataka na iVakadinadina na sala e rawa nira vunau kina na didivara vei ira na daliga rogo. Dua na sala, oya na kena soli vei ira e dua na card e tabaki tu kina na itukutuku mai na iVolatabu. Ena rawarawa vei Kristi me cakava oya me wasea kina na ka dina ena iVolatabu vei ira tale e so! A yaco gona me dua na dautukutuku bera ni papitaiso ni sa yabaki 14. Ena 1994 sa qai papitaiso, oya ni sa yabaki 17.

E gadreva o Kristi na veimaliwai e veitaraicake, ia a dredre vua me bucina na veitokani kei ira na iVakadinadina era sega ni didivara. Keirau mani tekivutaka kina kei Gary ena neitou ivavakoso na vakavulica na vosa vagalu vei ira era taleitaka mera vukei ira na didivara. So gona era a vulica na vosa vagalu era sa cakacaka saumi, ena nodra dau vakadewa vei ira na didivara. Ia, na ka e bibi sara, oya ni levu vei ira era vulica na vosa vagalu era taleitaka vakalevu na veivosaki kei Kristi. Yaco me yaga vakalevu sara vei Kristi na soqoni vakarisito, soqo ni tabacakacaka, kei na soqo ni tikina. Me yacova mai nikua, e sega ni dua na soqo vaka oqo e dau calata. E vakavinavinaka vakalevu o Kristi ena nodra dau kauaitaki koya vakayalololoma na mataveitacini.

Dua na siga a vakaraitaka vei keirau o Kristi ni vinakata me na dua na painia tudei se cakacaka vakaitalatala vakatabakidua. A vukei koya o Gary me dua nona laiseni ni draiva, e tuvanaki e so tale na ka me baleti koya, ni oti oya sa qai lesi o Kristi ena 1995 me dua na painia tudei. A rawa tale ga vua me cakacaka vagauna ena yabaki 2000, ena dua na nodra koronivuli na murivuli. E dau lai veivuke ena nodra vakavulici na gone didivara.

Nikua, keitou taleitaka vakalevu vakavuvale na neitou sa painia tudei kece tiko. Keitou marautaka dina ni rawa me keitou vakayagataka na gauna ena nodra vakavulici na tamata mera kila na noda Kalou o Jiova!

‘Na Ka sa Gadreva na Yalo i Keitou’

Na didivara i Kristi e ka ni bolebole vei keitou kece. Ena so na gauna ni lako ena cakacaka vakavunau e sega ni dua e tiko me vakavakadewa vua, se tiko e dua me rau veikilai vosa. E kaya: “Vaka sara ga au bula tiko ena dua na vanua e duatani na nodra vosa.” Dina ni vaka oya, ia keitou kila na ka me keitou cakava ena ituvaki keitou sotava tiko oqo.

E vakacegui keitou na veivosa ena Same 37:4: “Mo rekitaki Jiova; ena solia vei iko ko koya na ka sa gadreva na yalomu.” E vakanuinui tu o Kristi ina gauna e sa na rawa ni rogoca kina na ivakatagi, na irorogo ni veika buli, kei na nona rawa tale ga ni veivosaki kei ira na wekana lomani. Au namaka tu na siga sa na rawa ni rogoci au kina o Kristi. Keitou vakabauta dei tu ni sa na voleka sara ni yaco na veika e gadreva na yalo i keitou, me vaka ga e yalataki tu ena iVolatabu.​—Aisea 35:5.​—Cautaki mai.

[iVakamacala e ra]

[iYaloyalo ena tabana e 16]

O Kristi ni se qai vula 14, kei na ivola na “iTalanoa mai na iVolatabu”

[iYaloyalo ena tabana e 17]

Wasea tiko na itukutuku vinaka o Kristi ena nona vakayagataka na card

[iYaloyalo ena tabana e 17]

O Scott, o Kristi, o Gary, kei Heather Forbes nikua