Kon Nos A Siña Kristi Stima Dios

NOS yu muhé, Kristi, a nase na 1977. Poko despues, nos dòkter a duna nos masha mal notisia: Kristi a nase kasi kompletamente surdu i ku un forma leve di parálisis selebral. Nos no por a imaginá ki efekto esaki lo tabatin riba nos bida.

Un par di luna despues, ami ku mi esposo Gary, a kuminsá asistí na un lès spesial den e stat di Melbourne, Oustralia, kaminda nos a siña kon pa trata ku nos yu muhé. Tambe nos a bishitá e Laboratorio Akústiko Nashonal na Melbourne. Einan nan a duna Kristi, ku e tempu ei tabatin 10 luna, aparatonan chikititu di oido. E no tabatin lei ku e aparatonan, i komo ku nan tabatin waya pegá na nan, e tabata ranka nan saka for di su orea asina ku nos hinka nan aden! Tambe e mester a bisti un harnas spesial pa wanta e baterianan ku tabata basta pisá.

Debí na e parálisis selebral, Kristi tabatin problema pa siña kana. Esei a pone ku e mester a haña vários tratamentu pa siman di terapia físiko. Pa ora ku Kristi tabatin tres aña el a kuminsá kana su so, maske e tabata kai hopi biaha. E terapia físiko a sigui te ora ku e tabatin sinku aña. Entre tantu, nos a muda pa Benalla, un stat djis pegá, kaminda Gary tabatin su negoshi.

Kristi Su Edukashon

Un maestro di hende surdu a hala nos atenshon na e echo ku Kristi lo tin mester di un edukashon spesial. Esaki a rekerí un otro mudansa, e biaha aki pa Bendigo, un stat ku tabatin un skol pa mucha surdu. Komo ku mi tabata na estado di nos di dos yu, nos a posponé e mudansa aki te ora ku Kristi tabatin kuater aña i nos yu hòmber ku a nase tabatin sinku luna. Na un hospital na Bendigo, Kristi a kuminsá haña terapia pa papia, un tratamentu ku a dura pa e siguiente dies añanan. Ami ku Gary tambe a kuminsá siña idioma di seña.

Nos preokupashon di mas grandi tabata Kristi su edukashon spiritual. E kos ta ku ami ku Gary ta Testigu di Yehova, i nos tabata determiná pa lanta Kristi ‘den e disiplina i instrukshon di Yehova.’ (Efesionan 6:4) Pero kon nos lo por a hasi esei? E kabes di e skol kaminda Kristi tabata bai a bisa: “Siña Kristi tokante Dios lo ta e konsepto di mas difísil pa siña. Bo no por mira Dios, pues kon lo bo splik’é ken Dios ta?” Ki un reto grandi tabatin nos dilanti! No a tarda hopi ku nos a haña sa ku pa siña Kristi lo a tuma hopi tempu, studio i pasenshi.

Na prinsipio, nos a usa plachi i diagram, i a mantené nos lenguahe mas simpel posibel. Nos tabata lag’é kompañá nos bai reunionnan kristian i tambe den e trabou di prediká, maske apénas e tabata komprondé ta kiko ta pasando. Segun ku Kristi a siña dominá e idioma di seña, un mundu nobo a habri p’e. Pero asina mes, tabatin hopi palabra, frase i konsepto den Beibel ku tabata difísil pa splika. Un di su bukinan faborito tabata Mi buki di relato bíblico, *  skirbí spesialmente pa mucha. E plachinan kolorido—huntu ku algun diagram ku nos a traha—tabata un yudansa sumamente balioso. Ku tempu, un amor pa Dios a kuminsá krese den Kristi su kurason.

Bondadosamente Kristi su kabes di skol a pone nos den kontakto ku algun otro Testigu di Yehova ku tabatin yu surdu. Un kos ku a yuda nos hopi ta ora nan a splika nos kon hende surdu por prediká na hende ku ta tende. Un manera ta dor di entregá hende ku ta tende un karchi ku un mensahe bíbliko imprimí riba dje. Pues, ora ku Kristi tabata kla pa kompartí bèrdatnan bíbliko ku otro hende, e por a hasi esei fásilmente! El a bira un publikadó no-batisá di e bon nobo ku 14 aña. Na 1994 el a batisá ku 17 aña.

Sin embargo, Kristi tabatin mester di asosiashon sano, i tabata difísil p’e sera amistat ku Testigunan ku ta tende. P’esei ami ku Gary a kuminsá duna lès di idioma di seña na miembronan di nos kongregashon ku tabata interesá den yuda hende surdu. Algun di esnan ku a asistí na nos lèsnan, despues a haña trabou di interpretá pa hende surdu. Pero mas importante, hopi di esnan ku a siña idioma di seña awor tabata gusta komuniká ku Kristi. Tambe Kristi por a benefisiá mas plenamente awor di nos reunionnan i asambleanan kristian. Te ku awe e ta partisipá aktivamente den nan. Kristi ta masha gradisidu pa e amor i interes ku e rumannan ta mustra na dje.

Un dia Kristi a ekspresá na nos su deseo di bira un pionero regular, es desir, un predikadó di tempu kompletu. Gary a yud’é saka su reibeweis, i despues di regla algun otro asuntu, Kristi a keda nombrá komo pionero regular na 1995. Na aña 2000, el a haña tambe un trabou partaim na un skol básiko. Einan e ta yuda den e edukashon di mucha surdu.

Awor nos tur, Kristi, Gary, nos yu hòmber Scott, ku ami, tin e goso di sirbi komo pionero regular. Nos ta masha kontentu di por dediká tempu na siña hende tokante nos Dios, Yehova!

‘E Deseonan di Nos Kurason’

E echo ku Kristi ta surdu ta un reto konstante pa nos tur. Tin biaha ora ku Kristi ta den e trabou di prediká, no tin niun hende pa interpretá p’e, niun hende ku ken e por kompartí loke e ta sinti òf pensa. E ta bisa: “Mi ta sinti komo si fuera mi ta biba den un pais kaminda tur otro hende ta papia un otro idioma for di esun di mi.” Apesar di esei, nos tur a siña trata ku éksito ku su situashon.

E palabranan di Salmo 37:4 ta konsolá nos: “Deleitá bo mes den SEÑOR, i e lo duna bo e deseonan di bo kurason.” Kristi su speransa di mas grandi ta pa un dia tende muzik i e zonidunan di naturalesa i di papia ku su boka ku su sernan kerí. Ami ta anhelá e dia ora ku Kristi lo por tende mi bos. Nos tin fe ku pronto nos lo risibí e deseonan aki di nos kurason, nèt manera Beibel ta primintí.—Isaias 35:5.—Kontribuí.

[Nota]

[Plachi na página 14]

Kristi, ora e tabatin 14 luna, ku “Mi buki di relato bíblico”

[Plachi na página 15]

Kristi ta presentá e bon nobo hasiendo uso di un karchi imprimí

[Plachi na página 15]

Scott, Kristi, Gary i Heather Forbes awe