Aʻoaʻoina o Kristi ia Alofa i le Atua

NA FANAU la ma tama teine o Kristi i le 1977. E leʻi umi ae faamatala mai loa e la matou fomaʻi se tala e matuā faateʻia ai i maʻua: e matuā lē lagona lava e Kristi se mea, ma e maua foʻi i se maʻi e aafia ai ona maso ma lana tautala. E ma te leʻi iloaina le aafiaga tele o le a oo i lo matou aiga talu ai lea tulaga.

I ni nai masina mulimuli ane, na ma ō ai ma laʻu tane o Gary i ni aʻoga faapitoa na faia i le aai o Melepone, i Ausetalia, e aʻoaʻo ai le auala e fesootaʻi ai ma la maʻua tama. Na matou asiasi atu foʻi i le nofoaga lea e suʻesuʻea faapitoa le faalogo, i le aai o Melepone. Na faia ai ni tamaʻi mea faalogo mo Kristi, lea ua atoa nei lona sefulu masina. Sa matuā musu lava Kristi e fai, ma talu ai e iai uaea o meafaalogo, sa masani ona ia tatosoese mai i ona taliga i taimi uma e ma te faapipiiina ai! Sa iai ma sona fusipaʻu faapitoa e tuu ai maa, ma e fai lava si mamafa o ia mea.

Sa faafaigatā iā Kristi ona savali talu lona maʻi, ma sa manaʻomia ona ave o ia i le fomaʻi faamalositino i vaiaso taʻitasi. Ae e oo ane i le tolu o ona tausaga, ua savali lava Kristi ia, e ui ina fai ma paʻū. Sa faaauau pea ana togafitiga faamalositino seʻia oo i le lima o ona tausaga. O le vaitaimi lava foʻi lea na matou sifi atu ai i le taulaga o Benalla, o inā na faia ai le pisinisi a Gary.

Le Aʻoaʻoina o Kristi

Na faamatala mai e se faiaʻoga e faapitoa mo tagata logonoa ia le manaʻomia e Kristi o ni aʻoaʻoga faapitoa. O lona uiga la, e manaʻomia foʻi ona matou toe sifi i Bendigo, o se aai e iai se aʻoga mo tamaiti logonoa. Talu ai o loo oʻu maʻitaga i le ma tama lona lua, faatoʻā matou sifi lava ina ua fa tausaga o Kristi ae ua lima na o masina o Scott le ma tama lona lua, o se tama. Na faaauau ai i se falemaʻi i Bendigo ona maua fesoasoani auā le tautala a Kristi, ma e atoa le sefulu tausaga o faia faapea. Na amata ai foʻi ona ma aʻoina ma Gary le gagana a tagata logonoa.

Talu ai o i maʻua o ni Molimau a Ieova, sa sili ona ma manatu i le aʻoaʻoina o Kristi i le itu faaleagaga, ma na ma filifili ai e tausia aʻe Kristi “i aʻoaʻiga ma apoapoaʻiga a le Alii.” (Efeso 6:4) Ae o le a faapefea ona ma faia lea tulaga? Na faapea mai le pule o le aʻoga sa aʻoga ai Kristi: “O le a sili ona faigatā le aʻoaʻoina o Kristi e faatatau i le Atua. E lē mafai ona vaaia le Atua, o lea la, o le a faapefea ona lua faamatalaina lea tulaga iā te ia?” O se luʻi tele lea ua ma fesagaʻia nei! Na vave lava ona ma iloaina o le a manaʻomia ai le tele o le taimi, o saʻiliʻiliga, ma le onosai.

Na ma amata i le faaaogāina o ata mai tusi, ma ata na ma tusia, ma na faafaigofie le gagana na faaaogāina. Na matou auai i sauniga faa-Kerisiano ma le galuega talaʻi, e ui ina sa itiiti sona iloa o mea o loo faia ai. Ina ua amata ona poto Kristi i le gagana a tagata logonoa, na amata loa ona tele mea e malamalama i ai! Ae sa tele pea ni upu, faaupuga, ma manatu i le Tusi Paia sa faigatā ona faamatalaina iā te ia. O se tasi o tusi sa sili ona ia fiafia i ai o Laʻu Tusi o Tala o Le Tusi Paia, * lea na lomia faapitoa mo tamaiti. Sa matuā aogā lava ata felanulanuaʻi o lea tusi mo Kristi, faapea ma ni ata na ma tusia. Na amata ona tuputupu  aʻe i le loto o Kristi lona alofa mo le Atua.

Na alofa le pule o le aʻoga o Kristi ma faafesootaʻi i matou ma ni Molimau o loo iai foʻi ni a latou fanau e logonoa. Sa telē se agaʻi i luma i la matou taumafaiga ina ua latou faamatala mai le auala e talaʻi ai tagata logonoa i tagata e lē logonoa. O se tasi o auala e ala lea i le ave i le tagata e lelei le faalogo o se fasi pepa malō o loo tusia ai se faamatalaga faale-Tusi Paia. O lea la, ina ua mafai e Kristi ona talanoa atu i isi e tusa o upu moni mai le Tusi Paia, sa faigofie ona ia faia faapea! I le 14 o ona tausaga, na avea ai o ia ma tagata talaʻi e leʻi papatisoina. I le 1994, na papatisoina ai o ia ina ua 17 na o ona tausaga.

Ae, sa manaʻomia foʻi e Kristi ni aumea lelei, ma sa faigatā iā te ia ona faia ni faauōga ma Molimau e lē logonoa. O lea na ma amata ai ma Gary ona faia ni aʻoga e aʻoaʻo ai le gagana a tagata logonoa mo tagata o la matou faapotopotoga e naunau e fesoasoani i tagata faapea. O nisi na auai i ma aʻoga na mulimuli ane galulue e avea ma tagata faamatalaupu mo tagata logonoa. Ae o le mea e sili ona tāua, o i latou na iloa le gagana a tagata logonoa, na latou fiafia e talatalanoa ma Kristi. O lea la ua sili atu ona mafai e Kristi ona maua aogā mai a matou sauniga ma fonotaga faa-Kerisiano. E oo mai i le asō o loo faia ai sana vaega i ia sauniga. E lotofaafetai tele Kristi ona o le naunau alofa o le ʻauuso iā te ia.

I se tasi aso, na faailoa mai ai e Kristi lona faanaunauga ina ia avea ma paeonia sauatoa, po o se tasi e talaʻia le tala lelei faataimi atoa. Na fesoasoani Gary iā te ia ina ia maua lona laisene avetaavale, ma ina ua mafai ona taulimaina isi vala na ia manaʻomia, na avea ai Kristi ma paeonia sauatoa i le 1995. I le tausaga e 2000, na maua ai foʻi sana galuega faavaitaimi i se aʻoga tulagalua. O lana galuega o le fesoasoani lea i le aʻoaʻoina o tamaiti e logonoa.

I le taimi nei, o matou uma ma Kristi, Gary, ma le ma tama tama o Scott, o loo matou maua le olioli i le galuega paeonia sauatoa. Ua matou fiafia lava ona ua mafai ona faaaogā lo matou taimi e aʻoaʻo ai tagata e faatatau i lo matou Atua, o Ieova.

‘O Mea e Mananaʻo i ai o Matou Loto’

Ua avea pea le tulaga logonoa o Kristi ma luʻi iā i matou uma. O nisi taimi pe a galue o ia i le faiva faa-Kerisiano, e leai se isi e mafai ona faamatalaupu mo ia, se tagata e mafai ona faamatala atu i ai ona manatu ma faalogona. Fai mai a ia: “E tai pei o loo oʻu i se atunuu e ese lava le gagana o loo tautatala uma ai isi tagata.” Ae ui i lea, ua mafai lava ona matou taulau i le fesagaʻi ai ma lea tulaga.

Ua matou maua le faamāfanafanaga mai i upu o le Salamo 37:4 e faapea: “Ia e fiafia lava oe iā Ieova, ona foaʻiina lea e ia iā te oe o mea e manaʻo i ai lou loto.” O se faanaunauga sili iā Kristi o le mafai lea ona faalogo i musika ma isi leo mai mea na foafoaina, ma ia talanoa ma ē pele iā te ia, e ala i lona leo. Ou te faatali ma le naunau i le aso o le a mafai ai e Kristi ona lagona loʻu leo. E matou te talitonu o le a faataunuuina manaʻoga o o matou loto, e pei ona folafola mai e le Tusi Paia.—Isaia 35:5.—Ua tusia mai e se tasi.

[Faaopoopoga i lalo]

[Ata i le itulau 22]

O Kristi i le 14 masina, ma “Laʻu Tusi o Tala o Le Tusi Paia”

[Ata i le itulau 23]

O loo faaaogā e Kristi se pepa malō ua tusia ai faamatalaga e talaʻia ai le tala lelei

[Ata i le itulau 23]

O Scott, Kristi, Gary, ma Heather Forbes i le taimi nei