E Punto di Bista Bíbliko

Ta Posibel pa Vense Mal Kustumber?

E ESKRITOR Mark Twain a yega di bisa den forma di mofa: “E kos di mas fásil den e mundu aki ta pa stòp di huma. Mi sa pasobra mi a hasi esei mas ku mil biaha kaba.” Sin duda, hopi hende lo ta di akuerdo ku Twain su remarke melankóliko. Ounke kisas nan ta bon konsiente ku sierto kustumber ta moralmente malu i asta perhudisial, nan sa tambe ku no ta fásil pa vense nan òf resistí nan. Den transkurso di añanan kustumbernan por haña rais hopi profundo i por bira sumamente difísil pa kibra ku nan. E esfuersonan pa bai kontra loke e kurpa ta pidi por kaba ku tur bo forsa i por ta asta doloroso.

Dr. Anthony Daniels, un dòkter ku ta traha na un prizon, a remarká ku hopi bes e personanan ku ta kometé delitu ta desesperadamente sklabisá na nan opseshonnan i deseonan degradá. Nan ta bisa ku unabes un hende bira adikto na algu, “e ta den e gara di un forsa teribel kontra kua e no tin ningun resistensia.” Si e rasonamentu ei ta korekto, kasi nos lo no por wòrdu tené responsabel ora nos hasi loke e kurpa ta manda nos hasi. Pero ta bèrdat ku nos ta víktimanan impotente di nos deseonan i motivashonnan interno? Òf nos por ègt vense mal kustumber? Pa haña un kontesta konfiabel, laga nos wak kiko Beibel ta bisa.

Deseo Versus Akshon

Beibel ta splika bon kla ku Dios ta tene nos responsabel pa nos akshonnan. (Romanonan 14:12) Tambe e ta eksigí di nos pa nos kumpli ku su normanan hustu. (1 Pedro 1:15) Komo nos Kreadó, e sa kiko ta mihó pa nos, i su prinsipionan ta kondená hopi di e kustumbernan ku ta komun den e mundu aki. (1 Korintionan 6:9, 10; Galationan 5:19-21) Pero tambe e ta realístiko i kompasivo den loke e ta spera di hende imperfekto.—Salmo 78:38; 103:13, 14.

P’esei e salmista a skirbi: “Si abo, SEÑOR, tuma inikidatnan na kuenta, o Señor, ken lo por a keda para?” (Salmo 130:3) Sí, Yehova ta bon konsiente ku “e intenshon di kurason di hende ta malu for di su hubentut.” (Génesis 8:21) Debí na nos herensia genétiko, nos debilidatnan heredá i nos eksperensianan di pasado ta bira imposibel pa nos evitá tur mal pensamentu i deseo. P’esei den Yehova su gran amor, e no ta eksigí perfekshon for di nos.—Deuteronomio 10:12; 1 Juan 5:3.

Sin embargo, e echo ku Dios ta tene kuenta ku nos no ta nifiká ku e ta apsolvé nos di e responsabilidat di dominá mal deseo. Ounke apòstel Pablo a atmití ku e mes tabatin un lucha kontra mal deseo, e no a entregá. (Romanonan 7:21-24) El a bisa: “Mi ta gòlpia mi kurpa i ta hasié mi esklabo.” Ku ki meta? ‘Pa no sosodé ku mi mes ta wòrdu deskualifiká.’ (1 Korintionan 9:27) Sí, dominio propio ta esensial pa kombatí nos mal inklinashon- i kustumbernan i finalmente vense nan.

Kambio Ta Posibel

Ekspertonan riba tereno di komportashon ta bisa ku mal kustumber, meskos ku bon kustumber, ta algu ku hende ta siña i desaroyá ku tempu. Si esei ta korekto, anto meskos ku un hende por kustumbrá di hasi un mal kos, e por deskustumbrá  tambe di hasi e kos malu ei! Kon? E eskritornan di un buki riba maneho di strès ta bisa: “Pensa riba e benefisionan ku bo por haña dor di stòp ku un mal kustumber.” Despues, “traha un lista di kon kambionan den bo komportashon por mehorá bo bida.” Sí, ora nos enfoká riba e benefisionan ku un kambio den nos komportashon negativo por trese, esei ta motivá nos pa hasi kambio.

Pensa riba apòstel Pablo su spièrtamentu pa nos “wòrdu renobá den e spiritu di [nos] mente.” (Efesionan 4:22, 23) E forsa ei ta nos inklinashon mental dominante. Bo ta transformá e forsa ei dor di hala mas serka Dios i dor di kultivá apresio pa su normanan. E echo ku bo sa ku bo ta agradando Yehova ta yuda bo hasi e kambionan nesesario.—Salmo 69:30-33; Proverbionan 27:11; Kolosensenan 1:9, 10.

Klaru ku lo no ta fásil pa deshasí di mal kustumbernan ku kisas a dominá nos bida pa hopi aña. Nos no mester balotá e lucha ku nos tin nos dilanti. Kasi sigur nos lo haña nos ku frakaso i rekaida. Pero bo por tin e garantia ku por lo general kosnan lo bira mihó ku tempu. Mas esfuerso bo hasi, mas bo komportashon nobo lo bira un parti di bo.

Ademas, un persona ku ta stima Dios por ta garantisá di su yudansa i bendishon. Pablo ta primintí: “Dios ta fiel, kende lo no permití pa boso wòrdu tentá mas ku boso por soportá, ma huntu ku e tentashon e lo proveé salida tambe, pa boso por soportá.” (1 Korintionan 10:13) Ta falta masha poko pa Yehova Dios destruí e mal sistema di kosnan aki huntu ku tur su tentashon, pashonnan i deseonan degradá. (2 Pedro 3:9-13; 1 Juan 2:16, 17) Ku tempu, tur hende imperfekto ku ta sobrebibí e suseso aki lo ta kompletamente i eternamente kurá di tur aflikshon físiko, mental i emoshonal. Dios ta primintí ku “e kosnan di ántes lo no wòrdu rekordá mas ni bin na memoria.” (Isaias 65:17) Sin duda, entre tal “kosnan di ántes” lo tin anhelo- i deseonan difísil. Esaki no ta sufisiente motibu pa nos hasi nos máksimo esfuerso awor pa resistí e lucha kontra mal kustumber?

[Kuadro/Plachinan na página 21]

KON PA VENSE MAL KUSTUMBER

1. Rekonosé i atmití ku bo tin e mal kustumber. Puntra bo mes, ‘Kiko mi ta gana ku e kustumber aki? E ta disgustá otro hende? E ta afektá mi salú, posishon finansiero, bienestar, famia òf pas mental? Kuantu mihó mi bida por ta sin dje?’

2. Remplasá e mal kustumber ku algu positivo. Por ehèmpel, bo ta pasa demasiado tempu riba Internet, tal bes mirando informashon insaludabel? Anto programá e tempu ei pa lesamentu, estudio òf ehersisio saludabel.

3. Evaluá bo progreso. Pensa tur dia un par di minüt riba bo progreso. Si bo a sufri un rekaida, determiná ki sirkunstansianan a hiba n’e problema.

4. Buska yudansa di otro hende. Konta bo amigunan i famianan ku bo ta tratando na stòp ku e kustumber aki, i pidi nan pa kòrda bo riba esei ora bo ta dunando indikashon di ta kayendo bèk den dje. Papia ku otronan ku a logra vense e mesun kustumber.—Proverbionan 11:14.

5. Sea balansá i realístiko. No ferwagt resultado mesora. Algun kustumber ku bo a krea den transkurso di añanan lo por ta difísil pa kibra kuné.

6. Hasi orashon. Ku yudansa di Dios bo por vense kualke mal kustumber.—Salmo 55:22; Lukas 18:27.