Nama Kebuah Kitai Begunaka Utai ti Manah ke Ulih Dianti Jemah Ila?

ARAM kitai berundingka baru pasal cherita Daniel. Enti sema Daniel enda putus asa, kati iya deka terus idup nyentukka diatu? Ulihka enda penyakit iya suman? Kebendar iya, kitai nemu taja pan kitai bisi utai ti manah ke ulih dianti jemah ila, tang nya enda ulih nyumanka semua penyakit. Taja pan bisi orang pechaya, enti kitai bisi utai ti manah ke ulih dianti jemah ila, nya ulih nulung, tang sida mega enda ngumbai tu ulih nyumanka semua penyakit. Nya alai, kitai patut ngembuan runding ti betul pasal utai tu.

Ba siti interbiu enggau Berita CBS, Dr. Nathan Cherney ngingatka kitai ngambika enda ngumbai utai ti manah ke dianti jemah ila nya ulih ngasuh kereja ajih nyadi. Ku iya madah: “Sekeda bini ke bisi kanser dianu laki sida. Laki sida nuduh sida nadai runding ti positif sereta enda chukup ngaga meditasi. Nya kebuah kanser sida majak balat.” Dr. Nathan mega madah: “Sekeda orang ngumbai, enti sema sida bisi utai ti manah ke dianti jemah ila, nya ulih nyumanka penyakit. Tang tu enda amat.”

Kebendar iya, orang ti sakit raya endang benung balat merinsa. Enti kitai ngasuh sida berasai besalah, nya deka ngasuh sida balat agi merinsa. Nya alai, enti orang ke balat merinsa ngembuan utai ti manah ke ulih dianti jemah ila, kati nya deka nulung?

Tentu ulih. Dr. Nathan nya pakar senentang chara berubat palliative—chara berubat tu ukai kena ngerai tauka nyumanka pesakit nya, tang chara berubat tu ngelantangka orang ti sakit raya ngambika orang nya ulih berasai nyamai sereta kurang agi berasai pedis. Lutur ke ngena chara berubat palliative pechaya, runding ti positif ulih mai mayuh penguntung. Aram kitai meda bukti ke nunjukka enti kitai bisi utai ti manah ke dianti jemah ila, tu endang ulih nulung.

Ngembuan Utai ti Manah ke Ulih Dianti Jemah Ila Nya Amat Beguna

Dr. W. Gifford-Jones madahka: “Chara berubat ti ngasuh orang ke sakit ngembuan pengadang ke jemah ila nya, chara berubat ti amat mujur.” Iya mansik asil pansik pasal penguntung iya enti meri sukung ba emosi ngagai orang ti sakit raya. Ku iya: “Pesakit ke nerima sukung ba emosi deka agi ngembuan runding ti positif lalu enda jampat putus asa.” Siti pansik ke digaga ba taun 1989 nunjukka, pesakit ke nerima sukung ba emosi deka idup lama agi. Taja pan pansik kemayaharitu enda ulih mansutka bukti ti nyata, tang pansik ke bukai udah nunjukka, sukung ba emosi ulih ngurangka asai pedis sereta penusah ati orang ti sakit raya.

Peratika siti agi pansik ke nunjukka kaul entara penyakit jantung enggau runding seseiku orang. Ba pansik tu, lebih ari 1,300 lelaki udah diperatika kena meda sekalika sida bisi runding ti positif tauka negatif bekaul enggau pengidup. Pansik ke digaga pengudah sepuluh taun nunjukka, lebih ari 12 peratus lelaki tu bisi penyakit jantung. Nyauka dua pertiga ari sida ngembuan runding ti negatif. Laura Kubzansky, penulung profesor ba Harvard School of Public Health, madahka: “Sebedau tu, nadai bukti ti teguh ke nunjukka, enti nuan bisi ‘runding ti positif’ tu manah ke pengerai nuan. Tang pansik tu enggau terang nunjukka runding seseiku orang bisi kaul enggau pengerai jantung iya.”

Siti pansik digaga ngagai seraban orang sebedau sida beputung. Sida diasuh peratika gaya pengerai sida. Raban ke bisi runding ti positif ngembuan asil ti manah agi pengudah beputung. Kelimpah ari nya, siti agi pansik digaga kena meda empas runding ti negatif tauka positif ngagai orang ke tuai sereta pemanjai umur sida. Lebuh pansik tu dipejalaika, seraban orang tuai diasuh meda mesej ti pandak ke nunjukka orang ti tuai ngembuan penemu-dalam sereta peneleba ti mayuh agi. Asil iya, sida bejalai enggau kering sereta regas agi. Nya baka sida udah ngereja pengawa sesais pengelama 12 minggu!

Nama kebuah ngembuan utai ti manah ke dianti jemah ila sereta runding ti positif nya manah ke pengerai? Pakar sains enggau bala lutur enda ulih nyaut tanya tu laban sida mega enda nemu semua utai enggau nyemetak pasal untak enggau tubuh mensia. Tang, seiku profesor untak madahka: “Kitai ulih bisi pengerai ti manah enti kitai gaga ati sereta bisi utai ti manah ke dianti jemah ila. Tu deka ngasuh kitai berasai nyamai agi sereta kurang agi stres.”

Sekeda lutur, pakar psikologi enggau pakar sains engka alit ati enggau penerang tu, tang nyauka 3,000 taun menya, Raja Solomon nulis: “Ati ti selalu lantang ngasuh nuan bepengerai. Ati ti selalu tusah deka ngasuh nuan mupuk mati.” (Jaku Dalam 17:22) Utai ti dipadah ba ayat tu endang ngena. Bup Kudus nadai madahka ati ti lantang ulih ngeraika semua bansa penyakit, tang iya ubat ti amat bekesan.

Gambarka enti lutur ulih meri nuan sebengkah ubat ke ulih ngasuh nuan bisi utai ti manah ke dianti jemah ila, sida tentu deka ngereja nya. Tang, ngembuan utai ti manah ke dianti jemah ila ukai semina manah ke pengerai aja.

Kaul entara Runding ti Positif, Runding ti Negatif, enggau Pengidup Nuan

Bala pemansik madahka, orang ke ngembuan runding ti positif bulih asil ti manah agi ba sekula, endur gawa sereta ba sukan. Ambika chunto, siti pansik digaga ba siti raban atlet pekit belanda. Terubah iya, bala pelatih beratika tiap iku atlet nitihka pengelandik sida senentang sukan. Ba maya ti sama, tiap iku atlet indu nya diasuh beratika diri empu sereta utai ke deka dijapai sida. Nitihka pansik, bala pelatih engka meri penilaian ti manah pasal bala atlet indu nya. Tang nya bedau tentu ngasuh sida bisi prestasi ti pemadu manah. Pansik nunjukka, sida ke bisi runding ti positif pasal diri empu ulih nunjukka prestasi ti manah agi.

Mayuh pansik mega digaga pasal empas ari runding ti negatif. Urung taun 1960-an, bala pemansik udah ngaga beberapa iti eksperimen kena mansik ulah jelu. Asil pansik nunjukka, taja pan jelu nya kering, tang enti jelu nya disimpan ba sekeda situasi, jelu nya deka ngumbai diri lemi. Utai ke nyadi tu dikumbai “pengelemi ti dipelajar.” Tu mega ulih nyadi ba mensia. Ambika chunto, seraban orang disimpan ba endur ke bisi bunyi ti inggar. Udah nya, sida dipadah enti sida nekan sekeda butang, bunyi nya deka ngetu. Lebuh sida nitihka iring nya, sida ulih ngetuka bunyi nya.

Raban kedua mega dipadahka utai ti sama, tang kali tu semua butang nya nadai guna magang. Pengudah siti timpuh, mayuh entara sida berengkah putus asa. Ba pansik ke nangkanka nya, sida enggai ngereja nama-nama utai, sida ngumbai utai ti digaga sida nadai guna magang. Taja pia, bisi beberapa iku orang ngembuan runding ti positif ba raban nya, lalu sida enggai putus asa.

Dr. Martin Seligman, ke ngaga semua eksperimen nya udah ngena mayuh awak mansik pasal empas ari runding ti positif enggau negatif. Ari pansik nya, iya nemu runding ti negatif tauka ulah ti jampat putus asa ulih ngachau pengidup seseiku orang lalu indah ngasuh iya tusah deka bejalaika pengawa besehari-sehari. Pengudah ngaga pansik pengelama 25 taun, iya madah: “Enti kitai jampat ngembuan runding ti negatif, ngumbai semua penanggul nya ketegal penyalah kitai empu, lalu nadai utai ulih digaga kena mutarka nya, gaya pengidup kitai deka majak jai agi ari orang ke ngembuan runding ti positif.”

Sekali agi, orang engka ngasaika pekara tu utai ti baru. Tang kenyau ari suba, Bup Kudus madahka: “Enti nuan lemi lebuh nuan dituntung penusah, pengering nuan deka lenyau.” (Jaku Dalam 24:10, NWT) Bup Kudus madahka, asai ati ti negatif sereta asa ulih ngelemika kitai. Nya alai, nama ulih digaga nuan kena ngelaban asai ati ti negatif sereta nyadi positif agi?

[Gambar]

Enti kitai bisi utai ti manah ke ulih dianti jemah ila, nya deka mai mayuh penguntung