Σόσκε Χρειαζίντιβασα Ελπίδα;

ΣΟ ΚΑ αβέλας-πες άμα ο Ντάνιελ, ο τερνό σο τθερέλας καρκίνος ντα κερντάμ λέσκε λάφι κο προηγούμενος θέμας, κα ατσσικιαρέλας ζουρανί πι ελπίδα; Κα νικίνελας ο καρκίνος; Κα αβέλας τζουβντό αντιβές; Ατζέ-ντα ο τζενέ σο πακιάνα μπουτ ότι η ελπίδα τθερέλα ζορ να κα μπορίνενας τι βακερέν με σιγουριά κάτι ασακό. Ντα ατθέ αγαβάσα εκ σημαντικός σημείος. Δεν πρέπει τι μπεκλεντίνας κατά ελπίδα πο μπουτ πράγματα οντουλένταρ σο μπορίνελα τι κερέλ. Η ελπίδα νανέ η λύση σαρέ κο προβλήματα, νανέ ο φάρμακος σαρέ κο νασφαλίματα.

Σε εκ συνέντευξη κο ειδήσεις κο κανάλι CBS, ο γιατρός Νέιθαν Τσέρνι βακερντάς ότι ισί επικίνδυνος τι στηρίντιβελ εκ τζενό κι ελπίδα πο μπουτ από ό,τι πρέπει κάνα βοηθίνελα τζενέν σο ισί μπουτ νασφαλέ. Ο γιατρός Τσέρνι βακερντάς: «Ντικχλάμ μουρσέν σο χάνας-πες πουμαρέ ρομνίντζαρ ντα κατηγορίνενας-λεν ότι να προσπαθίνενα μπουτ τι σκεφτίνεν θετικά». Επίσης ο γιατρός Τσέρνι βακερντάς: «Ανταβά τρόπος σκέψης χουχαβέλα ι τζενέν σόσκε κερέλα-λεν τι αμντίνεν ότι μπορίνενα τι κερέν κουμάντος πουμαρί υγεία, ντα κάνα λένγκι υγεία να τζάλα λατσσές, κατηγορίνενα πουμαρό νεαυτός ότι ο καρκίνος νικίνελα-λεν επειδή βον να κερένα κάτι λατσσές, ντα ανταβά ισί άδικος.

Ισί μπαγιά ότι οντουλά τζενέ σο μαρένα-πες με εκ μπέτι νασφαλιπέ σο μπορεί τι μουνταρέλ-λεν, κερένα εκ μπουτ δύσκολος αγώνας. Σίγουρα, οντουβά σο να κα μανγκένας ποτές τι κερέν λέσκε τζενέ, ισί τι τσσουβέν λέσκε τύψεις ι νασφαλιμάσκε σο τθερέλα ντα τι κερέν λέσκο φορτίος ατζέ πο πφαρό. Άρα, μήπως πρέπει τι βακεράς ότι να αξίνελα τι τθερέλ ελπίδα εκ τζενό;

Σίγουρα όχι. Για παράδειγμας, ο ίδιος γιατρός σο βακερντάμ πο πριν, ισί ειδικός κι παρηγορική θεραπεία​—ανταγιά θεραπεία να τθερέλα στόχος τι νασκιαρέλ ο νασφαλιπέ σο τθερέλα εκ τζενό ή ατζέ-ντα τι κερέλ-λες τι τζουβντιόλ πο μπουτ μπρεσά, αλλά τι βοηθίνελ-λες καζόμ τθερέλα ανταβά νασφαλιπέ τι τζουβντιόλ καζόμ πο λατσσές αβέλα-πες. Ο γιατροί σο χρησιμοποιήνενα ανταγιά θεραπεία πακιάνα ότι ισί μπουτ σημαντικά ο πράγματα σο λοκχιαρένα ο γκι ι νασφαλέ τζενένγκο, ατζέ-ντα άμα οντουλά τζενέ ισί μπουτ νασφαλέ. Υπαρχίντιβενα μπουτ πράγματα σο σικαβένα ότι η ελπίδα μπορίνελα τι κερέλ-λες ανταβά—ντα μπορίνελα τι κερέλ ατζέ πο μπουτ.

Η Αξία σο Τθερέλα η Ελπίδα

«Η ελπίδα ισί εκ θεραπεία σο τθερέλα λατσσό αποτέλεσμας», βακερέλα ο Δρ. Γ. Τζίφορντ-Τζόουνς σο γραφίνελα άρθρα ι υγειάκε. Βοβ διαβαντάς διάφορες μελέτες σο αβιλέ-πες για τι αγαντίντιβελ καζόμ σημαντικός ισί τι βοηθίνας ι τζενέν σο τθερένα πφαρέ νασφαλίματα τι αισθάντιβεν λατσσές αντρέ πουμαρέ γκίστε. Μπουτ τζενέ πακιάνα ότι αντικάς βοηθίντιβενα ο νασφαλέ τζενέ τι ντικχέν ο πράγματα πο λατσσέ τροπόσαρ. Εκ έρευνα σο αβιλί-πες κο 1989 σικαντάς ότι ο νασφαλέ τζενέ σο λιντέ ασακί βοήθεια τζουβντιόνας πο μπουτ, ενώ γιαβερά έρευνες σο αβιλέ-πες πο σοράν σικαντέ ότι ανταβά νανέ ντιπ σίγουρος. Όμως, ο έρευνες σικαντέ ότι ο νασφαλέ τζενέ σο βοηθίντιβενα για τι λοκχιόλ λένγκο γκι τθερένα πο χάνικ κατάθλιψη ντα πο χάνικ ντουκχ οντουλέ τζενένταρ σο να λένα ασακί βοήθεια.

Ντικχέν εκ γιαβέρ έρευνα σο αβιλί-πες για τι σικάντιβελ άμα ο νασφαλιπέ κι καρδιά σο βακέρντιβελα στεφανιαία νόσος επηρεάντιβελα κατά τρόπος σο ντικχέλα ο τζενό ι ζωή. Τραμπιντέ 1.300 ντα πο μπουτ μουρσέν ντα ντικχλέ καμπόρ οντουλένταρ πακιάνα ότι ο πράγματα κα τζαν λατσσές λένγκε ζωγιάτε ντα καμπόρ να πακιάνα-λες ανταβά. Ντες μπρεσά πο σοράν αρακχλέ ότι αντρέ κο 100 μουρσά, πο μπουτ κατά 12 νασφάλιλεας κατά στεφανιαία νόσο. Αντρέ οντουλέντε, ο μουρσά σο να ντικχένας ι ζωή λατσσέ τροπόσαρ ισινέ ντούι φαρ πο μπουτ οντουλένταρ σο ντικχένας ι ζωή λατσσέ τροπόσαρ. Η Λόρα Κουμπζάνσκι, σο ισί καθηγήτρια κι Σχολή Δημόσιας Υγείας κο πανεπιστήμιος Χάρβαρντ, βακερέλα: «Ο πο μπουτ στοιχεία σο βακερένα ότι “ο λατσσέ σκέψεις” κερένα λατσσιπέ κι υγεία να στηρίντιβενας κο αποδείξεις—όμως ανταγιά μελέτη ντέλα χάνικ αποδείξεις σο υποστηρίνενα ανταγιά ιδέα ι τζενένγκε σο τθερένα προβλήματα πουμαρέ καρδιάσαρ.

Μερικές έρευνες σικαντέ ότι οντουλά τζενέ σο πακιάνα ότι λένγκι υγεία νανέ λατσσί, κι πραγματικότητα αργίνενα πο μπουτ τι αβέν λατσσές σοράν κατά εγχείρηση οντουλένταρ σο πακιάνα ότι λένγκι υγεία ισί μπουτ λατσσί. Ατζέκ, μπουτ τζενέ βακερένα ότι οντουλά σο ντικχένα ι ζωή λατσσέ τροπόσαρ, μπέκιμ τι τζουβντιόν πο μπουτ μπρεσά. Αβιλί-πες εκ έρευνα για τι σικαβέλ σαρ επηρεάντιβενα ο πφουρέ τζενέ κατά τρόπος σο σκεφτίνενας βον ι πφουριματένγκε. Κάνα σικαντέ ι πφουρένγκε χουρντέ μηνύματα σο βακερένας ότι κάνα πφουρίλιβελα εκ τζενό αβέλα πο γκοντιαβέρ ντα τθερέλα πο μπουτ εμπειρία, σοράν ανταλέσταρ, οντουλά τζενέ τθερένας πο μπουτ ζορ ντα όρεξη τι πφιρέν. Κι πραγματικότητα, ο αποτέλεσμας ισινέ σαρ τι κερντέας γυμναστική 12 εβδομάδες!

Καβά ισί ο λόγος σο ντικχιόλα ότι η ελπίδα, η χαρά εμ γιαβερά λατσσέ συναισθήματα κερένα λατσσιπέ κι υγεία; Ο επιστήμονες ντα ο γιατροί να αγαβένα ατζέκ μπουτ λατσσές σαρ κχελέλα η γκοντί ντα ο σώμας ι τζενέσκο, οτθάρ ναστί ντένα απαντήσεις ντιπ ακριβώς ανταλέσκε. Όμως, ο τζενέ σο κερένα έρευνες ανταλέ θεμάσκε μπορίνενα τι βακερέν κάποια πράγματα σο αρακχλέ βον. Για παράδειγμας εκ καθηγητής νευρολογίας βακερέλα: «Νιωθίνεσα μπουτ σουκάρ κάνα τθερέσα χαρά ντα ελπίδα. Η χαρά κερέλα-τουτ τι τθερές πο χάνικ άγχος ντα το σώμας λειτουργίνελα πο λατσσές. Ανταβά ισί ατζέκ εκ πράγμας σο μπορίνενα τι κερέν ο τζενέ σο μανγκένα τι ατσσόν λατσσές κι υγεία.

Ανταγιά σκέψη μπορεί τι αβέλ νεβί κο γιατρούς, κο ψυχολόγους ντα κο επιστήμονες, αλλά νανέ ιτς νεβί οντουλένγκε σο διαβάνενα ι Αγία Γραφή. Περίπου 3.000 μπρεσά πο τζανγκλέ, ο γκοντιαβέρ Βασιλιάς Σολομών γραφιντάς ι Ντεβλέσκε πνευμάσαρ ι σκέψη: «Ο χαρούμενος γκι ισί λατσσό φάρμακος, αλλά ο πφανγκό γκι κερέλα ι τζενές τι χασαρέλ πι ζορ». (Παροιμίες 17:22) Ντικχέν ι ισορροπία σο ισί ανταλέ λαφίντε. Ο εδάφιος να βακερέλα ότι ο χαρούμενος γκι κα κερέλ λατσσές σαρέ ο νασφαλίματα αλλά απλώς ότι «ισί λατσσό φάρμακος».

Κι πραγματικότητα, μπέκιμ κα αβέλας λατσσό τι πουτσάς: Αν η ελπίδα ισινέ φάρμακος, καβά γιατρός να κα γραφίνελας-λα; Επίσης, η ελπίδα κερέλα λατσσιπέ όχι σάντε κι υγεία, αλλά γιαβερτθέ-ντα.

Επηρεάντιβελα Τουμαρί Ζωή Κατά Τρόπος σο Ντικχένα ο Πράγματα;

Οντουλά σο ρόντενα ανταλέ θεμάσκε, αρακχλέ ότι ο τζενέ σο ντικχένα ο πράγματα λατσσέ τροπόσαρ κερένα λατσσιπέ πουμαρέ ζωγιάκε. Τζάνα-λεν πο λατσσές κο σχολείος, κι μπουτί, ατζέ-ντα κο αθλητισμός. Για παράδειγμας, αβιλί εκ έρευνα σε εκ ομάδα τζουβλίνγκι σο κχελένας στίβος. Ο προπονητές ντικχλέ καμπόρ λατσσές τζάλας η κάθε εκ λένταρ κο αθλήματα. Επίσης, τσσουντέ λένγκε κάποια ερωτήματα για τι ντικχέν καζόμ λατσσές πακιάνας ότι κα τζάνας κο αγώνες. Ντικχίντιλο ότι ο τζουβλιά σο γκιλέ πο λατσσές κο αγώνες ισινέ οντουλά σο πακιάνας ότι κα τζάνας λατσσές, ντα όχι οντουλά σο σικαβένας ο στοιχεία σο τθερένας ο προπονητές. Σόσκε η ελπίδα ισί αζόμ ζουρανί;

Σικλιλάμ μπουτ πράγματα κατά έρευνες σο κερντιλέ ι τζενένγκε σο να ντικχένα ο πράγματα λατσσέ τροπόσαρ. Κι δεκαετία του 1960, ο επιστήμονες κερντέ μερικά πειράματα σο σικαντέ ότι ο μπέτι πράγματα σο αβένα κι ζωή εκχέ τζενέσκι μπορεί τι κερέν-λες τι χασαρέλ πο κουράγιος. Για παράδειγμας, τσσουντέ χάνικ τζενέν τι ασουνέν εκ μπέτι μπασκιαριπέ ντα βακερντέ λένγκε ότι μπορίνενας τι σικλιόν τι πφάντεν-λες άμα κα ισταβένας μερικά κουμπιά. Ο τζενέ μπορισάλε τι πφάντεν-λες.

Ο ίδιος βακέρντιλο εκ γιαβέρ-ντα ομαδάτε—αλλά κάνα ισταβένας ο κουμπιά ανταβά να ανέλας αποτέλεσμας. Σαρ μπορίνενα τι αγαβέν, μπουτ τζενέ οντουλέ δεύτερε ομαδάταρ αρχισάλε τι χασαρέν πουμαρό κουράγιος. Κο γιαβερά πειράματα, σακιντίνενας τι κερέν γιαβερά-ντα πράγματα. Πακιάνας ότι σο-ντα τι κερένας να κα νικαβένας τίποτα. Όμως, ατζέ-ντα οντουλέ δεύτερε ομαδάτε, ο τζενέ σο ντικχένας ο πράγματα πο λατσσέ τροπόσαρ να μανγκλέ τι χασαρέν πουμαρό κουράγιος.

Ο Δρ Μάρτιν Σέλιγκμαν, σο βοηθιντάς τι προετοιμάντιβεν χάνικ κατά πρώτα πειράματα, σαρέ πι ζωγιάτε κερντάς μπουτ έρευνες σο ρόντενας σαρ επηρεάντιβελα ι τζενένγκι ζωή κατά τρόπος σο ντικχένα ο πράγματα. Ροντιντάς μπουτ λατσσές ο τρόπος σκέψης ι τζενένγκο σο πακιάνας ότι χασαρντέας πουμαρί ζορ. Ανταβά μπέτι τρόπος σκέψης, αγαντάς ότι εμποδίνελα μπουτ πράγματα κι ζωή ή ατζέ-ντα ερεσέλα κο σημείος τι κερέλ ι τζενέν τι νιωθίνεν σαρ μουλέ. Ο Σέλιγκμαν εξηγίνελα χάνικ λαφίντζαρ ο μπέτι τρόπος σκέψης ντα ο αποτελέσματα σο τθερέλα ντα βακερέλα: «Ο έρευνες σο κερντόμ σαρέ ανταλά 25 μπρεσά κερντέ-μαν τι πακιάβ ότι άμα τθεράσα ι συνήθεια τι αμντίνας ότι ο προβλήματα σο αβένα συνέχεια αμαρέ ζωγιάτε αβένα επειδή κερντάμ εκ λάθος αμέν, ντα ότι ο προβλήματα να κα μουκχέν-αμέν τι κεράς τίποτα σο κα τζαλ λατσσές, αζομάν κα αβέν αμένγκε πο μπουτ προβλήματα οντουλένταρ σο κα τθεράας άμα σκεφτίνασα γιαβέρσοϊ».

Πάλι όμως, αν-ντα ασακέ συμπεράσματα μπέκιμ ντικχιόνα νεβέ μερικέ τζενένγκε αντιβές, νανέ νεβέ οντουλένγκε σο διαβάνενα ι Αγία Γραφή. Ντικχέν ι παροιμία: «Άμα χασαρντάν το κουράγιος κο ντιβές σο ισινάν στεναχωριμέ, να κα τθερές μπουτ ζορ». (Παροιμίες 24:10) Βα, η Γραφή βακερέλα ξεκάθαρα ότι άμα χασαρένα τουμαρό κουράγιος ντα σκεφτίνενα μπέτι τροπόσαρ, κα νασέλ τουμένταρ σαρί τουμαρί ζορ ντα αντικάς να κα μπορίνεν τι κερέν τίποτα. Σο μπορίνενα όμως τι κερέν για τι νικίνεν ο μπέτι τρόπος σκέψης ντα τι τθερέν πο μπουτ ελπίδα τουμαρέ ζωγιάτε;

[Φωτογραφία]

Η ελπίδα μπορίνελα τι ανέλ μπουτ λατσσιπέ