¿Achkë xkatoʼö rchë xkeʼawesaj äl pan ajolon ri naʼoj ri xa yatkitzʼlaʼ?

¿ACHKË naʼän rït taq nawïl jun kʼayewal? Ye kʼïy winäq ri yenukʼun rij ri nqanaʼ nkiʼij chë ri ruqʼalajsaxik xtqayaʼ ri kʼutunïk riʼ xtkʼüt we kiʼ qakʼuʼx chpan qakʼaslemal o xa majun ütz qayoʼen apü. Jontir yeqaqʼaxaj kʼayewal. Tapeʼ ke riʼ, ye kʼo jojun kan kʼïy kʼayewal yekiqʼaxaj. ¿Achkë komä rma jojun winäq kan nyujtäj kikʼuʼx taq yekïl kʼayewal tapeʼ xa ye koköj, ye kʼa jojun chik ma nbʼanatäj ta ya riʼ kikʼë tapeʼ kan kʼïy nmaʼq taq kʼayewal yekiqʼaxaj?

Tqayaʼ jun tzʼetbʼäl. Tabʼanaʼ che rä chë najin nakanuj asamaj. Rma riʼ yabʼä rkʼë rajaw jun empresa, ye kʼa ma nuyaʼ ta asamaj. ¿Achkë xtanaʼ? Rkʼë jbʼaʼ naquʼ chë yït rït ri ma yït ütz ta. Rma riʼ naʼij: «Majun ta jun xtyaʼö rusamaj jun winäq achiʼel rïn. Majun bʼëy xtinwïl ta nsamaj». O rkʼë jbʼaʼ nanaʼ chë kan majun yakʼatzin wä xa xuʼ rma ma xawïl ta asamaj. Ri ke riʼ rubʼanik naquʼ xa yaturtzʼlaʼ.

¿Achkë rubʼanik yeʼawesaj ri naʼoj riʼ pan ajolon?

¿Achkë ütz naʼän rchë yeʼawesaj pan ajolon ri naʼoj ri xa yatkitzʼlaʼ? Naʼäy, nkʼatzin natamaj achkë naʼoj ri xa yatkitzʼlaʼ. Chrij riʼ nkʼatzin natäj aqʼij rchë yeʼajäl ri naʼoj riʼ. Tqatzjoj chik jmul ri tzʼetbʼäl xqaʼij qa. ¿Achkë rma ma xyaʼöx ta asamaj? ¿Kantzij komä chë kan majun ta jun winäq xtyaʼ rusamaj jun winäq achiʼel rït, o xbʼanatäj riʼ xa rma ri empresa najin wä nukanuj jun winäq ri jun wä chik samaj nkowin nuʼän?

Rchë natamaj we xa najin nqʼax ruwiʼ ri ma ütz ta najin naquʼ, tajnamaj ri najin naquʼ rkʼë ri qäs najin nbʼanatäj. ¿Kantzij komä chë kan majun nqkowin nqaʼän ta xa xuʼ rma ma xyaʼöx ta qasamaj, o ütz nqaquʼ kij jojun chik ri yeqaʼän chpan qakʼaslemal ri ütz yeʼel chqawäch, achiʼel ri yeqaʼän rchë ütz nqakʼwaj qiʼ rkʼë Dios, rkʼë qa-familia chqä kikʼë qachiʼil? Tatjaʼ aqʼij rchë nawesaj pan ajolon ri naʼoj ri nuʼän chawä chë naquʼ chë jontir ri naʼän kan ma ütz ta xttel chawäch. Rma, ¿kan qataman chë majun bʼëy xtqïl ta qasamaj? Chqä kʼo chik jojun ri yojkitoʼ rchë yeqesaj äl pa qajolon ri naʼoj ri xa yojkitzʼlaʼ.

Tayaʼ chwäch awan chë yakowin naʼän ri nayaʼ chawäch naʼän

Chkipan ri junaʼ ri yeqʼaxnäq pä, ri yenukʼun rij ri nqanaʼ kibʼin achkë ntok chpan ri kʼo ütz nayoʼej apü. Ryeʼ nkiʼij chë ri winäq ri kʼo ri naʼoj riʼ rkʼë, nuyaʼ pa rujolon chë nkowin nuʼän ri nuyaʼ chwäch nuʼän. Achiʼel xtqatzʼët chpan ri jun chik artículo, ri kʼo ütz nayoʼej apü kʼo más ntok chpan. Ye kʼa ri xkiʼij re winäq reʼ nqrtoʼ rchë nqayaʼ pa qajolon chë nqkowin nqaʼän ri nqayaʼ chqawäch nqaʼän.

Rchë nqayaʼ pa qajolon chë xtqkowin apü chrij ri nqajoʼ nqaʼän, nkʼatzin kʼo nqayaʼ chqawäch nqaʼän ri ma kan ta kʼayewal kibʼanik. Ke riʼ, taq xtqkowin xkeqaʼän riʼ, ya riʼ xtuʼän chë xtqkowin xtqaʼän jojun chik ri kʼo más kejqalen. We nanaʼ chë majun ayaʼon ta chawäch naʼän, ütz taquʼ rij achkë ütz nayaʼ chawäch naʼän. Taquʼ rij reʼ: ¿achkë nawajoʼ nayaʼ chwäch awan naʼän? Rma kan kʼïy nkʼatzin nqaʼän, kʼïy mul kan ma njameʼ ta chik qawäch rchë nqaquʼ rij achkë qäs nqajoʼ nqaʼän chpan qakʼaslemal, ntel chë tzij, ri kʼo más rejqalen chqawäch röj. Le Biblia kan ojer chik rubʼin pä chë tqabʼanaʼ ri achkë kʼo más kiqʼij (Filipenses 1:10).

Taq qataman chik achkë kʼo más rejqalen chqawäch röj, más chaq bʼaʼ xtuʼän chqawäch xtqachaʼ achkë nqajoʼ nqaʼän chpan qakʼaslemal, achiʼel chuyaʼik ruqʼij Dios, chpan qa-familia o chpan xa bʼa achkë chik jun ri nkʼatzin. Ye kʼa ütz ma tqamestaj ta chë pa naʼäy más ütz ma kʼïy ta nqayaʼ chqawäch nqaʼän, xa kan más ütz keqachaʼ ri ma kʼayewal ta kibʼanik, rma we xa xtqaʼän riʼ, xa xtqbʼison chqä xa xtikʼo qakʼuʼx. Rma riʼ taq kʼo jun nqajoʼ nqaʼän ri kan kʼayewal rubʼanik o kan kʼïy tiempo xtkʼwaj chqawäch, más ütz tqajachaʼ rubʼanik rchë ma nikʼo ta qakʼuʼx.

Ye kʼïy winäq nkiʼij: «We nayaʼ chwäch awan naʼän, xkakowin xtaʼän». Re tzij reʼ kantzij. Taq xqatzʼët yän achkë qäs nqajoʼ nqaʼän, nkʼatzin nqatäj qaqʼij chkibʼanik rchë xtqkowin xkeqaʼän apü. Röj kan más xtuʼij riʼ qan yeqaʼän ri qayaʼon chqawäch nqaʼän, taq xtqaquʼ rij achkë utzil xtkikʼäm pä pa qawiʼ. Y tapeʼ kʼo mul kʼo kʼayewal xtkikʼüt pä kiʼ, röj kʼo ta chë ma ta nikʼo qakʼuʼx nixta nyujtäj qakʼuʼx.

Ye kʼa nkʼatzin chqä nqakanuj rubʼanik rchë nqkowin nqaʼän ri qayaʼon chqawäch nqaʼän. C. R. Snyder, jun achï ri kan runukʼun rij achkë utzil nukʼäm pä taq kʼo ütz nayoʼej apü, nuʼij chë nkʼatzin nakanuj jalajöj rubʼanik rchë naʼän jun ri nawajoʼ naʼän. Ke riʼ we kʼo ma ütz ta ntel, kʼo chik nkʼaj chik rubʼanik rchë naʼän ri achʼobʼon.

Snyder nuʼij chqä chë ma itzel ta we kʼo mul nkʼatzin nqajäl jun ri qachʼobʼon nqaʼän. We xqaʼän yän jontir ri kʼo pa qaqʼaʼ ye kʼa ma nqkowin ta nqaʼän jun ri qachʼobʼon, xa xtchʼpü qakʼuʼx, y ya riʼ xa xtuʼän chë xtyujtäj qakʼuʼx. Ye kʼa we nqajäl chwäch jun ri nqkowin nqaʼän, kʼo jun ri xtqkowin xtqayoʼej apü.

Chpan le Biblia nqïl jun utziläj tzʼetbʼäl chrij riʼ. Ri qʼatöy tzij David nrajoʼ wä nuyäk jun templo che rä Jehová ru-Dios. Ye kʼa ryä xuʼij che rä chë yë wä Salomón, ri rukʼajol, xtyakö ri templo riʼ. David rkʼë jbʼaʼ xyujtäj ta rukʼuʼx, ye kʼa ma xpë ta ruyowal chqä ma xtäj ta ruqʼij rchë yë ryä nyakö ri jay riʼ. Pa rukʼexel riʼ, ryä xjäl ri nrajoʼ wä nuʼän. Ryä xksaj ruchqʼaʼ rchë xmöl ri päq chqä jontir ri xtkʼatzin che rä rukʼajol rchë nuyäk ri templo (1 Reyes 8:​17-19; 1 Crónicas 29:​3-7).

Ye kʼa, tapeʼ nqatamaj kiʼ qakʼuʼx nqaʼän chpan qakʼaslemal chqä yë ri ütz nqatzʼët chrij xa bʼa achkë nbʼanatäj, rkʼë jbʼaʼ kʼa kʼayewal na nuʼän chqawäch kʼo ütz nqayoʼej apü. ¿Achkë rma? Rma ma nqkowin ta yeqasöl jontir ri kʼayewal ri nkiʼän chë ri winäq majun ütz nkiyoʼej apü, achiʼel ri wayjal, ri chʼaʼoj, ri yabʼil, ri kamïk chqä ri kan ma pa rubʼeyal ta nbʼan kikʼë ri winäq. Rma riʼ, ¿achkë xtqtoʼö rchë kʼo ütz xtqayoʼej apü tapeʼ nqatzʼët jontir ri xqatzjoj yän qa?

[Achbʼäl ri kʼo chpan ruxaq 7]

Xa rma ma nyaʼöx ta ri samaj chawä ri nawajoʼ, ¿xtaʼij komä chë kan majun bʼëy xtawïl ta asamaj?

 [Achbʼäl ri kʼo chpan ruxaq 8]

Ri qʼatöy tzij David ma xkʼewaj ta xjäl ri ruchʼobʼon wä nuʼän