Ü ꞊mɔɔn˗ ˗bha ˈü ˗gban ˈwɔn yö ˗kɔ yaa ˗gɔ

ˈWƆN ˗nu ˈö ü ˗kɔ ˗yö kun ˗an kë ˗sü ˈka ü ˗an ˗yö ˗kɔ ˗kë ꞊dhɛ? ꞊Klaŋ ˈˈgblʋ̈gblʋ̈ ˗nu ˈwo ꞊dɛɛ ˗wa pö ꞊dhɛ ˗kɔ ˈü dhɛɛˈˈ ˈö bhë ˗a ˗yɔ bɔ ˗a ˈka, ˗yö ü ˗bha ˗zotadhe ˗së ɛɛnˈˈ ü ˗bha ˈwɔn yö ˗kɔ yaa ˗zɔn. Mɛn ꞊gban ˈˈpɛpɛ kwa ˗bɔ ˈwɔn ˈˈgbɩɩ˗ suu ꞊va ˗nu ˈgü, ˈö mɛn ˈbhaa ˗nu ˗bha ˗yö ˗ӡiö mɛn ˈbhaa ˗nu ˗bha ˗ta. ˈˈKɛɛ ˈmën ˗kë ˈö mɛn ˈbhaa ˗nu ˗wo bɔ wo ˗bha ˈwɔn ˈˈgbɩɩ˗ ˗nu ˈgü ˗zoyödhe ˈka, ˈö ˈwo˗ ˈˈslö ꞊mɛɛn ˗ӡiaanwo kö ˈwo ˗an ˈˈɲanbhɔ ˗kɔ ˈˈwɛɛ ˈbhaa ˗nu kë, ˈkɛɛ kö mɛn ˈbhaa ˗nu ˗zë ˗an ˈgü ˗yö ˗ga ˈwɔn ˗bhaasü ˗nu ˈgü?

˗A ˈwɔnzuan do ꞊nɛn. ˗Bhö ü ˗zota kö ü yö mɛɛnˈˈ ˗ni ˈgü. ˈYö ˈwo ü ˗dhɛ kö ˈka yö ˗wɔn ˈbhaa ˈˈdoodɔ, ˈˈkɛɛ ˗a ˈˈdhiʋ̈todhɛ ˈgü ˈyö wo ˈti ü ˈsü yö ˈö bhë ˗a ˈgü. ˗A ˈwɔn ˈö ˈˈdhʋ̈ ü ˗dho ˗a ˈsü ˗kɔ ˗kë ꞊dhɛ? Ü ˈgü ˗dho ga ꞊gbɔnŋsü, kö ˈü˗ pö: «Mɛn gbɛ˗ ˗bhawɔn ˈyaa n ˗bha, n ˈti ˗dho yö ꞊slɔɔ˗ toŋtoŋdhö» ˗ee? Ɛɛnˈˈ ˈzü ˈwɔn do ˈö bhë ˗a ˗wɔn ˈgü, ü ˗dho ˈwɔn ꞊gban ˈˈpɛpɛ ˈwo ü ˗bha ˗tosɛta ˈgü ˗an yö ˈyaa˗ kö ˈü˗ pö: «ˈMaan pë ˈbhaa ˈka, n ꞊bhlë ˈyaa ˈdhö» ˗ee? ˗Yö ˗kë ˗kɔ ˈˈoo ˗kɔ ˈgü, ˗zotadhe suu ˈö bhë, ˗yö ˗gban ˈwɔn yö ˗kɔ yaa ˗ta.

˗Bhö ˗gban ˈwɔn yö ˗kɔ yaa ˗gɔ

Ü ˗dho ˗gban ˗a ˗gɔ ˗kɔ ˗kë ꞊dhɛ? Pë ˗blɛɛsü ˈü ˗dho ˗a kë ˈö˗ ˗wɔn ˈdhö ˈˈgbɩɩ˗ ˈyö ˗tɔ ˗a ˈˈslö mɛɛnˈˈ kö ˗zotadhe yaa ˗nu ˈwo ˈˈdhʋ̈ ˈü ˗an dɔ. ˗A ꞊plɛ ˗naan ˈnën ˈö ˗tɔ ˗gban ˗an ˗gɔ ˗sü. Ü ˗bha ˈwɔn ˗nu ˈgüman ˗kɔ yaa ˈö bhë, ˗a ˈˈslö mɛɛnˈˈ kö ˈü˗ dɔ. ˗A ˈwɔnzuan ˈnën ˗tɔ, ˗yö ˈˈdhʋ̈ gagade ˈka ꞊dhɛ wo ˈti ü ˈsü yö ˈö bhë ˗a ˈgü, ˈˈkɛɛ ˗ya kë ˈˈdhʋ̈ kö mɛn gbɛ˗ ˗bhawɔn ˈyaa ü ˗bha ˗ee? ˗A ˈbhaa ˗ya kë kö ˗gɔmɛn ˈö bhë mɛn ˈö ˗mɔn yö ˈˈwɛɛ ˈbhaa kë ˗sü ˗bha yö ˈnën ˈö˗ mɛɛnˈˈ ˗ni ˈgü.

˗Bhö ˗gban ˈwɔn ꞊dede ˈö ˈdhö ˗a ˗ta kö ˗yö ˈˈdhe bho ˈwɔn yö ˗kɔ yaa ˈö ˈyaa ü ꞊faan ˈmën bhë ˗a ˗ta. Wo ˈti ü ˈsü yö ˈö bhë ˗a ˈgü kö ˗ya ˗zɔn ꞊dhɛ ü ˗kɔ ˈyaa ˗mɔn ˈwɔn ˈbhaa kë ˗sü ˗bha ˗ee? ˈWɔn ˈbhaa ˗nu ˈwo ˗kë ꞊dhɛ ü ˗bha ˗Zlan ˗wɔn, ü ˗bha ˈkɔdhi ˈgüwɔn ˗nu waa ü ˗bha ˈˈtɔŋdhɛ kë ˗sü ˗nu ˈdhö ˈü ˗an ˈgü ˈˈgbɩɩ˗ ˈwaa ˈdhö ˗ee? ˗A ˈˈslö mɛɛnˈˈ kö ˈü˗ yö ꞊dhɛ ˈwɔn ˗nu ˈö ü ˗bha ˈgü ˗wo ˗dho kë ˈyaa˗ ˗dhɛkpaɔ dhiʋ̈ˈˈ ˈgü bhë, «ˈwɔn yö ˗kɔ yaa ˈˈkpaan» ˗mü. ˗Mën ˈˈwɛɛ ˈbhaa ˈö˗ ˗zɔn ꞊dedewo ꞊dhɛ ˈbhaa ꞊mɔɔn˗ ˗bha ˈü yö ꞊slɔɔ toŋtoŋdhö? Pë ˈbhaa ˗nu ˈwo ꞊mɔɔn˗ ˗bha ˈwo ü ˗takun kö ˈü ˗zotadhe yaa bho ü ˗zo ˈˈpiʋ̈, ˗kwa ˗an ˗ga.

˗Zotadhe ˗së ˈö mɛn ˗blü ˈwɔn ˗nu kë ˗sü ˗bha

ˈˈTʋ̈ŋ ˈö yö ˗a ˈgü, ˗zo ˗yö ˗dhɛkpaɔ dhiʋ̈ˈˈ ˗së ˗dhɛ ˗sü ˈgü ˈˈpʋ ˗kɔ ˈö ꞊klaŋ ˈˈgblʋ̈gblʋ̈ ˗nu ˗wa wo ˗a ˈka, ˈkö ˗kë ꞊dhɛ ˗a ꞊tɛɛ ˗yö ˗kë ꞊dhɛ ˈtɔŋ˗ dɔ ˗sü ˈdhö, ˗yö ˗së ꞊dedewo. ˗Wa ˗pö ˗zo ˗yö ˗dhɛkpaɔ dhiʋ̈ˈˈ ˗së ˗dhɛ ˗sü ˈö bhë, pë ˗nu ˈwo˗ ˗kë ˈö ga mɛn ˈgü ꞊dhɛ pë ˗nu ˈö˗ ˈˈpiʋ̈ ˈö ˗an kë ö ˗dho ˗mɔn ˗an kë ˗sü ˗bha, ˗a do ˗mü. ˈKö ˗kë ꞊dhɛ ˗zo ˗yö ˗dhɛkpaɔ dhiʋ̈ˈˈ ˗së ˗dhɛ ˗sü ˈklɔɔ˗ ˈˈdhiʋ̈ ˈyaa ˈto pë ˈwo˗ pö bhë ˗a ˗ta ꞊dhɛ ˗kɔ ˈö ˈkwa ˗dho ˗a yö ˗a ˈka ˈˈdhiʋ̈ bhë ˗a ˈdhö, ˗a ˈklɔɔ˗ ˈö bhë ˗yö ˗së ˈwɔn ꞊vadhɛ ˈgü. ˈKwa ˗gban ˗zoyödhe suu ˈö bhë ˗a ˗ta, ˗zotadhe ˗së ˗yö ˗kë kwa ˗gɔ ˈö ˈkwa ˈwɔn ˗nu ˗ya kwa ˗zo ˈˈpiʋ̈ kö ˈkwa˗ kë.

ˈKwa˗ pö ˈkwa ˗mɔn ˈwɔn ˗nu kë ˗sü ˗bha, kwa dua ˗mü kö ˈkwa ˗an kë ˗sü ˗ya kwa ˗zo ˈˈpiʋ̈ kö ˈkwa ˗da ˗an ˗ӡian ˗ta. ꞊Ya kë ꞊dhɛ ü ˈti ˗a kë ˈˈdhʋ̈ ˗sü ˈgüdan do, ü dua ˗mü kö ˈü ü ˗zota ꞊dedewo pë ˗nu ˈü˗ ˈˈpiʋ̈ ˈü ˗an kë ˗an ˈgü. ˈˈKɛɛ pë ˈbhaa ˈü˗ ˈˈpiʋ̈ ˈü˗ kë ˗yö ˗dhö ˗ee? ˈWɔn ˗nu ˗kë ö ˗gɔ ˈˈpiʋ̈ ˗sü ˈö pë ˈö mɛn ˈdhö˗ ˈˈpiʋ̈ ˈö˗ kë ꞊dedewo ˈö ˈyaa ˈˈɲaannu kö ˗yö ö ˗zota ˗a ˈgü bhë, ˗puö ˗a ꞊döŋ ˈgü ˗sü ˈyaa ˈˈgbɩɩ˗. ˈWɔn ˈö mɛn ˈdhö ˈˈpiʋ̈ ˈö˗ kë ˗a ˗yake ˗ya ˗sü ˈö bhë kwa˗ ˗yö ꞊dhɛ Biblö ˗ya ˗blɛɛ ꞊kwɛŋzü ˈpë˗ ˈö˗ pö: ‹˗Ka ˈwɔn ˗së ꞊dede [...] dɔ.›—Fidhipö 1:10.

Pë ˈö mɛn dua ˈdhö ˗mü kö ˗ya kë ꞊yaa˗ dɔ, ˗a ˗dhɛ ˗nu ˈö ˗an ˗wɔn ˈdhö ˈˈgbɩɩ˗ kö ˗yö ˗an kë ˗blɛɛsü ˈwɔn ˈbhaa ˗nu ˈgü, ˗an ˗ya ö ˗zo ˈˈpiʋ̈ ˗sü kö ˗yö ˗an kë bhë ˈwaa kë ˗a ˗gɔ ˈˈgbɩɩ˗. ˗Yö ꞊mɔɔn˗ ˗bha ˈö ˗kë ˗a ˗bha ˗Zlan ˗wɔn ˗nu, ˗a ˗bha ˈkɔdhi ˈgüwɔn ˗nu ɛɛnˈˈ ˗a ˗bha yö ˈˈwɛɛ kë ˗sü ˗nu ˈka. ˗A züdɔdhɛ ˈgü, ˈyaa ˗së kö ˈkwa yö ꞊va kë ˗sü ˗ya kwa ˗zo ˈˈpiʋ̈ ˈˈtʋ̈ŋ do ˈgü. ˗A ˗dhɛ ˈö ˈkwaa ˗mɔn ˗a ˗bha, kwa dua ˈyaa ˗mü kö ˈkwa˗ kë ˗sü ˗ya kwa ˗zo ˈˈpiʋ̈. Pë ˈö˗ kë ˗sü ˈdhö ˈˈgbɩɩ˗ kö ˈkwa˗ ˗ya kwa ˗zo ˈˈpiʋ̈, ˗yö ꞊mɔɔn˗ ˗bha ˈö kwa ˈgü ga ˈö ˈkwa ˗kan ˗a ˗bha. Yö ˈnën ˈö˗ ˗wɔn ˈgü, pë ˈö ˈkwa˗ yö ꞊dhɛ kwa ˗dho ꞊gwëë ˗a kë ˗sü ˗bha ˈö kwa dua ˈdhö ˗mü ˈkwa˗ ˈˈpɛ ˈgü ˈsɛnsɛn, kö ˈkwa˗ kë ˈdɔɔni ˈdɔɔni.

ˈˈGɔɔn zii do ˈbhaa ˗ya ˗pö: «ˈWɔn ˈö mɛn ˈˈdhiʋ̈ ꞊luu ˗a ˗bha, ˗ya ˗kë.» ˗Wo ˈö bhë gagade do ˈbhaa ˗ya ˈgü. ꞊Ya kë ꞊dhɛ ˈkwa ˈwɔn ꞊bhlëësü do ˈbhaa ˗ya kwa ˗zo ˈˈpiʋ̈ kö ˈkwa˗ kë, kwa dua ˗mü kö ˈkwa ˈˈdhiʋ̈ luuˈˈ ˗a ˗bha, kö ˈkwa kwa ˈgü dɔ ˈˈgbɩɩ˗ kö ˈkwa ˗mɔn ˗a kë ˗sü ˗bha. Kö ˈkwa kwa ˗zota ˗a ꞊bhlëë waa ˈwɔn ˗së ˈö˗ kë ˗sü dho ˗a kë kwa ˗dhɛ ˗an ˈgü, kwa ˗dho ꞊faan ꞊slɔɔ˗ ˈö ˈkwa˗ ˗kë. ˈYaa za ˈgü ꞊dhɛ ˈwɔn ˈbhaa ˗nu ꞊mɔɔn˗ ˗bha ˈwo ˗da kwa ˗gɛn ˈgü ˗an kë ˗sü ˗ӡian ˗ta, ˈˈkɛɛ kwa dua ˈyaa ˗mü kö ˈkwa ˗an ˈsü ꞊dhɛ pë ˈö˗ ˈˈslö ˈyaa ˈdhö ˗an ˈdhö, ˗kwa ˗an ˈsü ꞊ӡiaan ꞊dhɛ pë ˗nu ˈwo ˗dho kwa ˗takun kö kwa ˗gɛn ˗yö ˈdho ˈˈdhiʋ̈ ˗an ˈdhö.

ˈˈKɛɛ kwa dua ˗mü kö ˈkwa kwa ˗zota ˗së ˈka ˗kɔ ˗nu ˈö ˈwɔn ˈö ˈkwa˗ ˗ya kwa ˗zo ˈˈpiʋ̈ ˈkwa˗ ˈˈpiʋ̈ ˈkwa˗ kë ˗a ˈka ˗an ˈgü. ꞊Klaŋgɔmɛn Sinaidëë ˈö ö ˗de ˗nu ˈwɔn ˈö ˗gban ˗zo ˗yö ˗dhɛkpaɔ dhiʋ̈ˈˈ ˗së ˗dhɛ ˗sü ꞊bhlëë ˗bha ˗a draansü ˗dhɛ ꞊dedewo bhë, ˗ya ˗pö ˈwɔn suu ˈˈoo ˗su ˈö ˈkwa˗ ˈˈpiʋ̈ ˈkwa˗ kë, kwa dua ˗mü kö ˈkwa kwa ˗zota ˗a kë ˗kɔ ˈˈslö ꞊va ˈgü. ꞊Ya kë ˈˈdhʋ̈ ˗a ˈˈslö ˗blɛɛsü yö ˈti ˈwɔn ˈkun, kwa ꞊mɔɔn˗ ˗bha ˈö ˈkwa˗ ˈˈslö ꞊plɛ ˗naan, ˈˈslö ˗yaaga ˗naan ɛɛnˈˈ ˗an ˈˈwɛɛ ˗nu ˈwo dɔ ˗an ˈˈpiʋ̈ ˗an ˈgüdan.

Sinaidëë ˗ya ˗pö ˈzü ꞊dhɛ ˈˈtʋ̈ŋ ˈö ˈkwa ˗dho ˈwɔn ˈbhaa kë ˗sü bho ˗a ˈka kwa ˗zo ˈˈpiʋ̈ kö ˈkwa ˗da ˗a ˈˈwɛɛ ˈbhaa kë ˗sü ˗ӡian ˗ta bhë, ˗kwaa dɔ ˗së ˈka. Pë ˈö ˈkwa˗ ˗ya kwa ˗zo ˈˈpiʋ̈ kwa ˈti ˗mɔn ˗a kë ˗sü ˗bha, kö ˈkwa kwa ˗zota ˗a ˈgü ˗kplawo, ˗yö ꞊mɔɔn˗ ˗bha ˈö kwa ˈgüdan. ˈˈKɛɛ kö ˗a ˈˈwɛɛ ˈö ˈkwa ˗mɔn ˗a kë ˗sü ˗bha kö ˈkwa˗ ˗ya kwa ˗zo ˈˈpiʋ̈ kö ˈkwa˗ kë, kwa ˈgü yö ˈti ˗dho ga, kwa ˈˈɲan ˗dho kë ˈwɔn ˈˈwɛɛ ˗bha.

ˈWɔnzuan ˗së do ˈö ˗gban ˈwɔn ˈö bhë ˗a ˗bha, ˗yö Biblö ˈgü. ˗Yö ˗kun ˗gblüdë Davi ˈˈpiʋ̈ ꞊dhɛ ˈö ö ˗bha ˗Zlan Zoova ˗dhɔkë ˗a ˈgü ˗kɔ dɔ. ˈˈKɛɛ ˗Zlan ˗ya ˗pö ˗a ˗dhɛ ꞊dhɛ ˗a gbö Sadhomɔn ˈnën ˗dho yö ꞊bhlëësü ˈö bhë ˗a dɔ. ˈDhɛ ˈö ˗kë ˈˈdhʋ̈ Davi yö ˈti ö wë ˈgü ˗shiö ɛɛnˈˈ yö ˈti˗ pö ö ˗dho ˗a kë ˈˈgbɩɩdhɛ ˈka. ˗Yö yö ˈˈwɛɛ ˈbhaa ˗ya ö ˗zo ˈˈpiʋ̈ kö ˈö˗ ˗kë. ˗Yö ö ꞊faan ˗sü ˈö ˈwëëga waa ˗kwɛɛ ˈö˗ gbö dho yö ˈö bhë ˗a kë ˗an ˈka ˗an ˗kpa ˈkwëë˗.—1 Rois 8:17-19; 1 Chroniques 29:3-7.

ˈKö ˗kë ꞊dhɛ kwa ˗zotadhe ˗së ˗nu ˗draan, ˈö ˈkwa ˗gban ˈwɔn yö ˗kɔ yaa ˗nu ˗gɔ, ˈö ˈwɔn yö ˗kɔ ˗së ˗yö ˗kë kwa ˗gɔ, ˈö ˈkwa ˈwɔn ˗nu kë ˗sü ˗ya kwa ˗zo ˈˈpiʋ̈, ˗a ˈbhaa ˗ya kë ˈgügadhe ꞊mɔɔn˗ ˗bha ˈö ˗kë kwa ˈgü. ˈMën ˗kë? ˗A ˗gɛn ˗mü ꞊dhɛ pë ˗nu ˈwo kwa ˈgü ga ˈˈkpɔnŋtaadhɛ yaa ˈö yö ˗a ˈgü bhë, ˗an ꞊vadhɛ ˈwaa ˈsü kwa ˗bha. ˈWɔn ˈˈgbɩɩ˗ yaa ˗nu ˈö ˈwo mɛnbhɩɩdhe ˗nu ˗bha, ˈö ˈwo ˗kë ˈˈfleedhɛ ˗nu, ˗gblü ˗nu, ˈwɔn ˈö ˈyaa kpɛnŋdhö ˗a ˗bha kë mɛn ˈka ˗sü ˗nu, ˈˈyua ˗nu ɛɛnˈˈ ga ˗nu ˈdhö bhë, ˈkwa kwa ˗zota ˗an ˈgü, kwa ˗dho ˗a kë ꞊dhɛ kö ˗zotadhe ˗së ˗yö kë kwa ˗gɔ ˗kplawo?

[Pë ˈˈbin]

Yö ˈü˗ ˈˈpiʋ̈ ˈü˗ kë wo ˈti ü ˈsü ˗a ˈgü kö ˗ya ˗zɔn ꞊dhɛ ˈbhaa ꞊mɔɔn˗ ˗bha ˈü yö ˈˈwɛɛ ꞊slɔɔ toŋtoŋdhö ˗ee?

[Pë ˈˈbin]

ˈWɔn ˈbhaa kë ˗sü ˗yö ˈti ˗ɲan ˗gblüdë Davi ˗gɔ, ˗yö ö ˗kɔ ˗da ˗a ˈˈwɛɛ kë ˗sü ˈgü.