We ná wanane̱ mbad’a je̱ne̱ la mambo ńa bobe

NE̱NI o me̱ne̱no̱ mitakisan mena o makusano̱ e? Bamabie̱ jita ba mo̱nge̱le̱ ná jalabe̱ la mi myuedi di malee̱ nga o me̱ne̱ nde mambo o mbad’a bwam nga o mbad’a bobe. Biso̱ be̱se̱ di makusa ńai na ńai a mitakisan o longe̱, bō̱ basu buka bane̱. Nde ońola nje bato bō̱ ba mabengano̱ po̱ngo̱ miwe̱n ná ba tongwe̱le̱ bola lambo to̱ e be̱ nde ná ba kusi mitakisan, nde ke̱ bape̱pe̱ ba mabo̱bo̱ to̱ e be̱ nde oboso ba mitakisan misadi e?

K’eyembilan, dutea te̱ ná we o wasa ebolo. Walo o ekwal’ebolo, nde o si tongwe̱le̱ o kusa y’ebolo. Nje o me̱nde̱no̱ jo̱nge̱le̱ ombusa nika e? We ná wo̱nge̱le̱ ná ba bangi nde no̱ngo̱ wa, na ná nika nde e me̱nde̱no̱ be̱ ponda ye̱se̱, na wa o kwala ná, ‘To̱ moto a titi ná a no̱ngo̱ moto ka mba ońol’ebolo. Na si me̱nde̱ o kusa ebolo to̱ buńa.’ To̱, buka nika, we ná wese̱le̱ ná di lambo o kusino̱ ni ngedi po̱ di tukwe mbad’ango̱ ńa je̱ne̱ longe̱ lo̱ngo̱ le̱se̱, nde wo̱nge̱le̱ ná, ‘Na titi ná na tongwe̱le̱ o bola to̱ lambo o longe̱. Na titi to̱ moto mweńa.’ O ben bete̱medi te̱, ni ńai a mo̱nge̱le̱ nde ma mawane̱ mbad’a je̱ne̱ la mambo ńa bobe ombusa ponda.

Anane̱ mbad’a je̱ne̱ la mambo ńa bobe

Ne̱ni weno̱ ná o bola nika e? Tanga laboso na le pe̱ mweńa jita le nde ná o bie jemba ma mo̱nge̱le̱ ma bobe. Tanga di bupe̱ le nde ná wanane̱ mo̱. Wasa so̱ṅtane̱ ońola nje o si kusino̱ y’ebolo. K’eyembilan, mo̱ ye mbale̱ ná o si kusi nde mo̱ ońolana to̱ moto a si mapula o bola wa ebolo e? Nga ba ta nde ba pula moto nu bi bole̱ mambo mape̱pe̱ o si bino̱ bola e?

O soke̱ te̱ mo̱nge̱le̱ mo̱ngo̱ o mambo mō̱ te̱nge̱, nik’e me̱nde̱ jongwane̱ wa o sumwa ma mo̱nge̱le̱ ma bobe. Mo̱ o si no̱ngo̱be̱ te̱ ońol’ebolo ewo̱, nik’e mapula nde kwala ná o si bi bola to̱ lambo e? Mo̱ mambo mape̱pe̱ ma titi o matongwe̱le̱no̱ o bola bwam, k’eyembilan o mambo mō̱ o mbad’a mudī, o mbia to̱ na mako̱m mo̱ngo̱ e? Po̱ngo̱ miwe̱n ná o s’o̱nge̱le̱ ná nje ye̱se̱ o me̱nde̱no̱ bola e si me̱nde̱ tongwe̱le̱. Mo̱, we mbaki ná o si me̱nde̱ kusa ebolo to buńa e? Nde mambo mape̱pe̱ me weno̱ ná o bola ná o pange mo̱nge̱le̱ ma bobe.

Je̱ne̱ la mambo la bwam di mongwane̱ o bupe̱ mambo di te̱se̱no̱

Ye mimbu to̱ mininga we̱nge̱ bamuwaso ba bolino̱ beteledi bō̱ jombwea nje dipita leno̱, to̱ná be beteledi be si mabusise̱no̱ jo̱nge̱le̱ lao le̱se̱. Bā ná dipita le nde mbaki moto a be̱nno̱ ná a me̱nde̱ tongwe̱le̱ o bola mambo a te̱se̱no̱. Ka nje te̱ dongo di mabupe̱ di me̱nde̱no̱ o lee̱, dipita di titi buka te̱ tongwe̱le̱ o bola mambo o te̱se̱no̱; nde be beteledi be te̱ nde mweńa, ońolana moto ombo te̱ mambo o ni mbadi, nik’e mabola ná a be̱ne̱ je̱ne̱ la mambo la bwam di mongwane̱ o bupe̱ mambo a te̱se̱no̱.

Ná di be̱ mbaki ná je ná di tongwe̱le̱ o bola mambo di te̱se̱no̱, jangame̱n se̱le̱ no̱ngo̱ ponda o maka ma mambo me̱se̱, nde di bupe̱ pe̱ mo̱. O si bedi te̱ bola nika, ke̱ e mapula ná o duteye na iwiye̱ ye̱se̱ jombwea mambo mena o mapulano̱ tongwe̱le̱ o bola o longe̱ lo̱ngo̱. Ka laboso, mo̱ o be̱n so̱ mambo o te̱se̱no̱ o bola e? Ye lambo di bo̱bi ná moto a bole nde mambo mō̱ na mō̱, esibe̱ mo̱ no̱ngo̱ ponda o se̱le̱ te̱me̱ ná a duteye jombwea nje a mapulano̱ bola na mbale̱ o longe̱ lao. O nje e mombweye̱ din to̱ti la te̱se̱ye̱ biso̱me̱ne̱ mambo ma bupe̱, di me̱ne̱ pe̱te̱ ná Bibe̱l e ta e minda kwala ná: “Emba ma mena ma te̱nge̱n.”—Filipi 1:10.

Di máte̱se̱ so̱ te̱ mambo ma mweńa, e mabe̱ biso̱ lambo di bo̱bi o po̱so̱ ma me ońola longe̱ lasu la kriste̱n, longe̱ lasu la mbia, na ebol’asu ya musawedi. E me̱nde̱ be̱ bwam ná o bebotedi, di si te̱se̱ye̱ biso̱me̱ne̱ mambo jita o bupe̱, nde di bakise̱ pe̱ ná je ná di tongwe̱le̱ ma mena di te̱se̱no̱ na bo̱bise̱ la ńolo. Di te̱se̱ te̱ lambo diwo̱ lena le ndutu o po̱le̱, nik’e me̱nde̱ bo̱bise̱ biso̱, di pula na mo̱me̱ne̱ jese̱le̱ mo̱. Ońola nika nde yeno̱ bwam ná jabe mambo ma mano̱nge̱ pond’a bwaba o po̱le̱ mongo mongo, ná di be̱ne̱ mambo di te̱se̱no̱ mena ma si mano̱nge̱ ponda jita.

E yo̱ki kwalabe̱ ná, “moto a be̱n te̱ ńo̱ng’a bola lambo na mbale̱, e ná a bola mo̱.” Nika ńe pe̱ mbale̱. Di mábia te̱ mambo me biso̱ mweńa, e mapula pe̱ ná di be̱ne̱ ńo̱ng’a bola mo̱; nika nde e me̱nde̱ tute̱le̱ biso̱ o po̱ngo̱ miwe̱n ná di tongwe̱le̱ bola ma mambo. Di dutedi te̱ jombwea mweńa ma nje di te̱se̱no̱, na muńe̱nge̱ mwena nika e me̱nde̱no̱ wanea biso̱ ke̱ di tongwe̱le̱, di me̱nde̱ bata be̱ne̱ ńo̱ngi o bupe̱ ma mambo. Ye mbale̱ ná mitakisan mi me̱nde̱ be̱, nde di s’angame̱n je̱ne̱ mi mitakisan ka mambo di titino̱ ná di buka, o diwengisan jangame̱n nde je̱ne̱ mo̱ ka bete̱medi bena be mongwane̱ biso̱ o wala oboso.

Nde jangame̱n pe̱ wasa mbadi i mongwane̱ biso̱ o tongwe̱le̱ bola nje di te̱se̱no̱. Mutiledi C. R. Snyder, nu po̱ngi muwaso ma njiba jombwea mweńa ma dipita, a boli jo̱nge̱le̱ ná ońola lambo te̱ di te̱se̱no̱, jangame̱n dutea mbadi jita ya po̱le̱ mo̱. Nik’e me̱nde̱ bola ná, mbadi po̱ e si dango te̱, di me̱nde̱ keka mbadi nipe̱pe̱, nika na nika.

Snyder a boli pe̱ malea ná ponda iwo̱ jangame̱n bia tukwa mambo di te̱se̱no̱ o bupe̱. Yete̱na di titi tongwe̱le̱ lambo diwo̱ di te̱se̱no̱, tombise̱ la ponda o jo̱nge̱le̱ mo̱ di me̱nde̱ nde sukane̱ bo̱bise̱ biso̱. Nde di te̱se̱ye̱ te̱ biso̱me̱ne̱ lambo dipe̱pe̱ o bola, nik’e me̱nde̱ bola ná di we̱le̱ mapita masu omo̱ń a lambo dipe̱pe̱.

Bibe̱l e be̱n eyembilan a bwam jombwea din to̱ti. Kiṅe̱ David a ta a pula longea Yehova Loba lao tempe̱l. Nde Loba a kwalane̱ David ná mun’ao Salomo nde a me̱nde̱ be̱ne̱ y’edube. O mulopo ná a linge to̱ a wase ná ye̱ke̱i te̱ mo̱ nde a bole nika, David a wasi nde o bola mambo mape̱pe̱. A bolane̱ nde ngud’ao ńe̱se̱ o ko̱te̱le̱ mo̱ni na belongisan be me̱nde̱ pule̱ ná mun’ao a bole y’ebolo.—1 Kiṅe̱ 8: 17-19; 1 Myango 29:3-7.

To̱ e be̱ so̱ nde ná di mábe̱ne̱ dipita ońolana je o jana ná di si be̱ne̱ mbad’a je̱ne̱ la mambo ńa bobe nde ńa bwam ni mongwane̱ biso̱ o bupe̱ mambo di te̱se̱no̱, je te̱ nde ná di bo̱lo̱ne̱ dipita ponda iwo̱. Ońola nje e? Ońolana di si be̱n ngińa to̱ po̱ omo̱ń a mambo jita ma mabole̱ ná bato ba bo̱lo̱ne̱ dipita o nin wase. Di me̱ne̱ te̱ mambo ma bobe ma matakise̱ mbel’a moto ka tue, bila, si te̱me̱ la sim, maboa na kwedi, ne̱ni jeno̱ te̱ nde ná di benga be̱ne̱ mo̱nge̱le̱ ma bwam e?

[Duta]

O si we̱li te̱ kusa ebolo ewo̱ o tano̱ o pula, wangame̱n nde jo̱nge̱le̱ ná o si me̱nde̱ pe̱ kusa ebolo to̱ buńa e?

[Duta]

Kiṅe̱ David a tuko mo̱nge̱le̱ jombwea nje a tano̱ a te̱se̱ o bola