Se Idin̄wamde Fi Okûduọk Idotenyịn

ESINAM n̄kpọ didie ke ini n̄kpọ mîsan̄ake nte ekekerede? Ediwak ntaifiọk ẹdọhọ ke nte owo anamde n̄kpọ ke ini n̄kpọ mîsan̄ake ọfọn owụt m̀mê enye esinịm ke n̄kpọ ọyọfọn m̀mê isinịmke. Idụhe owo emi mînyeneke mfịna, ndien mfịna ndusụk owo esinen̄ede awak. Ntak emi ndusụk owo ẹsikemede ndifiak n̄kop inemesịt nnyụn̄ nnam n̄kpọ, ekpededi n̄kpọ oro ikanaha ibuot akpa, ke ini edide ndusụk owo ẹma ẹnyenyene ekpri mfịna mmọ iyomke-yom ndifiak nnam n̄kpọ oro aba?

Yak idọhọ ke oyom utom, ndien afo aka ebịne owo emi esidade owo ke utom, edi enye idaha fi. Didie ke edise se itịbede oro? Emekeme ndikere ke owo imaha fi, ntre ke idụhe owo emi edidade utọ owo nte afo ke utom. Se idiọkde ikan edi ke emekeme ndiyak se itịbede oro anam fi ekere ke idụhe se afo ekemede ndinam ọfọn ke uwem emi, ke uwọrọke n̄kpọ. Owo emi ekerede n̄kpọ ntem isinịmke ke n̄kpọ ọyọfọn.

Kûsukere ke N̄kpọ Idifọnke

Nso ke akpanam man etre ndisikere ke n̄kpọ idifọnke? Akpa n̄kpọ edi ndidiọn̄ọ ke nte esikerede n̄kpọ edi oro. Ọyọhọ iba edi ndiyom usụn̄ ntre. Nso idin̄wam fi? Kere n̄kpọ en̄wen emi akanamde n̄kpọ okûsan̄a nte ekekerede. Ke uwụtn̄kpọ, ndi edi akpanikọ ke ntak emi owo mîkadaha fi ke utom edi ke owo iyomke utọ owo nte afo? Mîdịghe ndi ntak edi ke unyeneke se ẹkeyomde ke itieutom oro?

Ke ini etịmde ekere se iketịbede, oyokụt ke idiọkke nte afo ekerede. Owo nditre ndida fi ke utom ini kiet iwọrọke ke inyeneke se ekemede ndinam ọfọn. Sitie kere mme n̄kpọ emi afo enen̄erede ọdiọn̄ọ ndinam, utọ nte se esinamde ọnọ Abasi, nte odude uwem ye mbonubon fo, ye nte esinamde n̄kpọ ye mme ufan fo. Kûsutie ukere nsio nsio ndiọi n̄kpọ oro ẹkemede nditịbe nnọ fi. Ti ke idụhe nte ekemede ndidiọn̄ọ ke owo ididaha fi ke utom tutu amama. Edi enyene n̄kpọ en̄wen emi ekemede ndin̄wam fi esitre ndikere ke n̄kpọ idifọnke.

Sitie Kere Nti N̄kpọ Emi Aduakde Ndinam

Ke ndondo emi, ntaifiok ẹtịn̄ se idotenyịn edide. Mmọ ẹdọhọ ke idotenyịn esịne owo ndinịm ke imekeme ndinam se iduakde ndinam ke ini iso. Se mmọ ẹtịn̄de emi aban̄a idotenyịn enen, edi idịghe ofụri se idotenyịn edide edi oro. Nte idikụtde ke ibuotikọ oro etienede, idotenyịn esịne n̄kpọ akan oro. Edi se ntaifiọk ẹtịn̄de ẹban̄a idotenyịn ekeme ndin̄wam nnyịn ke nsio nsio usụn̄. Emi ekeme ndin̄wam nnyịn itie ikere nti n̄kpọ oro iduakde ndinam sia imodori enyịn ke iyekeme ndinam.

Edieke iyomde ndisinam se iduakde ke ini iso, ana ikpep ndisibiere se iyomde ndinam nnyụn̄ n̄kụt ete ke imanam mmọ. Edieke edide usûkemeke ndinam se aduakde, ọfọn afiak ekere mme n̄kpọ oro esiduakde ndinam. Akpa kan̄a, ndi emenyene mme n̄kpọ emi ẹkebierede ndinam? Edieke nnyịn mîkpemeke, imekeme ndisịn idem iyom se ididiade tutu ifre nditie n̄kere se inen̄erede idi akpan n̄kpọ. Ata ediwak isua ko, Bible ama etetịn̄ ke ọfọn ifiọk se idide akpan n̄kpọ. Enye ọdọhọ ete: ‘Ẹdụn̄ọde ẹfiọk se idide akpan n̄kpọ ikan.’​—Philippi 1:​10.

Ima ibebiere mme n̄kpọ emi ẹdide akpan n̄kpọ, idisọn̄ke nnyịn ndifiọk mme n̄kpọ emi ikpanamde, utọ nte se ikpanamde inọ Abasi, se ikpanamde inọ ubon nnyịn, ye se ikpanamde man inyene se idiade. Edi ifọnke se iduakde ndinam awawak akaha, ndien akpana mme n̄kpọ emi iduakde ndinam ẹdi mbon oro idiọn̄ọde ke imekeme ndinam. Edieke ọsọn̄de nnyịn ndinam se ikaduakde, idem ekeme ndimem nnyịn tutu nnyịn iduọk idotenyịn. Ntem, edieke enyenede akamba n̄kpọ emi aduakde ndinam, emekeme nditọn̄ọ nnam nsịtnsịt.

Ke ima ikebiere mme n̄kpọ oro iyomde ndinam, n̄kpọ en̄wen edi ndiyom usụn̄ nnam mmọ. Ima itie ikere ufọn oro ididiade edieke inamde se ikaduakde, eyenen̄ede ọdọn̄ nnyịn ndinam n̄kpọ oro. Imọdiọn̄ọ ke enyene mme n̄kpọ emi ẹdinamde ọsọn̄ nnyịn ndinam se ikaduakde, edi inaha iyak mmọ ẹnam nnyịn itre ndinam se ikaduakde.

Edi enyene akpan n̄kpọ en̄wen emi anade inam man ikeme ndinam se ikaduakde. Owo kiet emi esiwetde n̄wed, emi ekerede C. R. Snyder, ama ada ini odụn̄ọde nte idotenyịn esin̄wamde owo. Enye ọdọhọ ke ana owo enyene nsio nsio usụn̄ emi enye edinamde se enye akaduakde. Ntem edieke usụn̄ kiet mîfọnke, enye anam ke usụn̄ en̄wen.

Snyder ama etịn̄ n̄ko ke ọfọn idiọn̄ọ ini emi ikpọkpọn̄de kiet ke otu n̄kpọ emi ikaduakde ndinam ikanam en̄wen kan̄a. Edieke nnyịn mîkemeke ndinam n̄kpọ emi ikaduakde, ufọn idụhe nditịmede esịt sia oro edikam inanam idem emem nnyịn. Utu ke nditie nseme idem, imekeme ndiyom n̄kpọ emi idikemede ndinam.

Imenyene ata eti uwụtn̄kpọ ke Bible. Ama enen̄ede ọdọn̄ Edidem David ndibọp temple nnọ Jehovah Abasi esie. Edi Abasi ama ọdọhọ enye ke Solomon eyen esie edibọp temple inọ imọ. Utu ke David ndiyat esịt m̀mê ndikọn̄ nyịre ke se enye akaduakde ndinam, enye ama ọsọsọp ekere n̄kpọ en̄wen emi enye edinamde. Enye ama ada ofụri odudu esie etịm mme n̄kpọ emi ẹdidade ibọp temple oro obon, onyụn̄ enịm ata ediwak okụk ọnọ eyen esie man ada anam utom oro okụre.​​—1 Ndidem 8:​17-​19; 1 Chronicle 29:​3-7.

Ọkpọkọm imesikere ke n̄kpọ ọyọfọn, imesinyụn̄ inyene nti n̄kpọ emi iduakde ndinam, osụk enyenyene mme n̄kpọ emi ẹkemede ndinam nnyịn ikûnyene idotenyịn. Ntak idọhọde ntre? Sia ediwak n̄kpọ emi ẹsinamde mme owo ẹkûnyene idotenyịn isịneke nnyịn ke ubọk. Ikpọ mfịna emi ẹdude ke ererimbot, utọ nte nsọn̄ọn̄kpọ, ekọn̄, utụk, ufịk, udọn̄ọ, ye n̄kpa ekeme ndinam ọsọn̄ owo ndinyene idotenyịn. Ntre, nso ke ikpanam man ika iso inyene idotenyịn?

[Ndise]

Edieke owo mîdaha fi ke utom, ndi emesikere ke udûnyeneke utom tutu amama?

[Ndise]

Edidem David ama ọsọsọp okpụhọde se enye akaduakde ndinam