haar mat maaniye!

jab aap kisi mushkil mein hote hain, tab aap kya karte hain? kya aap bahot zyada nirash ho jaate hain ya fir himmat se uska saamna karte hain? yah sach hai ki hum sabki zindagi mein mushkilein aati hain, lekin kuch logon ki zindagi mein to museebaton ka pahad toot padta hai. kai jaankaron ka kehna hai ki mushkil vakt mein ek vyakti jis tarah ka ravaiya rakhta hai, usse pata chalta hai ki uski soch kaisi hai. aisa kyon hota hai ki kuch log badi-se-badi mushkil paar kar lete hain, lekin kuch log chhoti-si mushkil aane par bhi himmat haar jaate hain?

maan leejiye ki aap naukri dhoondh rahe hain. aap ek interview dete hain, lekin aapko naukri nahin milti. tab aapko kaisa lagega? kya aap yah socheinge, ‘mujh jaise insan ko kaun naukri par rakhega? mujhe kabhi naukri nahin milegi’? ya kya aap aisa socheinge, ‘main kisi kaam ka nahin. main zindagi mein kuch bhi haasil nahin kar paaunga’? agar aap aisa socheinge, to zaroor nirash ho jaayenge.

galat soch ko haavi mat hone deejiye!

agar aapke man mein bure khayal aayen, to aap kya kar sakte hain? sabse pehle aapko samajhna hoga ki kis tarah ki soch aapko nirash kar sakti hai. fir aisi soch ko khud par haavi hone mat deejiye. jab aapke saath kuch bura hota hai, to yah sochne ki koshish keejiye ki uski kya vajah rahi hogi. udahran ke liye sochiye ki kya aapko naukri isliye nahin mili ki koi aapko pasand nahin karta ya fir aapke paas jo hunar hain, woh kanpni ki maangon se alag hain.

ek pal ke liye thande dimag se sochiye ki kya sach mein haalat itne bure hain ya fir aap yoon hi itni chinta kar rahe hain. jab aapke saath kuch bura hota hai, to yah mat sochiye ki aap kabhi kuch achha nahin kar paayenge. iske bajay achhi baaton ke baare mein sochiye. jaise aap soch sakte hain ki aapka ghar achhe se chal raha hai ya aapke achhe dost hain. agar aapko naukri nahin mili, to aisa mat sochiye ki aapko kabhi naukri nahin milegi. aap aur kya kar sakte hain taaki galat soch aap par haavi na ho?

lakshya rakhiye

haal hi ke saalon mein jaankaron ne bataya hai ki ummeed rakhne ka kya matlab hai. unhonne kaha ki ummeed rakhne ka matlab hai, khud par bharosa hona ki aap apne lakshya haasil kar leinge. aisa karne se aap apni soch sudhar paayenge aur apne lakshya haasil kar paayenge. agle lekh mein hum ummeed ke baare mein aur bhi baatein jaaneinge.

kya aapko lagta hai ki aap apne lakshya haasil kar paayenge? agar aap chhote-chhote lakshya rakhein aur unhein haasil kar lein, to khud par aapka bharosa badhega. agar aapne ab tak koi lakshya nahin rakha hai, to aap ek lakshya rakhkar use paane ki koshish kar sakte hain. kai baar hum zindagi ki bhaag-daud mein itne vyast ho jaate hain ki bhool jaate hain ki zindagi mein kya baat sabse zaroori hai aur hamare lakshya kya hain. bible mein bahot pehle hi is baare mein salah di gayi thi. ismein likha hai, ‘pehchano ki zyada ahmiyat rakhnevali baatein kya hain.’​—filippiyon 1:10.

agar hum samajh jaayen ki hamari zindagi mein kya baat sabse zaroori hai, to hum us hisab se lakshya rakh paayenge. lekin hamein dhyan rakhna chaahiye ki hum shuroo-shuroo mein bahot zyada lakshya na rakhein. saath hi, hamein aise lakshya rakhne chaahiye jinhein hum aasani se poora kar sakte hain. agar hum koi aisa lakshya rakhein jo bahot mushkil hai, to hum nirash hokar haar maan leinge. isliye achha hoga ki hum chhote-chhote lakshya rakhein, jinhein hum aasani se haasil kar sakte hain.

ek purani kahavat hai, jahaan chaah, vahaan raah. ek baar hamne lakshya tay kar liya, to uske baad hamein thaan lena chaahiye ki hum use poora karke hi raheinge. agar hum sochein ki woh lakshya haasil karne se hamein kya-kya faayde honge, to hum use poora karne mein aur bhi mehnat kareinge. ho sakta hai ki kuch mushkilein aayen, lekin hamein nirash hokar haar nahin maanni chaahiye.

hamein pehle se hi sochkar rakhna chaahiye ki hum apna lakshya haasil karne ke liye kya kareinge. ek lekhak c. r. snyder ne salah di ki apne lakshya ko haasil karne ke liye hamein alag-alag tareeke sochkar rakhne chaahiye. agar ek tareeka kaam na aaye, to aap doosra tareeka apna sakte hain aur agar doosra nahin, to teesra.

is lekhak ne yah bhi kaha ki shaayad kai baar hamein apne lakshya badalne padein. agar hum koi lakshya haasil nahin kar paa rahe hain, to uske baare mein sochte rehne se hum pareshan ho jaayenge. vahin agar hum apna lakshya badal dein aur aisa lakshya rakhein jise hum haasil kar sakte hain, to hamare man mein fir se ek ummeed jaag jaayegi.

bible ke zamane mein raja daavid ne bhi kuch aisa hi kiya. usne socha tha ki woh apne parmeshvar yahova ke liye ek mandir banayega. lekin parmeshvar ne usse kaha ki woh nahin, balki uska beta mandir banayega. is par nirash hone ke bajay, daavid ne apna lakshya badal diya. usne socha ki mandir banane mein woh apne bete ki madad karega aur woh sona-chaandi aur doosri cheezen ikattha karne mein laga gaya.​—1 raja 8:17-19; 1 itihas 29:3-7.

ho sakta hai, hum apni zindagi mein khush rehna aur ummeed rakhna seekh jaayen, lekin fir bhi hum kabhi-kabhi nirash ho sakte hain. woh isliye ki kai cheejein hamare bas mein nahin hotin. aaj log gareebi, yuddh, anyay aur beemariyon ki vajah se nirash hain. in cheezon ke baare mein sochkar shaayad hum ummeed kho baithein. to fir saval uthta hai, kaun hamein ummeed de sakta hai?

[page par tasveer]

agar aapko koi naukri na mile, to kya aap socheinge ki aapko kabhi naukri nahin milegi?

[page par tasveer]

raja daavid ne apna lakshya badla