Malabanammu i Pannegatibo

ANNI i reaksiommu nu egga ira i mariga nga problemam? Mangurug i aru nga eksperto nga depende ta tabbag mu tatun nga pakkiavu, masingan nu positibo onu negatibo ka nga tolay. Makkaproblema ittam ngamin ngem mas madammo i problema na karuan. Ngem ngatta gafu ta egga danuri totolay nga oras tu nappasa ngana i problemada ay magayayya mana uli ira anna tuloy lagapa mana i pattoleda? Ngatta gafu gapa ta egga danuri makkafi i nonoda maski nu baddi laman i problemada?

Angngariganna, imajinammu nga magaplay ka ta trabahu. Ininterviu daka ngem ari ka nga nakapasa. Anni i reaksiommu nu kunnatun i mesimmu nikaw? Baka nonopammu nga sikaw i mismu nga problema tapus kummu ta baggim, ‘Awan tu maya nio. Kakku vuluvuga makala tu trabahu.’ Onu baka mas marake paga megafu laman ta tattadday nga problema mawanakka ngana tu ganas ta ngamin nga gannug tapus nonopammu, ‘Awan ngana laman tu makasta nga makuà. Awan tu kwentà nga tolay.’ Kuddanatun i appana-panono na negatibo nga tolay.

Labanammu i Pannegatibo

Kunnasim malabanan i pannegatibo? Ollu, mawag labbi nga ammuammu nu ngatta mannegatibo ka tapus labanammu danatun. Mannono ka tu tanakuan nga rason nu ngatta ari ka nakapasa ta interviu. Angngariganna, kurug kari nga ari ka nakapasa megafu ta awan tu maya nikaw nga manga ta trabahu? Onu baka egga laman gapa i alegan na pinagaplayammu tu tanakuan ira nga kualipikasion?

Nu ammum i kumpleto nga informasion mammuammu nga sosobra laman i negatibo nga annonono mu. Makagim kari insigida nga awan ngana vuluvuga tu makuam nga makasta gafu laman ta ari ka nga nala ta tadday nga trabahu? Ngatta ariammu nonopan i makasta ira nga nakuam ta pattolem gitta na ta espiritual ira nga goal onu addetammu, relasiommu ta familiam onu ta kokkofummu? Megafu ta sosobra nga pannegatibo baka abbo mu nga egga ira i marake nga mesimmu. Mawag tu alsammu danatun ta nono mu. Makagim kari talaga nga ari ka ngana vuluvuga makaleg tu trabahu? Aru paga i makuam tapenu ari ka nga mannegatibo.

Positibo nga Appana-panono nga Nakafokus ta Goal

Ta nappasa nga daga-ragun, egga i makapa-interes ngem limitadu nga kebalinan na iddanama nga kinagi na researcher ira. Kakkagiadda nga nelagum ta iddanama i pangurug nga mala mu noka i goal mu. Ngem gitta na mabibbig mu ta tumunug nga artikulo, ari laman tu yatun i laguman na iddanama. Maski kunna, aru laggapa i meyuffun nittam natun nga kebalinan na iddanama. Megafu tatun, mapeggan ittam tu mas positibo nga appana-panono nga nakafokus ta goal.

Tapenu mala mu i addetammu ira ta mappange, sangawe pagalaman, egga ngana nakuan i addetammu ira nga mammadde mu. Nu awan paga tu nadde mu, makasta nga pannonopammu tu mapia nu anni ira i kayà mu nga addetan. Ngem ollu labbi, egga kari talaga i goal mu ira? Baka nasanay ngana ittam ta rutina tam ta kadaggaw anna sobra i ka-busy tam yayya nga ariattam ngana nonopan nu anni talaga i kayà tam nga mesimmu ta pattoletam anna nu anni i pinaka-importante nittam. Kunnaw i nabayag ngana ngem makakkasta nga tabarang na Biblia tapenu ammu tam i prayoridad tam: ‘Siguraduannu i mas importante nga ganna-gannug.’—Filipos 1:10, NW.

Nu ammu tam i prayoridad tam, mas mabi para nittam nga pilian i importante ira nga goal ta spiritual, ta familia tam, anna ta sekular nga trabahu tam. Ari nakuan nga napakaru i goal tam ta gafu anna piliattam nakuan danuri goal nga mawayya tam nga makua. Megafu ta nu kuruga mariga i goal, makkafi i nono tam anna ariattam ngana nga kuan yatun. Yayya nga sisinu tam nakuan nga gawatan i darakal anna mabayag ira nga goal imbes tu pamittanattam nga gawatan danatun.

Egga bi i akkagianan nga i kayàna kagian ay “nu talaga kayà mu, magga iremediom yatun.” Nu mittan kurug gapa yatun. Nu manono mu ngana nu anni ira i importante nga addetammu, mawag tu karagatammu anna determinadu ka nga kuan danatun tapenu magawa mu. Mapasikammu i determinasiommu nu nonopammu nu ngatta importante i addetammu ira anna i bala-balo nga malawa nu magawa mu danatun. Siempre egga ira i makefugag nikaw ngem itulu-tuloy mu nakuan nga gawatan i addetammu ira anna ari ka nga magimmang.

Ngem mawag gapa nga nonopattam nu anni ira i praktikal ira nga makua tam tapenu magawa tam i goal tam ira. Ginigiammu tu mapia na tadday nga autor nga si C. R. Snyder, i importansia na iddanama, tapus kinagina nga mawag tu nonopan na tadday nga tolay nu anni ira i makuana tapenu gawatan i goal-na ira. Tapenu sonu ari nga efektibo i tadday nga nanonona, egga paga i mekadua, mekatallu, anna aru paga.

Kagian paga ni Snyder nga mawag tu ammu tam nu kanni tam nga talianan i tadday nga addetan. Nu ifeffuersa tam nga gawatan i tadday nga addetan maski nu awan ngana mabba tu makua tam, makkafi laman i nono tam. Mas makasta nu talianattam yatun tu mas realistiko nga addetan tapenu egga i tanakuan nga awayya tam nga iddanaman.

Egga i makoffun nga ehemplo ta Biblia meyannung tatun. Tadday ta kakayà nga addetan ni Patul David ay i pamataddag ta templo para ta Diosna nga si Jehova. Ngem kinagi na Dios kani David nga neyawa ta anana nga si Solomon i pribilehio nga kuan yatun. Nadismaya si David ngem imbes tu marreklamo yayya onu ifuersana i kayàna, inulina lallagu i addetanna. Inufuna i siki-sikanna ta pagunnug tu fundu anna materiales nga kawagan na anana tapenu mabalin i proyekto.​—1 Patul Ira 8:17-19; 1 Cronicas 29:3-7.

Maski nu ta baggi tam lagapa ay masikan ngana i iddanama tam megafu ta nalabanattam i pannegatibo anna positibo ngana i appana-panono tam nga nakafokus ta goal tam ira, baka kurang lagapa i iddanama tam. Ngatta? Megafu ta ariattam nga kontroladu i magaru ta kawan tu iddanama nga maekspiriensa tam taw nga mundo. Nu nonopattam i makakonsumision ira nga problema nga makafekto ta totolay gitta na kinapobre, gerra, kawan na hustisia, anna i taki anna patay nga kanayun nga mamappeligro nittam—kunnasi ittam nga makapattalupaddian nga minaggiddanama?

[Letratu]

Nu ari ka nakapasa ta inaplayammu, nonopammu kari nga ari ka ngana vuluvuga makala tu trabahu?

[Letratu]

Inuli ni Patul David i addetanna ira