Пессимизмні тобыр поларзың

Пірее ниме килістір полбазар, хайди тудынчазар? Кӧп специалисттер пу сурыға хайди нандырчатханыңар сірер оптимист алай пессимист полчатханыңарны кӧзітче тіп санапчалар. Пістің прайзыбыстың сидіктер пар: кемнің-де кӧп арах, кемнің-де асхынах арах. Ноға кем-де аар чуртас полза даа, чобағлар кӧрзе дее, холын тӱзірбинче, кем-де, тізең, кӧмес ле сидіктер полза, холын тӱзірібісче?

Кӧзідімге, сірер тоғыс тілепчезер. Сірернең чоохтасчалар, че тоғысха албинчалар. Аның соонда хайдағ сағыстар кірчелер? Арса, позыңарны ла пыролапчазар: «Мин осхас тоғысчы кемге кирек? Мин хаҷан даа тоғысха кір полбаспын». Алай тоғысха кір полбаан ӱчӱн прай чуртазыңар хомай пілдірче бе? «Мин пір дее нимее чарабаан кізібін. Мин пір дее кізее кирек чоғылзым», — тіп сағын сыхчазар ба? Пастағы даа, ікінҷі дее кӧзідімде пессимизм іле кӧрінче.

Пессимизмнең харбасханы

Хайди пессимизмнең харбазарға? Пастағы паза иң аарлығ алтым: хомай сағыстарны сизініп оңнирға. Ікінҷі алтым: аннаң харбазарға. Пол парған кирекке пасха кӧріснең кӧрерге кӱстеніңер: кӧзідімге, сірерні пір дее кізі тоғысха аларға хынминчатхан ӱчӱн албааннар ба? Алай пастых пасха квалификациялығ кізі тілеен ме?

Сынап ниме полчатханын кӧрерге ӱгреніп алзар, полған киректі иртіре хомай кӧзітчеткен пессимистическай сағыстарны ілезіне сығар поларзар. Сірерні пір хати тоғысха албааннары сынап пір дее нимее чарабаан кізі полчатханыңарны таныхтапча ба? Чуртастың пасха сала маңнаныстығ сариларынаңар сағын кӧріңер: кӧзідімге, духовнай кӧстеглердеңер, сӧбіредегі паза нанҷыларның аразындағы палғалыстардаңар. Алнынзархы чуртазыңарны хомай ла саринаң кӧрерге кӱс полчатханыңарны сизінерге ӱгреніп алыңар, анаң андағ сағыстарны хыйа тастаңар. Сағын кӧріңер, хаҷан даа тоғыс таап полбазыңарны сірер сынап пілчезер бе? Ағаа хоза, пессимизмні утып аларға полысчатхан пасха даа оңдайлар пар.

Чахсы полар тіп сағынғаны паза турғысхан кӧстеге чидерге кӱстенгені

Халғанҷы чылларда істезігҷілер ізеністеңер хынығ, че ізеністің прай сарин кӧзітпинчеткен сағысха килгеннер. Кізінің турғысхан кӧстеге чидіп аларында ікінҷілебинчеткенін олар ізеніс тіп санапчалар. Хайди мының соондағы статьяда кӧрербіс, ізеніске кӧстеге читкенінең хай-хай кӧп ниме кірче, че пірееде пу определение орта полча. Позыңның ізенізіңе чидіп аларыңа киртініп, чахсы полар тіп сағынарға паза турғысхан кӧстеге чидерге кӱстенерге ӱгреніп аларға чарир.

Турғысхан кӧстеглерібіске чидіп аларына киртініп алар ӱчӱн, кӧстеглер турғызарға паза оларға чидерге ӱгреніп аларға кирек. Читкен кӧстеглерің чох полза, хайдағ кӧстеглер турғысчазар чахсы сағынып аларға кирек. Пастап сағынып алыңар: сірернің хайдағ-да кӧстеглер пар ба? Кӱннің сай полчатхан киректерге сабыл парыбызып, чуртаста нимее сынап чидіп аларға хынчатханыбысты паза піске ниме иң аарлығ полчатханын чідір саларға уғаа оой. Чуртаста ниме пастағы орында поларға кирек полчатханнаңар Библияда хаҷанох пазыл парған: «Постарыңа иң артыхты таллаңар» (Филипптегілерге 1:10).

Чуртаста пастағы орынға аарлығ нимелерні турғыс салза, чуртастың аймах-пасха сариларында, кӧзідімге, сӧбіреде паза духовнай киректерде, хайдағ кӧстеглер турғызарға пілдістіг арах полар. Че пастағы тустарда иртіре кӧп кӧстеглер турғыспасха кирек, чидіп алар ла кӧстеглер турғызарға кирек. Турғысхан кӧстеглерге чидіп аларға тың аар полза, кӧңнің тӱс парып, турғысхан кӧстеглеріңні артыс таа саларзың. Аннаңар, чидіп аларға кӧп тус кирек, улуғ кӧстег турғызар орнына, аны табырах чидіп алар, кічіг кӧстеглерге чар салза, чахсы поларҷых.

«Хынзаң на оңдай табарзың» тіп сӧспек пар. Удаа сах іди пол парча. Ӧӧн кӧстеглер турғысхан соонда, оларға чидер ӱчӱн, тідімніг поларға паза прай кӱс саларға кирек. Турғысхан кӧстег нинҷе аарлығ полчатханнаңар паза ағаа читсең, хайдағ салтарлар поларынаңар сағынзаң, тідімніг арах поларзың. Сидіктер полар, че ол сидіктерге, туюх чол чіли, кӧрбеске, ас парыбызар тағ чіли, кӧрерге кирек.

Кӧстеглерібіске чидер ӱчӱн, хайди оларға чидіп аларынаңар сағынарға кирек. Ізеніс нинҷе аарлығ полчатханнаңар улуғ істезіг апарған Рик Снайдер турғысхан кӧстеге чидіп аларға нинҷе-де оңдайнаң кӱстенерге чӧп пирче. Пастағы оңдай киліспинчетсе, ікінҷі, ӱзінҷі паза аннаң даа пасха оңдайларнаң тузаланарға чарир.

Снайдер пір кӧстегні пасха кӧстегнең алыстырарға ӱгренерге чӧп пирче. Турғысхан кӧстеге пір дее чит полбинчатсабыс, че тохтабин чидерге кӱстенчетсебіс, кӧңнібіс ле тӱс парар. Че ол кӧстегні чит полар кӧстегнең алыстырыбыссабыс, чидіп аларға ізеніс полар.

Библияда анзын киречілепчеткен чахсы кӧзідім пар. Давид хан Иеговаа, позының Худайына, храм пӱдір пирерге тың хынған. Че Худай Давидке храмны аның оолғы, Соломон, пӱдірер теен. Киректер іди алыс парғанда, Давидтің кӧңні тӱс парбаан, хайди даа пӱдірербін тіп сағынмаан, че кӧстиин алыстырыбысхан. Оолғына храмны пӱдірерге кирек полар ахчаны паза материалларны, прай кӱзін салып, тимнеп сыххан (1 Царей 8:17—19; 1 Летопись 29:3—7).

Пессимизмнең кӱрезіп, чахсы полар тіп сағынып паза турғысхан кӧстеге чидерге кӱстеніп, кӧңнібіс тыыт ползабыс таа, піске ізеніс читпеске айабас. Ноға? Пу чир-чалбахта полчатхан киректерні, ноо даа ниме итсебіс, алыстыр полбаспыс. Чоннарны иреелепчеткен хызылысты, чааларны, сайбағларны, хорғыстығ ағырығларны паза ӧлімні кӧріп, хайди кӧңнібіс тӱзірбеске?

[Хоос]

Пір хати тоғысха кір полбазар, хаҷан даа тоғыс таап полбассар ба?

[Хоос]

Давид хан кӧстеглерін алыстырарға хорыхпаҷаң.