Kaka Inyalo Loyo Paro ma Ok Owinjore

INENOGA nade pek miromogago? Jotim nonro mathoth wacho ni dwoko mar penjono nyalo nyiso ka be in gi paro mowinjore kata ooyo. Waduto waromoga gi chandruoge e ngimawa. Kata kamano, nitie joma nigi chandruoge madongo moloyo jomoko. Ang’o momiyo jomoko nyaloga nyagore maber ma gilo chandruok moro mi gidog e ngimagi mapile, to jomamoko kata mana chandruoge matindo nyosoga chunygi chuth?

Kuom ranyisi, wawach ni imanyo tich. Idhi e interview, kata kamano, ok miyi tijno. Inyalo chako paro ni jogo ok dwari, kata neno ka gima ok ibi yudo tich nyaka chieng’. Samoro inyalo wacho e chunyi ni, ‘An onge ng’at ma biro ndika tich.’ To marachie moloyo, inyalo yie mondo gima kamano omi ichak paro ni in ng’at manono, kendo ni onge gimoro amora maber minyalo konyogo jomoko. Moro ka moro kuom wechego nyalo nyiso ni ng’ato nigi paro ma ok owinjore.

Kedo gi Paro ma Ok Owinjore

En ang’o minyalo timo mondo iked gi paro ma ok owinjore? Okang’ mokwongo en nono ni paro mane ma ok owinjore minyalo bedogo. Kae to ichak kedo gi parogo. Kuom ranyisi, tem ane nono gimomiyo ne ok iyudo tijno kata obedo ni ne itimo interview. Be en adier ni ne ok iyudo tijno nikech onge ng’ata ang’ata ma dwaro ndiki tich? Koso nyalo bedo ni wuon tijno ne dwaro ng’at ma nigi lony moko ma in iongego?

Ka po ni inono weche e yo ma adimba kamano, ibiro fwenyo ni in e ma ne in gi paro ma ok owinjore. Ka weche ok odhini maber kamoro, be mano nyisoni koro weche duto ok bi dhini maber? Donge inyalo paro kuonde mamoko ma weche osedhinie maber, kuom ranyisi, e winjruok ma in-go gi Nyasaye, winjruok ma un-go gi joodu, kata gi osiepeni? Gol paro moro amora ma ok owinjore minyalo bedogo e wi kinde mabiro. To kiwacho awacha adier, be inyalo bedo gadier chuth ni ok ibi yudo tich nyaka chieng’? Nitie gik mamoko ma bende inyalo timo mondo iked gi paro ma ok owinjore.

Keto Pachi Kuom Gik Migombo Timo Nyalo Konyi Loyo Paro ma Ok Owinjore

E higni machiegnigi, jotim nonro osetemo lero tiend geno, kata kamano, yo ma gilerego orem. Giwacho ni geno oriwo bedo gadier ni ibiro chopo gimoro amora midwaro timo. Mana kaka wabiro neno e sula ma luwo, geno oriwo gik mang’eny. Kata kamano, yo ma jotim nonro lerogo tiend geno pod nyalo konyowa e yore mang’eny. Ka waketo chenro mar gik ma dwaher timo kendo waketo pachwa e gigo, wanyalo loyo paro ma ok owinjore.

Ka po ni wadwaro bedo gadier ni wabiro chopo chenrowa ma kinde mabiro, nyaka watem matek mondo watim gik ma wasechano e kindegi. To kifwenyo ni ok ichopga gik michano timo, nyalo dwarore ni ipar matut e wi chenro mamoko michano timo. Mokwongo, be nitie gimoro amora misechano timo? Yot ahinya mondo chandruoge kod gik mamoko ma waromogo e ngimawa omonwa nono gik madongo monego waket mokwongo. Ka luwore gi wachno ne ane puonj moro ma Muma ne osechiwo chon. Owacho kama: “[Yanguru] gadier gik ma dwarore moloyo.”​—Jo-Filipi 1:​10.

Bang’ ka waseyango gik madongo monego waket mokwongo e ngimawa, biro bedonwa mayot chopo chenro mopogore opogore ma wanyalo keto e ngimawa, kuom ranyisi, gik ma mulo winjruokwa gi Nyasaye, ngimawa mar joot, kod tich. Kata kamano, ok ber keto chenro mar gik mang’eny ma dwaher timo. Kar mano, wanyalo keto chenro mar chopo e gimoro achiel mayot mwanyalo timo. Ka iketo chenro mar chopo e gimoro ma ok yot timo, chunyi nyalo nyosore ma ijogi. Kuom mano, ber chano timo gik matindo tindo ma nyalo konyi chopo e chenroni mar timo gik madongo.

“Jakinda e ma keyo.” Ngerono nogo chon to pod en gadiera moro e iye. Ka wang’ado ni wan gi chenro moro ma wadwaro timo, nyaka watim kinda mondo wachop chenrono. Gima nyalo konyowa en paro gueth kata gik mabeyo ma wabiro yudo ka wachopo e gima wachanono. En adier ni wabiro romo gi pek moko e yo, kata kamano, pekgo ok onego omonwa timo gino.

Bende, dwarore ni wapar yore mabeyo ma wanyalo tiyogo mondo wachop gik ma wachanogo. Jandiko moro miluongoni C. R. Snyder, ma osetimo nonro matut e wi geno, wacho ni ber paro yore mopogore opogore ma ng’ato nyalo tiyogo mondo okonye chopo e gimoro modwaro timo. Mano nyalo konyo mondo sama yo moro ok otiyo maber, oti gi yo machielo.

Snyder wacho bende ni ber ng’eyo kinde ma nyalo dwarore ni iwe luwo chenro moro kendo ichak luwo machielo. Ka po ni chenro moro otamowa chopo to pod wamokoe ka chwe, mano nyalo nyoso chunywa. To ka wawile gi chenro machielo ma wanyalo chopoe mayot, mano nyalo miyowa mor kod geno.

Muma nigi ranyisi moro maber e wi wachno. Ruoth Daudi ne gombo ahinya gero ne Jehova Nyasache hekalu. Kata kamano, Jehova nonyiso Daudi ni Solomon wuode e ma ne dhi gerone hekalu. Kar siko koparo e wi chenro ma koro onge gima ne onyalo timoeno, Daudi nowilo chenro ma ne en-go. Notimo kinda e choko ne wuode pesa kod gik gedo ma ne dhi dwarore e gero hekalu.​—1 Ruodhi 8:​17-​19; 1 Weche mag Ndalo 29:​3-7.

Kata ka waloyo paro ma ok owinjore kendo wabedo gi chenro ma nyalo konyowa bedo gi paro mabeyo, pod wanyalo bedo ma onge geno. E yo mane? Thoth gik ma nyosoga chunywa e pinyni gin gik ma wan wawegi ok wanyal chiko. Ere kaka pod wanyalo bedo gi geno kata obedo ni nitie chandruoge momako dhano, kaka dhier, lwenje, timbe ma ok kare, tuoche, kod tho?

[Picha]

Ka itimo interview mar tich to ok ondiki, be mano nyiso ni ok ibi yudo tich nyaka chieng’?

[Picha]

Ruoth Daudi noyie wilo chenro ma ne en-go