¿Tiʼ jaku bʼant quʼn tuʼn miʼn tten qximbʼetz nya toj tumel?

¿TIʼ T-XIMA kyiʼj nya bʼaʼn in che ikʼ toj qanqʼibʼil? Aju tzaqʼwebʼil in xi qqʼoʼn tiʼj jlu, in tzaj tyekʼin qa in ten qximbʼetz toj tumel kyiʼj tiʼchaq in qo ok weʼ twitz moqa mintiʼ. Qkyaqilx in qo ok weʼ twitz nya bʼaʼn, ateʼ junjun mas nim nya bʼaʼn in tzaj kyiʼj. Pero, ¿tiquʼn ateʼ junjun xjal kukx in che tzalaj, kukx in nok tilil kyuʼn aj kyok weʼ kywitz nya bʼaʼn, atzun junjuntl ya mintiʼ?

Jun techel, ximana tiʼj qa in jyona taqʼuna. In xiʼya toj entrevista ex mintiʼ in tzaj qʼoʼn taqʼuna. ¿Tiʼtzulo jaku kubʼ tnaʼna? Jaku kubʼ tnaʼna qa oʼkx tiʼja in bʼaj jlu ex qa ax jlu kbʼajel tiʼja tkyaqil maj, ex jaku kubʼ t-ximana jlu: «Ni jun xjal jaku tzaj qʼonte waqʼune. Mlayx kanet jun waqʼune». Moqa jaku txi tqʼoʼna ambʼil te jlu tuʼn tkubʼ t-ximana qa tkyaqilx nya bʼaʼn in nela toj tanqʼibʼila ex jaku tqʼamaya jlu: «Mintiʼ jun tiʼ tbʼanel in bʼant wuʼne. Mintiʼx wajbʼene». Qa ma kubʼ t-ximana jlu, in kubʼ tyekʼina qa mintiʼ in ten t-ximbʼetza toj tumel kyiʼj tiʼchaq.

¿Tzeʼn jaku kubʼ tiʼj qximbʼetz nya toj tumel?

¿Tiʼ jaku bʼant quʼn tuʼn miʼn qkubʼ numj tuʼn qximbʼetz nya toj tumel? Tnejel, bʼaʼn tuʼn tel qnikʼ tiʼj qa mintiʼ in nonin ximbʼetz lu qiʼj. Tkabʼin, tzʼok tililxix quʼn tuʼn miʼn tten qximbʼetz nya toj tumel. Qo ximen kyiʼj junjuntl tiʼchaq mas toj tumel. Jun techel, ¿axpe tok qa ni jun xjal jaku tzaj qʼonte taqʼuna? ¿Moqa noq oʼkx in jyon empresa tiʼj juntl xjal at chʼintl tojtzqibʼil?

Qo ximen tiʼj tiquʼn in ten qximbʼetz nya toj tumel ex alkyeqe. Qa mintiʼ in tzaj qʼoʼn qaqʼun tuʼn xjal, ¿ape t-xilen jlu qa mintiʼx jun tiʼ tbʼanel in bʼant quʼn moqa jaku qo ximen kyiʼj junjuntl tiʼchaq tbʼanel in bʼant quʼn ik tzeʼn tuʼn qajbʼen te Dios, tuʼn qten kyukʼil toj qja moqa aj qten kyukʼil qamiw? Miʼn kubʼ qximen qa tkyaqil tiʼchaq in bʼaj puro nya bʼaʼn ex miʼn kubʼ qximen qa tkyaqilju kbʼantel quʼn nya tbʼanel kʼokel. ¿Jakupe kubʼ qximen qa mlayx kanet jun qaqʼun? Ax ikx ateʼ junjuntl tiʼchaq jaku che onin qiʼj tuʼn miʼn tten qximbʼetz nya toj tumel.

Tenx tbʼanel qximbʼetz tiʼjju kbʼantel quʼn

Kyoj qeju mankbʼil abʼqʼi, o tzaj kyqʼamaʼn qʼol tqanil qa nimxix in nonin qiʼj aj tten qximbʼetz toj tumel. Tzaj kyqʼamaʼn qa jaku txi qnimen qa jaku che japun twi qximbʼetz. Ik tzeʼn kʼelel qnikʼ tiʼj toj juntl xnaqʼtzbʼil, aj qyon tiʼj jun tiʼ, nimxix jaku tzʼonin qiʼj. Jun techel, qa ma qo ximen tiʼjju in qo ayon tiʼj, kʼonil qiʼj tuʼn tten qximbʼetz toj tumel tiʼjju qaj tuʼn tbʼant quʼn.

Tuʼn t-xi qnimen qa jaku bʼant jun tiʼ quʼn, il tiʼj tuʼn qximen tiʼj tiʼ qaj tuʼn tbʼant quʼn ex tuʼn qaqʼunan tiʼj. Qa nya naqʼli qoʼ tuʼn qximen tiʼjju qaj tuʼn tbʼant quʼn, bʼaʼn tuʼn qximen tiʼj tiquʼn. Tnejel ¿atpe jun tiʼ qaj tuʼn tbʼant quʼn? At maj in che bʼant nim tiʼchaq quʼn ex tuʼn jlu at maj mintiʼ ambʼil qiʼj tuʼn qximen tiʼj tiʼxix qaj tuʼn tbʼant quʼn toj qanqʼibʼil moqa alkyeqe tiʼchaq mas nim kyoklen. Aj qyolin tiʼj jlu, o tzikʼ nim ambʼil tkyajlen qʼamaʼn toj Tyol Dios qa tbʼanel tuʼn tok qqʼoʼn qwiʼ tiʼj alkye mas nim toklen (Filipenses 1:10).

Aj tel qnikʼ tiʼj tiʼ qaj tuʼn tbʼant quʼn, mas nya kwest tuʼn tok qqʼoʼn qwiʼ kyiʼj junjun tiʼchaq mas nim kyoklen aj qajbʼen te Dios, aj qten kyukʼil toj qja ex qa aj qten toj tja xnaqʼtzbʼil. Pero nim toklen tuʼn miʼn tkubʼ qximen qa jaku bʼant nim tiʼchaq quʼn ex bʼaʼn tuʼn tjaw qjyoʼn qe tiʼchaq nya kwest tuʼn tbʼant quʼn. Qa mintiʼ ma bʼant jlu quʼn, jaku tzaj qbʼis ex jaku txi qqʼoʼn gan te. Tuʼntzunju, mas bʼaʼn qa ma txi qbʼinchaʼn junjun tiʼchaq nej, yajxitl, jaku bʼant juntl tiʼ quʼn tuʼntzun tjapun twi qximbʼetz.

Chi jun ojtxe yol kyjalu: «Qa qaj, kbʼantel quʼn». Ax tok qe yol lu. Aj tel qnikʼ tiʼj tiʼ qaj tuʼn tbʼant quʼn, kʼokel tilil quʼn tuʼn qjakʼunte qibʼ, tuʼn qximen tiʼj qa qaj tuʼn tbʼant quʼn ex tuʼn qaqʼunan tiʼj tuʼntzun tjapun twiʼ. Mas kʼokel tilil quʼn aj qximen tiʼj jniʼ toklen aju kbʼantel quʼn ex alkye tten kʼonil qiʼj qa ma japun twiʼ. Ax tok, qo okel weʼ kywitz junjun nya bʼaʼn, pero miʼn tzʼok qqʼoʼn jlu te jun tramp tuʼn miʼn tjapun twi qximbʼetz.

Ax ikx bʼaʼn tuʼn qximen tiʼj tiʼ jaku tzʼonin qiʼj tuʼn tjapun twi qximbʼetz. Tqʼama C. R. Snyder alkye tten in nonin tbʼanel qximbʼetz qiʼj aj tok tilil quʼn tuʼn t-xi qbʼinchaʼn qe tiʼchaq toj junxichaq tten. Iktzun tten, qa mintiʼ ma tzʼonin jun tumel qiʼj, jaku txi qbʼinchaʼn toj juntl tten tzmaxi aj tjapun twi qximbʼetz.

Ax ikx in tzaj tqʼamaʼn Snyder qa nim toklen tuʼn tel qnikʼ tiʼj toj alkye ambʼil jaku bʼaj qchʼexpuʼn aju otoq tkubʼ qximen tukʼil juntl tiʼ qaj tuʼn tbʼant quʼn. Qa mintiʼ ma japun twi jun qximbʼetz maske otoq tzʼok tilil quʼn tuʼn tbʼant toj junxichaq tten, jaku tzaj bʼaj qkʼuʼj qa kukx in qo ximen tiʼj. Pero qa ma kubʼ qchʼexpuʼn tukʼil juntl tiʼ jaku bʼant quʼn, jaku tzʼok qeʼ qkʼuʼj tiʼj juntl tiʼ.

In kanet jun techel tiʼj jlu quʼn toj Tyol Dios. Tajtoq aj kawil David tuʼn tjaw tbʼinchaʼn jun tja Jehová, aju Tdios, pero xi qʼoʼn oklenj jlu te Salomón, aju tkʼwal. Tej tbʼaj jlu, mintiʼ tzaj tqʼoj David ex mintiʼ jyon tumel tuʼn t-xi tbʼinchaʼn aqʼuntl lu, sino kubʼ tchʼexpuʼn t-ximbʼetz. Atz ok tqʼoʼn twiʼ tiʼj tzeʼn jakutoq tzʼonin tuʼn tjaw chmet pwaq ex qe material che ajbʼel tuʼn tkʼwal tuʼn tjaw tbʼinchaʼn tja Dios (1 Reyes 8:17-19; 1 Crónicas 29:3-7).

Noqtzun tuʼnj, maske otoq tzʼok tilil quʼn tuʼn kyten tbʼanel qximbʼetz kyiʼj tiʼchaq qaj tuʼn tbʼant quʼn, bʼalo atx juntl tiʼ tuʼn qaqʼunan tiʼj. ¿Alkye? Aju tuʼn tten qʼuqbʼil qkʼuʼj. ¿Tiquʼn? Tuʼnju aj ttzaj bʼaj qkʼuʼj, at maj nya toj qqʼabʼ taʼ tuʼn t-xi bʼinchan kyiʼj tiʼchaq. In tzaj qbʼis aj qximen kyiʼj nya bʼaʼn in che ikʼ toj ambʼil jaʼlo ik tzeʼn yabʼil, mebʼayil, yajbʼil ex kamik. Toj ambʼil lu, ¿alkye tten jaku ten tbʼanel qximbʼetz?

[Aju tilbʼilal]

Qa mintiʼ ma txi qʼoʼn taqʼuna, ¿in kubʼpe t-ximana qa mlayx kanet jun?

[Aju tilbʼilal]

Ten tbʼanel t-ximbʼetz aj kawil David kyiʼj tiʼchaq tajtoq tuʼn tbʼant tuʼn.