¿Uelis ayokmo san timosentlalisej ipan tlen amo kuali?

¿KENIJKATSA tikixnamiki tlaouijkayotl? Miakej ixtlamatinij kiijtouaj kema kichiuaj ni tlajtlanili kiitaj kenijkatsa eli se maseuali kema kiixnamiki se tlaouijkayotl. Nochi tikixnamikij kuesoli, sekij kiixnamikij miak uan sekij amo. Uajka, ¿kenke sekij maseualmej kiixnamikij kuesoli ika pakilistli uan sekij amo tleno kichiuaj?

Se neskayotl, ximoiljui tijtemoua se tekitl uan kema tia kampa kintekimakaj, ta amo mitstekimakaj. ¿Kenijkatsa tijyolmatiskia? Uelis tlauel timotekipachoskia uan timoiljuiskia amo kema nijpias se tekitl, uan nojkia timoiljuiskia: “Amo aka nechtekimakas uan amo kema nijpantis se tekitl”. O uelis nopa kuesoli kichiuas nojua tlauel ximotekipachojto, uan timoiljuis: “Amo tleno nopati pampa amo tleno ueli nijchiua”. Ni ome tlamantli kinextia tlake moiljuia se akajya katli san mosentlalia ipan tlen amo kuali.

¿Tlake techpaleuis?

¿Tlake techpaleuis amo kiampa timoiljuisej? Achtoui moneki tikitasej tlake kichiua kiampa ma timoiljuikaj. Teipa xijchiua kampeka ayokmo kiampa timoiljuis. Nojkia ximoiljui kenke amo mitstekimakakej. Se neskayotl, ¿amo mitstekimakakej pampa amo kuali titekiti o uelis kampa tijtemoto nopa tekitl, kinekiyayaj se akajya katli ueli kichiua seyok tlamantli?

Ximoiljui ipan se tlamantli tlen mitspanok uan xikita tlake kichiua ximosentlali san ipan tlamantli tlen amo kuali. Amo ximoiljui amo ueli tleno tijchiua san pampa sampatsi amo mitstekimakakej. Ximoiljui tlen kuali tijchiua, uelis kuali tijtekipanoua toTeotsij o kuali tiitstok ika mochampoyouaj uan mouampoyouaj. Amo nima ximoiljui panos tlen amo kuali kema tijneki tijchiuas se tlamantli. Uajka, ¿nelnelia amo kema uelis tijpantis se tekitl? Nojkia onka sekinok tlamantli tlen uelis mitspaleuis ayokmo kiampa ximoiljui.

Ma timosentlalikaj ipan tlen kuali kema timoiljuiaj tijchiuasej se tlamantli

Ipan xiuitl tlen panotok, ixtlamatinij kiijtouaj kema se akajya kichia se tlenijki kiijtosneki san moneki moiljuis kena uelis kichiuas tlen mosentlalijtok. Maske tlen kiijtouaj ixtlamatinij kena techpaleuia, ipan seyok tlamachtili tikitasej tlake nelnelia kiijtosneki kema tijchiaj se tlenijki. Yeka, tlaj timosentlaliaj ipan tlen tijchiaj, tlauel techpaleuis ma tiyolpakikaj kema tijnekisej tijchiuasej se tlenijki.

Tlaj tijnekij timoiljuisej kena uelis tijchiuasej se tlenijki, moneki timosentlalisej ipan se tlamantli uan tijchiuasej kampeka tikasisej. Tlaj tikitaj amo kiampa tijchiuaj, uajka moneki timoiljuisej ipan tlake tlamantli timosentlaliaj. Achtoui: ¿timosentlalijtokej tijchiuasej se tlenijki? Uelis san tijchiuaj tlen ipa tijchijtiualauij uan amo kema timoiljuijtokej tlake tijnekij tijchiuasej ipan tonemilis, tlen nelnelia tijpatiitaj. Maske tlauel techpaleuia ni tlamantli, Biblia ipa kiijtojtoya ma ‘tijtlapejpenikaj tlen nelia kuali’ (Filipenses 1:10).

Kema ya tijmatij tlake tijnekij tijchiuasej, tlauel techpaleuis ma timosentlalikaj ipan se keski tlamantli, uelis kuali tijtekipanosej toTeotsij, kuali tiitstosej ika tochampoyouaj uan ipan toteki. Yeka, amo ma timosentlalikaj tijchiuasej miak tlamantli, san ma timosentlalikaj ipan tlen amo ouij. Tlaj amo kiampa tijchiuasej, uelis ayokmo tijnekisej tijchiuasej tlen timosentlalijtokej. Tlauel kuali tlaj timosentlalisej tijchiuasej tlen ouij ipan miak tonali, uan tlen amo ouij san ipan se keski tonali.

Sekij kiijtouaj kema se akajya kineki kichiuas tlen moiljuijtok, kena uelis kichiuas. Uan nopa nelia. Kema ya tijmatij tlake tijchiuasej, moneki tijnekisej tikasisej nopa tlamantli tlen timosentlalijtokej. Nojua tlauel tijnekisej tijchiuasej se tlenijki tlaj tijpatiitaj tlen timosentlalijtokej uan kenijkatsa techpaleuis teipa. Maske kemantika onkas tlaouijkayotl, amo ma timoiljuikaj techtsakuilis, moneki timoiljuisej kena uelis tikixnamikisej.

Nojkia moneki timoiljuisej kenijkatsa uelis tijchiuasej tlen timosentlalijtokej. C. R. Snyder, katli tlauel momachtijtok ni tlamantli, kiijtoua katli mosentlalia kichiuas se tlenijki, moneki moiljuis ipan miak tlamantli tlen kipaleuis kichiuas tlen moiljuijtok. Uajka, tlaj timosentlalijtokej tijchiuasej se tlenijki uan amo kisa kej tijnekiyayaj, uelis tijpatlasej kej timoiljuijtoyaj tijchiuasej.

Snyder nojkia kiijtoua moneki tijmatisej kema uelis tijpatlasej tlen timoiljuijtoyaj tijchiuasej. Tlaj amo ueli tijchiuaj tlen timosentlalijtokej, amo san ma timoseniljuijtokaj ipan nopa tlamantli pampa nopa kichiuas ma timotekipachokaj. Uan tlaj timoiljuiaj ipan seyok tlamantli tlen kena uelis tijchiuasej, nopa techpaleuis ma tijchiakaj tlen kuali.

Ipan Biblia tijpantiaj se neskayotl tlen uelis techpaleuis. Maske tlanauatijketl David kinekiyaya kichijchiuilis iTeotsij se teokali, Jehová kiiljuik katli kisenkauaskia nopa teokali eliskia Salomón. Maske David motekipachok, amo kualanki uan kipatlak tlen mosentlalijtoya kichiuas. Kichijki kampeka kinechikos nopa tomij uan tlen motekiuiskia, kiampa ikone ueliskia kisenkauas nopa teokali (1 Reyes 8:​17-19; 1 Crónicas 29:​3-7).

Maske timotemachiaj tijselisej tlamantli tlen kuali uan tijchiuaj kampeka tijchiuasej tlen timosentlalijtokej, uelis nojua techpoloua timotemachisej ipan tlen tijchiaj. ¿Kenke? Pampa onka miak tlamantli tlen amo uelis tijpatlasej. Kema timoiljuiaj kenijkatsa techtlaijiyouiltia miak tlamantli, kej mayantli, tlauilankayotl, tlen amo xitlauak, kema timokokouaj uan kema miki se akajya, ¿tlake techpaleuis nojua ma timosentlalikaj ipan tlamantli tlen kuali?

[Tlaixkopinkayotl]

Tlaj amo mitstekimakaj ipan se tekitl tlen ta tijneki, ¿kiijtosneki amo aka mitstekimakas?

[Tlaixkopinkayotl]

Tlanauatijketl David amo mosentlalik ipan tlen amo ueliyaya kichiua