Imwimwi Mungakwanisa Kuhwisana no Mavonero Akashata

MUNOVONA kudini zvineso zvenyu? Vazivi vazinji, vanonanga kuti mupinguro wo muvhunjo uwu unofira pa zviya zvaari mundhuwo dangani ano mavonero akanaka kana kuti akashata. Tese tinosongana no mugariro jinonesa mu upenyu, jakatosiyana no jo vamweni. Ngenyi vandhu vamweni vanokwanisa kuhwisana no zvineso zvavo pikija vecitosongana no zvineso zvakawanda kuveni vamweni avakwanisi kuhwisana no zvineso zvavo pikija zvitori zvidoko?

Inga muezaniso, ngatiti imwimwi muri kupsaka basa. Perapo moenda ko entrevhistahwi, asi motama kudaninjwa. Munorangarirenyi? Kangaije munovova kuti cinesoco citori na imwimwi kamare motorangarira kuti amuzowanizve basa, moti: ‘Apana anozondidaninjavo. Adizowanizve basa.’ Ciro cimweni cakashatisisa ngo co kutendera kuti cinesoco cipsase manera okuvona zviro mu upenyu, motorangarira kuti: ‘ndiri mundhu wakarembejeka. Andisisiri nee padoko.’ Manera aya o kurangarira pa mugariro muviri iji, akashata kamare.

Tingahwisana kudini no Mavonero Akashata?

Mungahwisana kudini no murangariro uwu? Ciro cokutanga cinodikana kuithwa ikujijira kuvona kuti murangariro uwu wakashata. Perapo ejanyi kuzvikanganwa. Vonanyi zvese zvinobatanijwepo. Kureva kuti icokwadi kuti apanavo angandipsaka kuti ndishande? Kana kuti pa basepo vari kupsaka mundhu anozvikwaniriso zvandicina?

Kudari mukabatikana pa mavonero enyu basi, munozovona kuti murangariro jimweni jakashata ikutonyanyisa. Kureva kuti pamunotama kuwana basa zvinoda kureva kuti amukwanisi kuita ciri cese, kana munoeja kuceujika zviro zvaushoni zvamunoita mu upenyu inga mabasa amunoita wo kumujimu, manera amunotaja mbhuri yenyu no kuva shamwari jaushoni? Jijiranyi kuvona zviro inga “zvinotoitikavo” hazvo. Mungavisa kudini no cokwadi co kuti amuzoriwani basa? I mungaita zvizinji kuti munyise murangariro jakashata.

Kuva no Mavonero Akanaka Kunotibesera kuti Tigaje Zvido Zvedu

Pa makore akapera vapsakisisi vakasanangura Vetero ngo njira iyi: Vetero inobatanija kuthemba kunoita mundhu kuti angakwanisa kuita cakati. Inga zvinozokhombijwa pa musoro unotevera, vetero inobatanija zviro zvizinji kupinda izvi. Kusananguhwa uku kungabesera munjira jakasiyana-siyana. Kubatikana pa vetero iyi kunotibesera kuti tive no mavonero akanaka,no kutibesera kuti tikwanirise zvido zvedu.

Kuti tikwanise kuthemba kuti tingakwanisa kukwanirisa zvido zvedu, tinodikana kugaja zvidozvo no kuzozvikwanirisa. Kudari mukavona kuti izvi amuzvikwanisi, zvaizova zvaushoni kurangarira ngo zvido zvamunoda kugaja. Kureva kuti imwimwi muno zvido zvamunoda kugaja? Zvakareruka kutama kugaja zvido ngo ndava yo mabasa edu o njiku no njiku mu upenyu,ticikazivi kunasa kurangarira zvatinoda kuita, ticizivizve kurangarira ku zviro zvinosisira maningi kwatiri. Ngo pamusoro po ndhungamiriro iyi yokugaja zvido, Bhaibheri rakananga izvi kare: ‘kuti muzive ngozvapi zvinosisira maningi.’ —Vafiripi 1:10.

Kudari tikaronga ushoni zviro zvedu, zvinozotibesera kuti tisane zvido zvatingakwanisa mu njira jakasiyana-siyana inga mu mabasa edu o umwari, mbhuri no o njiku no njiku. Ativhiri kutanga ngo kugaja zvido zvakakura. Asi tinodikana kusana kugaja zvido zvatinozokwanirisa. Kudari tikagaja cido cova cinonesa kucikwanirisa, zvingatirembesa no kutihwiririsa sure. Ngokudaro, zvinosisira kupaura zvido zvakakura kuti tizvikwanirise padoko ngo padoko.

Mazwi akangwara amweni anoti: “Kuda ikuita.” Izvi zvinovoneka kuti ndizvonadi kamare. Paya patinogaja zvido, tinodikana kuva no Simba— Cido— Kuvangisira — no kuva takanasiririka kuti tizvikwanirise. Tingavangisa cisungo cedu ngo kurangarira manera zvinosisira zvido zvedu no kurangarira makomborero atinozova navo paya patinozozvikwanirisa. Icokwadi kuti panozova no zvineso ngo kudaro tinodikana kuzvivona kuti tinokwanisa kuzvinyisa haiwa kuzvivona inga kuti azvinyisiki.

Asi itusu tinodikanavo kurangarira ngo njira jakawanda jingatibesera kuti tikwanirise zvido zvedu. Mujiji C. R. Snyder wakajijira ngo kusisira kunoita vetero iyena wakati: zvinosisira maningi kurangarira njira jakawanda jatingakwanirisa zvido zvedu. Ngokuti kudari njira imwe ikatama kushanda, tingashadisa njira yocipiri, yocitatu, zvecindodaro.

Snyder wakanangazve kuti tinodikana kujijira kuzwisisa paya patinodikana kufakeya cido ciya ngo cimweni. Kudari tikatama kukwanirisa cido cotakagaja, atidikani kundogara tecizvirangarira basi ngokuti izvi zvingatirembesa. Kusiyapo zvondhozvo, kucinja cido catakagaja ngo cimweni catingakwanirisa zvingatibesera kuti tivezve no vetero.

Mu Bhaibheri muno muezaniso wakajeka ngo pamusoro po shwiro iyi. Mambo Dhavhidhi waida maningi kuvaka themberi kuitira Mwari wake Jehovha. Ngo kudaro, Mwari wakavhunja Dhavhidhi kuti andiyepi waizovaka themberi asi wainga mwana wake Soromona. kusiyapo kunyangajwira Mwari paakashira masoko aya, Dhavhidhi wakacinja cido cake. Iyena wakatobesera pa kupsaka zviya zvaidiwa ngo mwana wake kuti aite basa iri. —1 Majimambo 8:17-19; 1 Kronike 29:3-7.

Pikija kuti tingatobudirira ushoni pacedu ngo pamusoro po vetero ngo kutama kuva no mavonero akashata, tosakurira mavonero akanaka no kukwanirisa zvido zvedu, kangaije tingatokana-kana kuti tinozova no vetero mu njira jese ? Ngenyi? Ngokuti itusu atikwanisi kuvonenera zviro zvijinji zvinoitika mu nyika muno zvinotiita kuti tithimwe-thimwe. Tikarangarira ngo zvineso zvizinji zviri kunesa vandhu zvakadari inga: Urombo ,hondo, kutama kutajwa ushoni, kuhwaja no kufa —pikija no zvineso zvese izvi, tingaitenyi kuti tienderere mberi tino vetero?

[Pikica pa pheji]

Kudari mukatama kuwana basa ramaida, izvi zvinoda kureva kuti imwimwi narini amuzowanizve basa?

[Pikica pa pheji]

Mambo Dhavhidhi wakava wakaezanana ngo pamusoro po kugaja zvido.